တနင်္သာရီမြစ်ရေဟာ သြဂုတ်လ ၂ရက်နေ့အထိ သာ မာန် မြစ်ရေထက်၂၄.၅ ပေမြင့်တက်နေတဲ့အတွက် အနီးနားက ချောင်းကြီးရပ်ကွက် ရွှေလိပ်ပြာ ၆ လမ်းမှာ ရေအမြင့်ပေ ၆ ပေ ကျော် မြင့်တက်နေပြီး ချောင်းငယ်ရပ်ကွက် မွန်စုရပ်မှာလည်း အမြင့်ပေ ၆.၂ ပေ မြင့်တက်နေတဲ့အတွက် အိမ်ခြေ သုံးရာလောက် ရေလွမ်းမိုး ခံနေရတာ ဖြစ်ပါတယ်။
အိမ်ခြေသုံးရာလောက် ရေလွမ်းမိုးမှု ဖြစ်နေတဲ့အတွက် လူပေါင်း တစ်ထောင်ကျော် ဒုက္ခရောက်နေပေမယ့် လူပေါင်း ၄၀၀ လောက်ကိုသာ ကယ်ဆယ်ရေးစခန်းမှာ နေရာချထားပေးနိုင်ကြောင်း သိရပါတယ်။
ခုလောလောဆယ် ရေဘေးဒုက္ခသည်တွေအတွက် ကယ်ဆယ်ရေးစခန်း ၄ ခုဖွင့်လှစ်ထားပြီး သက်ဆိုင်ဋ္ဌာနတွေက လိုအပ်တဲ့ ကျန်းမာရေး ၊ နေထိုင်စားသောက်ရေးတို့အတွက် ဆန် ၊ ဆီ ၊ ခေါက်ဆွဲခြောက်တွေကို ငါးရက်စာ ကူညီပေးထားတယ်လို့ ဒေသခံ ဦးသန်းစိုးဝင်းက ပြောပြပါတယ်။
တစ်ချို့ ရေဘေးသင့်သူတွေက ကယ်ဆယ်ရေးစခန်းအစား နီးစပ်ရာ ဆွေမျိုးတွေရဲ့ အိမ်မှာ ရွေ့ပြောင်းနေထိုင်ကြတယ်လို့လည်း သိရပါတယ်။ မြစ်ရေလျှံမှုကြောင့် စာသင်ကျောင်းတွေ ပိတ်ထားရပေမယ့် ဆယ်တန်းကျောင်းသားတွေကိုတော့ စာဆက်လက် သင်ကြားပေနေတယ်လို့ ဆရာမတစ်ဦးက ပြောပါတယ်။
တနင်္သာရီမြို့ အနီးဝန်းကျင်ရှိ ကျေးရွာ ၆ ရွာမှာလည်း ရေကြီးမှု ဖြစ်နေပြီး လူဦးရေ ၁၈၀ လောက် ကယ်ဆယ်ရေးစခန်းမှာ နေထိုင်နေရပြီး ရေကြီးမှုကြောင့် လယ်ယာမြေဧက ၂၀၀ လောက် ရေနစ်မြုပ်ကုန်တယ်လို့လည်း သိရပါတယ်။
ရွာခြောက်ရွာအနက် မြန်မာအင်းတော်ရွာနဲ့ ကျောက်မိကျောင်းရွာမှာ ရေကြီးမှု အဆိုးဝါးဆုံးဖြစ်နေပြီး ရွာလုံးကျွတ်ပြောင်းရွှေ့မှု လုပ်ခဲ့ရပါတယ်။ အဲဒီရွာတွေဟာ မြို့နဲ့ အလှမ်းဝေးတဲ့အတွက် ကယ်ဆယ်ရေးစခန်းကို မလာနိုင်ကြဘဲ တောင်ပေါ်မှာ တဲတွေ ဆောက်ပြီး နေထိုင်နေကြတယ်လို့ ဒေသခံတွေက ပြောပါတယ်။
တနင်္သာရီမြို့နယ်မှာ နှစ်စဉ် နှစ်တိုင်း မြစ်ရေလွှမ်းမိုးမှု ဒဏ်ကိုခံစားရလေ့ရှိပြီး အဆိုးဆုံးကတော့ ၁၉၉၄ ခုနှစ်က ဖြစ်ခဲ့တဲ့ ရေကြီးမှုဖြစ်ပြီး တစ်မြို့လုံးကို ရေလွှမ်းခဲ့တဲ့အကြောင်း အလွတ်သတင်းထောက် ရွှေမြိတ်သားလေး ဇော်ဇော်က သတင်းပေးပို့ခဲ့ပါတယ်။
No comments:
Post a Comment