ဆွေးနွေးပွဲကို သြဂုတ်လ ၂၀ ရပ်နေ့မှာ ပြုလုပ်ပြီးစီးခဲ့ပြီး ကြေညာချက်ထဲမှာ ပါဝင်တဲ့ တခြား အဓိက အချက်တွေကတော့ ဥပဒေတွေမှာ တောင်သူလယ်သမား ဆိုတဲ့ စကားရပ်ကို တောင်သူလယ် သမားတွေ လက်ခံနိုင်တဲ့ အဓိပ္ပါယ် ဖွင့်ဆိုချက်တွေနဲ့ ဖွင့်ဆိုပေးဖို့၊ စီမံကိန်းတွေ အကောင်အထည် ဖော်တဲ့အခါမှာ ဒေသခံ ပြည်သူတွေကို ပွင့်လင်းမြင်သာစွာ ညှိနှိုင်းပြီး နိုင်ငံတကာ စံချိန်တွေနဲ့ အကောင်အထည်ဖော်ဖို့၊ လွတ်လပ်တဲ့ တောင်သူလယ်သမား သမဂ္ဂတွေ ရပ်တည် လှုပ်ရှားခွင့်ရှိဖို့ ဆိုတဲ့ အချက်တွေ ပါဝင်ပါတယ်။ ပြီးတော့ တောင်သူလယ်သမားအရေး ဆောင်ရွက်နေတဲ့ သူတွေကို ဖမ်းဆီးချုပ်နှောင်ထားတာတွေ၊ တရားစွဲဆိုတာတွေ ရုပ်သိမ်းပေးဖို့လည်း တောင်းဆိုခဲ့တယ်လို့ သိရပါတယ်။
ထုတ်ပြန်ချက်နဲ့ပတ်သက်ပြီးတော့ ၈၈ မျိုးဆက်ကျောင်းသားများအဖွဲ့က လယ်ယာမြေတာဝန်ခံ ဦးထွန်းမြင့်အောင်က ယခုလိုပြောပါတယ်။
“ထုတ်ပြန်ချက် ဆိုတော့ ဒါက ကျွန်တော်တို့က ဘုံပြသနာတွေကို မီးမောင်းထိုးပြတာပါ။ လွှတ်တော်တို့ အစိုးရအဖွဲ့တို့ ကိုတော့ လယ်သမားအသံတွေကို စီစစ်ပြီး ဒီထပ်ပိုပြီး အသေးစိတ်ကျတဲ့ ဟာတွေ တင်သွင်းသွားမှာ ဖြစ်ပါတယ်။”
ဆွေးနွေးချက်တွေကို လာမယ့် တစ်လအတွင်း လွှတ်တော်ကို တင်သွင်းမှာဖြစ်ပြီးတော့ တင်သွင်းသွားမယ့် အချက်အလက်တွေကိုလည်း အများပြည်သူကို ထုတ်ပြန်မှာ ဖြစ်တယ်လို့ ဆိုပါတယ်။ ဆွေးနွေးပွဲကို ပြည်နယ် ၂ ခုနဲ့ တိုင်း ၅ ခုက လယ်သမားကိုယ်စားလှယ် ၆၀၀ ကျော်တက်ရောက်ခဲ့တယ်လို့သိရပါတယ်။
တောင်သူလယ်သမား အသင်းရဲ့ တွက်ချက်မှုအရ မြန်မာနိုင်ငံတစ်ဝှမ်းမှာ လယ် ၅ ဧက အောက်ဘဲ ပိုင်ဆိုင်တဲ့ လယ်သမား ဦးရေ ၁.၄၇ သန်းရှိတယ်လို့လည်း သိရတဲ့အကြောင်း ရေဒီယိုသြစတြေးလျ သတင်းထောက် စူးရှ က သတင်းပေးပို့ခဲ့တာဖြစ်ပါတယ်။
No comments:
Post a Comment