ABC
စက်တင်ဘာ ၁၈ ရက်နေ့မှာကျရောက်တဲ့ ၂၀၀၇ ခုနှစ် ရွှေဝါရောင် တော်လှန်ရေး ၆ နှစ်ပြည့် အခမ်းအနားကို မြန်မာနိုင်ငံနဲ့ ပြည်ပနိုင်ငံတချို့မှာ ကျင်းပခဲ့ကြပြီး အစိုးရအနေနဲ့ သံဃာတော်တွေကို တောင်းပန်ဖို့ တောင်းဆိုခဲ့ကြပါတယ်။
အဲ့ဒါ့အပြင် မြန်မာနိုင်ငံမှာ ဖြစ်ခဲ့တဲ့ ဘာသာရေးအကြမ်းဖက်မှုတွေကို အဆုံးသတ်ဖို့ ရန်ကုန် ကြည့်မြင်တိုင်မြို့နယ်မှာရှိတဲ့ သာဓုပရိယတ္တိ စာသင်တိုက်မှာ ကျင်းပခဲ့တဲ့ အခမ်းအနားအတွင်း သံဃာတော်တွေက တောင်းဆိုလိုက်ပါတယ်။
ရွှေဝါရောင်တော်လှန်ရေးမှာ ဦးဆောင်ပါဝင်ခဲ့တဲ့ သံဃာတော်တွေက မြန်မာနိုင်ငံမှာ ဒီမိုကရေစီလမ်းကြောင်း စတင်ပေါ်ပေါက်လာခါစ အချိန်ဖြစ်တဲ့အတွက် ဒီလမ်းစလေး မပျောက်ပျက်အောင် ထိန်းသိမ်းတဲ့အနေနဲ့ ဘာသာရေး လူမျိုးရေး ပဋိပက္ခတွေ ရှောင်တိမ်းရမယ်လို့ တောင်းဆိုကြတဲ့အကြောင်း အရှင် စန္ဒာသီရိက ပြောပါတယ်။
၂၀၀၇ ခုနှစ် တုန်းက မြန်မာနိုင်ငံမှာ လောင်စာဆီဈေးနှုန်း အဆမတန်မြင့်တက်တာကို ကန့်ကွက်တဲ့အနေနဲ့ သံဃာတော်တွေ စုပေါင်း မေတ္တာသုတ် ရွက်ဆိုပြီး ဆန္ဒပြတာကို အာဏာပိုင်တွေက အကြမ်းဖက် ဖမ်းဆီး နှိမ်နင်းမှုတွေ လှုပ်ခဲ့တာ ဖြစ်ပါတယ်။
အဲဒီအတွက် အနည်းဆုံး ၃၁ ဦးသေဆုံးရပြီး ရာနဲ့ချီတဲ့ သံဃာတော်တွေ ဖမ်းဆီးခံခဲ့ရပါတယ်။
ဒီလို နှစ်ပတ်လည်အခမ်းအနားကို ထိုင်းနိုင်ငံမှာလည်း ကျင်းပကြပြီး ရွှေဝါရောင် တော်လှန်ရေး အရေးအခင်းမှာ ကျဆုံးခဲ့တဲ့ ရဟန်းသံဃာကျောင်းသား ပြည်သူတွေကို ရည်စူးပြီး ၀ါဆိုသင်္ကန်းကပ်လှူတာတွေ မေတ္တာသုတ်ရွတ်ဖတ်ပြီး ကောင်းမှုကုသိုလ်ပြုခဲ့ကြပါတယ်။
အဲဒါ့အပြင် အစိုးရအနေနဲ့ သံဃာတော်တွေကို တောင်းပန်ဖို့နဲ့ သံဃာတော်တွေ အသင်းခွဲတာတွေ မလုပ်ဖို့လည်း တောင်းဆိုခဲ့ကြတယ်လို့ အပြည်ပြည်ဆိုင်ရာ သံဃာ့ဥသျှောင်အဖွဲ့ မဲဆောက်ဌာနခွဲတာဝန်ခံ ဦးစန္ဒောဘာသ က အခုလို မိန့်ကြားပါတယ်။
သံဃာတော်တွေကို အစိုးရကနေတောင်းပန်ပါဆိုတဲ့ ပထမရည်ရွှယ်ချက်နော် ဒုတိယရည်ရွှယ်ချက်ကတော့ သာသနာတော်ကြီးကို ဖျက်လိုရာဖျတ်စီးကြောင်း ကြံစည်တယ် ရည်ရွှယ်တယ် နောက်ပြီးသံဃာတော်တွေကို အသင်းခွဲတယ်။ သံဃာတော်တွေကို အသင်းခွဲ တာကလည်း အင်မတန်မှ အပြစ်ကြီးတယ် အဲဒီဥစ္စာတွေကို မလုပ်ပါနဲ့ရပ်တန်းက ရပ်ပါဆိုတာကို ရည်ရွှယ်ပြီးတော့ ဒီခြောက်နှစ်မြောက်ရွှေဝါရောင်လှုပ်ရှားမှုကို ကျင်းပရခြင်းဖြစ်တယ်။
၂၀၁၃ ခုနှစ် စက်တင်ဘာလ ၁၈ ရက်နေ့ဟာ ရွှေဝါရောင်တော်လှန်ရေးရဲ့ ၆ နှစ်ပြည့် နှစ်ပတ်လည်နေ့ ဖြစ်သလို ရှစ်လေးလုံးအရေးတော်ပုံအပြီး စစ်တပ်က အာဏာသိမ်းခဲ့တဲ့ ၂၅ နှစ်ပြည့် နှစ်ပတ်လည်နေ့လည်းဖြစ်တဲ့အတွက် အဲဒီအတွက် အခမ်းအနားတွေလည်း ပြုလုပ်ခဲ့ကြတယ်လို့ ရေဒီယုို သြစတေးလျ သတင်းထောက် သန်းကျော်စိုး က သတင်းပေးပို့ထားပါတယ်။
No comments:
Post a Comment