၈ လေးလုံး ငွေရတုအခမ်းအနားကို သြဂုတ်လ ၆ ရက်နေ့မှစတင်ကျင်းပခဲ့ပြီး တိုင်းရင်းသားအင်အားစုများ၊ ပြည်တွင်းပြည်ပ နိုင်ငံရေးလှုပ်ရှားသူများ အပါအ၀င် အင်အားစုအားလုံးပါဝင်သော နိုင်ငံရေးဆွေးနွေးပွဲများ ဆက်တိုက် ကျင်းပခဲ့ကြောင်း၊ ၂ ရက်တာ ကျင်းပခဲ့သော နိုင်ငံရေးဆွေးနွေးပွဲများ၏ ရလာဒ်များကို ယနေ့ ကျရောက်သည့် ၈လေးလုံး ငွေရတုနေ့ အခမ်းအနားတွင် အချက် ၃ ချက် ပါ ၈ လေးလုံး ငွေရတု ကြေညာစာတမ်းကို ထုတ်ပြန်ခဲ့သည်။
၂၀၀၈ ဖွဲ့စည်းပုံအခြေခံဥပဒေသည် စစ်မှန်သော ဖက်ဒရယ်ပြည်ထောင်စုစနစ်ပေါ်ထွန်းရေး အာမ မခံနိုင်ကြောင်း၊ ကိုယ့်ကြမ္မာကိုယ် ပြဌာန်းနိုင်ခွင့်ရှိ၍ တန်းတူညီမျှမှုရှိသော ဒီမိုကရက်တစ် ဖက်ဒရယ်ပြည်ထောင်စု နိုင်ငံတော် သစ် ထူထောင်နိုင်ရမည်ဖြစ်ပြီး ထိုသို့ ဖော်ဆောင်နိုင်ရန်အတွက် ငြိမ်းချမ်းရေးနှင့် အမျိုးသား ပြန်လည်သင့်မြတ် ရေးကို ဦးတည်သော အမျိုးသား အင်အားစုအားလုံး ပါဝင်သည့် ညီလာခံတရပ် ကျင်းပရန် လိုအပ်ကြောင်း ၈ လေးလုံး ငွေရတု ကြေညာချက်တွင် ဖော်ပြထားသည်။
၈ လေးလုံးငွေရတုနေ့ အထိမ်းအမှတ် အခမ်းအနားသို့ အမျိုးသားဒီမိုကရေစီအဖွဲ့ချုပ်ဥက္ကဋ္ဌ ဒေါ်အောင်ဆန်းစုကြည် တက်ရောက် မိန့်ခွန်းပြောကြားခဲ့ပြီး ၈လေးလုံး ငွေရတုကြေညာစာတမ်းသည် အမျိုးသားဒီမိုကရေစီအဖွဲ့ချုပ်၏ မူဝါဒရည်ရွယ်ချက်များနှင့် ကိုက်ညီကြောင်း၊ အမျိုးသား ရင်ကြားစေ့ရေးဟုဆိုရာတွင် တိုင်းရင်းသားများအချင်းချင်း ပြေလည်ရေးသာမက နိုင်ငံအတွင်းက မတူသောသဘောထားများရှိသည့် အစုအဖွဲ့များကြားတွင်လည်း ပြေလည်ရန် လိုအပ်သည်ဟု ဒေါ်အောင်ဆန်းစုကြည်က ပြောသည်။
“ဒီနိုင်ငံမှာ ဥပဒေစိုးမိုးရေးရှိပြီလားဆိုရင် မရှိသေးပါဘူး။ ဒီနိုင်ငံမှာ ပြည်တွင်းငြိမ်းချမ်းရေး ရှိနေပြီလားဆိုတော့လည်းမရှိသေးပါဘူး။ ဒီဖွဲ့စည်းပုံအခြေခံ ဥပဒေကို ပြင်ပြီးပြီလားဆိုတော့လည်း စတောင် မစရသေးပါဘူး။ ဒီပန်းတိုင်ကို ရောက်အောင်သွားရမယ်” ဟု ဒေါ်အောင်ဆန်းစုကြည်က ဆိုသည်။
ဖွဲ့စည်းပုံအခြေခံ ဥပဒေတခု၏ အသက်သည် ပြည်သူလူထု၏ လက်ခံလိုချင်မှုဖြစ်ကြောင်း၊ ပြည်သူလူထုမှ လက်မခံလျှင် အသက်မဲ့သော ရုပ်ဝတ္တုအဖြစ်သာ ရှိမည်ဖြစ်ကြောင်း ဒေါ်အောင်ဆန်းစုကြည်က ဆက်လက်ပြောဆိုသည်။
၈၈မျိုးဆက်ကျောင်းသားခေါင်းဆောင် ကိုမင်းကိုနိုင်က ပြည်သူများသည် တရားမျှတမှု၊ တန်းတူညီမျှမှုကို လိုချင်နေပြီ ဖြစ်ကြောင်း၊ သမိုင်းတစ်ခုသည် အချိန်တန်လျှင် အောင်ပွဲခံရမှာဖြစ်ကြောင်း၊ ယနေ့တက်ရောက်လာသော လူထုအင်အား ကိုကြည့်ရုံဖြင့် မြင်တွေ့နိုင်မည် ဖြစ်ပါ ကြောင်း ငွေရတုအခမ်းအနား ဖွင့်ပွဲမိန့်ခွန်းတွင် ထည့်သွင်းပြောဆိုသည်။
