“ဒီလ နောက်ဆုံးအပတ်မှာ ရန်ကုန်နဲ့ မန္တလေးကို အဓိကထားပြီး အရန်ဆန်တွေ ရောင်းချပေးသွားမယ်” ဟု မြန်မာနိုင်ငံ ဆန်စပါး အသင်းချုပ်မှ ဒေါက်တာ စိုးထွန်းက ပြောသည်။
ပြီးခဲ့သည့် တပတ်ကျော်မှစ၍ ကရင်ပြည်နယ်၊ မွန်ပြည်နယ်နှင့် ရှမ်းပြည်နယ်တို့တွင် ရေကြီးရေလျှံခြင်းများကြောင့် ပြည်တွင်းဈေးကွက်တွင် ဆန်ကြမ်းနှင့် ဆန်ချောများမှာ တအိတ်လျှင် ကျပ် ၂ ထောင်ကျော် ဈေးမြင့်တက်သွားခဲ့ကြောင်း သိရသည်။
“ဆန်ဈေးမြင့်နေတာက တပတ်ကျော်ကျော်လောက်တော့ ရှိပြီလို့ ပြောလို့ရတယ်။ အခုက မြဝတီဘက်မှာက ရေပြန်ကျနေပြီ ဆိုတော့ သူတို့က ဒီကဆန်တွေကို ဈေးပိုပေးပြီး မှာကြတယ်။ ဆန်အမျိုးအစား ပေါ်မူတည်ပြီး တအိတ်ကို ၂ ထောင် ကနေ ၂၅၀၀ အထိ ဈေးတက်နေတယ်လို့ ပြောရမယ်” ဟု ဘုရင့်နောင်ပွဲရုံရှိ ကောင်းမြတ်စံ ဆန်ရောင်းဝယ်ရေးမှ တာဝန်ရှိသူတဦးက ဧရာဝတီသို့ ပြောသည်။
ရေကြီးပြီး စပါးများ ပျက်စီးမှုများကြောင့် ကရင်ပြည်နယ်၊ မွန်ပြည်နယ် နှင့် ရှမ်းပြည်နယ်များမှ ရေဘေး ဒုက္ခသည်များအတွက် ရန်ကုန်မှ ဆန်များကို ဈေးပိုပေးကာ ဝယ်ယူနေရကြောင်း အဆိုပါ ပြည်နယ်များမှ ဆန်ရောင်းဝယ်ရေး လုပ်ကိုင်သူများထံမှ သိရသည်။
“သူများတွေက ပိုက်ဆံပိုပေးဝယ်ပြီး ဝယ်နေကြတော့ ကျမတို့လည်း မဝယ်ရင်လည်း မဖြစ်ဘူးလေ။ လောလောဆယ် အထိကတော့ ရန်ကုန်ကပဲ မှာပြီး ဝယ်နေရတာပဲ။ ဒီမှာ လက်ရှိ အရောင်းဈေးတွေက ဆန်ကြမ်းကို အနည်းဆုံး (ကျပ်) ၁၈၀၀၀ ကနေ ၂၂၅၀၀ အထိ ရောင်းတယ်၊ ဆန်ချောလည်းမက ဆန်ကြမ်းလည်းမကျတဲ့ ကမာကြည်တို့လို ဆန်တွေကိုတော့ ၂၄၀၀၀ ကနေ ၂၆၅၀၀ အထိ ရောင်းနေရတယ်” ဟု ဘားအံမြို့၊ မြို့မဈေးကြီးရှိ ဒေါ်အေးသန်း ဆန်ရောင်းဝယ်ရေးမှ မမာလာက ပြောသည်။
လက်ရှိကာလတွင် ကရင်ပြည်နယ်၊ မွန်ပြည်နယ် နှင့် ရှမ်းပြည်နယ်များတွင် ရေကြီးမှုများ ဖြစ်နေသည့်အပြင် ကျန်တိုင်းဒေသ တချို့၌ စပါး ပိုးကျခြင်း၊ မိုးခေါင်သဖြင့် စပါးစိုက်၍ မရခြင်းများကြောင့် စပါးအထွက်နည်းကာ ရန်ကုန်မှ ဆန်များကိုသာ အဓိက အားထား ဝယ်နေရခြင်းများကြောင့် ယခုကဲ့သို့ ဈေးတက်နေရခြင်း ဖြစ်ကြောင်း ဆန်ကုန်သည်များက ဆိုသည်။
ယခုလက်ရှိ ဘုရင့်နောင်ပွဲရုံတွင် ရောင်းချနေကြသည့် ဆန်ဈေးနှုန်းများမှာ ဆန်ကြမ်း တအိတ်လျှင် အနိမ့်ဆုံးသည် ၁၈၀၀၀ ကျပ် ဖြစ်ပြီး အမြင့်ဆုံးသည် ၁၉၅၀၀ ဖြစ်၍ ယခင်က အနိမ့်ဆုံးလျှင် ၁၆၀၀၀ မှ ၁၈၀၀၀ ဖြစ်ကြောင်း၊ ဆန်ချောတအိတ်လျှင် အနိမ့်ဆုံးမှာ ၂၉၀၀၀ မှ အမြင့်ဆုံး ဈေးနှုန်းသည် ၃၂၀၀၀ ကျပ်ဖြစ်ပြီး ယခင်က အနိမ့်ဆုံးလျှင် ၂၆၅၀၀ မှ ၃၁၀၀၀ ဖြစ်ကြောင်း သိရသည်။
ရန်ကုန်မြို့တွင် ရောင်းချနေသည့် ဘုရင့်နောင်ပွဲရုံမှ ဆန်များကို အဓိကအားဖြင့် မြောင်းမြ၊ ကျိုက်လတ်နှင့် ဖျာပုံ စသည့် ဒေသများမှ မှာယူရောင်းချကြောင်း သိရသည်။
ယခုလက်ရှိတွင် မြန်မာနိုင်ငံ ဆန်စပါးအသင်းချုပ်က ဝယ်ယူထားသည့် အရန်ဆန်တန်ချိန်ကို ထုတ်ဖော်ပြောခြင်းမျိုး မရှိသော်လည်း ၂၀၁၁ ခုနှစ်တွင် တနိုင်ငံလုံးမှ အရန်ဆန် တန်ချိန် ၄၅၀၀၀ နှင့် ၂၀၁၂ ခုနှစ်တွင် နိုဝင်ဘာလအထိ အရန်ဆန် တန်ချိန် ၂၀၀၀၀ ခန့် ဝယ်ယူ စုဆောင်းခဲ့ကြောင်း သိရသည်။
တိုင်းပြည်အတွင်း ရေကြီးခြင်း၊ ငလျင်လှုပ်ခြင်း၊ မုန်တိုင်းတိုက်ခြင်း စသည့် သဘာဝဘေးဒဏ်များ ကြုံတွေ့ရသည့်အခါ အစိုးရက အရန်ဆန်များ ထုတ်ယူပြီး ကယ်ဆယ်ရေး ရိက္ခာအဖြစ် အသုံးပြုလေ့ရှိသည်။
No comments:
Post a Comment