“တို့ပြည်သူတွေဘက်က မေးခွန်းတွေများစွာရှိပါတယ်။ ဘယ်လောက်စောင့်ရမှာလဲ၊ ဘယ်လောက် စိတ်ရှည်ရမလဲ၊ ဘယ်လောက်သည်းခံရမှာလဲဆိုတဲ့ မေးခွန်းတွေ များစွာရှိပါတယ်။ အဲဒါ နိုင်ငံရေးအင်အားစုတွေအားလုံး ဆွေးနွေးတိုင်ပင်ပြီးတော့ အဖြေရှာရမှာပါ။ ကျနော်တို့ကို ဘာအခွင့်အရေးတွေ ပေးမလဲလို့ မေးတဲ့ပြည်သူ နည်းပါတယ်။ ကျနော်တို့ ဘာရင်ရင်းနှီးရမှာလဲ ဆိုတာကိုသာမေးတဲ့သူ များပါတယ်” ဟု ကိုမင်းကိုနိုင်က ပြောသည်။
ယနေ့ကျရောက်သည့် ၈လေးလုံး ၂၅ နှစ်ပြည့် ငွေရတု အခမ်းအနားသို့ ပြည်ထောင်စုလွှတ်တော်နာယက သူရဦးရွှေမန်း၊ အမျိုးသားလွှတ်တော်ဥက္ကဋ္ဌ ဦးခင်အောင်မြင့်၊ နိုင်ငံရေးပါတီများ၊ ပြည်တွင်း ပြည်ပမှ အဖွဲ့အသီးသီးများ၊ လက်နက်ကိုင် တိုင်းရင်းသားအဖွဲ့အစည်းများက သ၀ဏ်လွှာများပေးပို့ကြောင်း သိရှိရသည်။
ပြည်ထောင်စုလွှတ်တော်နာယက၊ ပြည်ထောင်စု ကြံ့ခိုင် ရေးနှင့် ဖွံ့ဖြိုးရေးပါတီ ဥက္ကဋ္ဌ သူရ ဦးရွှေမန်း ပေးပို့သော သ၀ဏ်လွှာတွင်၁၉၈၈ ခုနှစ်တွင် မြန်မာနိုင်ငံအတွင်း ပြည်သူများ၏ ဒီမိုကရေစီအရေး တောင်းဆိုလှုပ်ရှားမှုတွင် တမူထူးခြားစွာ ပေါ်ထွက်လာသော ၈လေးလုံး ဒီမိုကရေစီအရေးတော်ပုံသည် ယနေ့ပါတီစုံဒီမိုကရေစီနှင့်ဈေးကွက် စီးပွားရေး စနစ်ကျင့် သုံးရေးအတွက် အဓိကအခန်းကဏ္ဍမှ ပါဝင်ခဲ့သော လှုပ်ရှားမှုကြီးအဖြစ် အသိအမှတ် ပြုပါကြောင်း ဖော်ပြထားသည်။
အမျိုးသားလွှတ်တော် ဥက္ကဋ္ဌ ဦးခင်အောင်မြင့် ပေးပို့သော သ၀ဏ်လွှာတွင် ၈လေးလုံး ဒီမိုကရေစီ အရေးတော်ပုံ ကြေညာစာတမ်းတွင် ပါဝင်သော ဒီမိုကရေစီနိုင်ငံတော်သစ် တည်ဆောက်ရာတွင် အမျိုးသားပြန်လည်သင့်မြတ်ရေး အားဖြင့်သာ အောင်မြင်နိုင်မည်ဟု ယုံကြည်သည်ဆိုသော ခံယူချက်ကို လှိုက်လှဲစွာ ကြို ဆိုကြောင်း၊ သမိုင်းတွင် အပြစ်ဖို့အပြစ်ရှာနည်းဖြင့် မချဉ်းကပ်ဘဲ သင်ခန်းစာယူစရာ အတိတ်ကာလ အဖြစ် သဘောထားမှသာ အမျိုးသား ပြန်လည် သင့်မြတ်ရေး အတွက် အကျိုး များမည်ဖြစ်ကြောင်း၊ ယခု ငွေရတုအခမ်း အနားသည် အေးချမ်းသာယာသော ဒီမိုကရေစီ နိုင်ငံတော်သစ်သို့ ဆက်လက်ချီတက်ရေးအတွက် စွမ်းရည်မြှင့်တင်ခြင်း တရပ်အဖြစ် ခံယူကြောင်း ဖော်ပြထားသည်။
ရန်ကုန်မြို့ MCC ခန်းမတွင် ကျင်းပသော ၈လေးလုံး ငွေရတု အခမ်းအနားသို့ တိုင်းရင်းသား ခေါင်းဆောင်များ၊ အမျိုးသားဒီမိုကရေစီအဖွဲ့ချုပ်၊ ပြည်ထောင်စုကြံ့ခိုင်ရေးနှင့်ဖွံ့ဖြိုးရေး ပါတီအပါအ၀င် နိုင်ငံရေးပါတီမှ တာဝန်ရှိသူများ၊ လွှတ်တော်ကိုယ်စားလှယ်များ၊ တိုင်းရင်းသား လက်နက်ကိုင်အဖွဲ့များ အပါအ၀င် ပြည်တွင်းပြည်ပ နိုင်ငံရေးအင်အားစု များ စုံလင်စွာ တက်ရောက်ခဲ့ကြသည်။
ငွေရတုအခမ်းအနားတွင် ၈ လေးလုံး မှတ်တမ်းများ၊ ဓာတ်ပုံများ၊ ပန်းချီနှင့် နိုင်ငံရေးအကျဉ်းသားများ၏ကြုံတွေ့ခဲ့ရသော ထောင်တွင်းအခြေအနေ သရုပ်ဖော်မှုများကို တင်ဆက်ခဲ့ပြီး ပြည်သူလူထု ၂ သောင်းထက်မနည်း လာရောက်အားပေးကြောင်း သိရှိရသည်။
No comments:
Post a Comment