မင်းမင်း
အစိုးရ လက်ရှိဆောက်လုပ်နေသည့် တန်ဖိုးသင့်တင့်အိမ်ရာများ ရောင်းချရာတွင် အဂတိလိုက်စားမှုမှ ကာကွယ်ကာ လက်ထပ်ပြီးစ လူငယ်များနှင့် အမှန်တကယ် လိုအပ်သူများကိုသာ ရောင်းချပေးမည့် ဥပဒေတစ်ရပ် ရေးဆွဲတင်ပြမည် ဟု ရန်ကုန်တိုင်း၊ ဗဟန်းမြို့နယ်မှ တိုင်းအမတ် ဒေါက်တာညိုညိုသင်းက ပြောဆိုလိုက်သည်။
“အစိုးရကို အားကိုးလို့မရဘူး။ မြန်မာတွေရဲ့ ထုံးစံအရ ပိုက်ဆံရှိတဲ့သူတွေက ရင်းနှီးမြှုပ်နှံဖို့အတွက် မဟုတ်ဘဲ တကယ် လိုအပ်တဲ့ သူတွေကိုသာ ရောင်းဖို့ ဒီဥပဒေထဲ ထည့်ဆွဲမှာပါ” မဇ္ဈိမကို ပြောသည်။
အိမ်ယာများအတွက် ဥပဒေတစ်ရပ် ရေးဆွဲရန် အစိုးရကို တိုက်တွန်းသည့်အဆိုကို စက်တင်ဘာ၁၈ရက်က ပြုလုပ်သည့် ရန်ကုန်တိုင်းလွှတ်တော်တွင် ဒေါက်တာညိုညိုသင်းက တင်ပြထားသော်လည်း “ကိုယ်တိုင်ရေးဆွဲပြဋ္ဌာန်းပြီးတော့ လွှတ်တော်ကို တင်သွင်းလို့ရှိရင်တော့ အစိုးရကို ရေးဆွဲခိုင်းပြီး လွှတ်တော်ကို တင်သွင်းခိုင်းတာထက် ပိုပြီးတော့ မြန်ဆန်မယ်”ဟုဆိုကာ အဆိုကို ပြန်ရုပ်သိမ်းခဲ့သည်။
“ကျွန်မတို့ တိုင်းပြည်မှာက ပြဿနာတစ်ခု ရှိပါတယ်။ မူကတော့ အမြဲတမ်း ကောင်းပါတယ်။ ဒါပေမဲ့ ဒီမူတွေကို အကောင်အထည်ဖေါ်တဲ့ လူတွေကတော့ ခေတ်အဆက်ဆက် မကောင်းကြတာများပါတယ် ရှင့်။ မကောင်းတဲ့ သူတွေကို ထိန်းကျောင်းဖို့ဆိုတာ ကျွန်မတို့က ဥပဒေဆိုတာ လိုပါတယ်”ဟု ဒေါ်ညိုညိုသင်းက လွှတ်တော်တွင်ပြောဆိုသည်။
ကိုယ်တိုင်ရေးဆွဲမည့် ဥပဒေတွင် အိမ်မရှိသေးသည့် လက်ထပ်ပြီးစ လူငယ်စုံတွဲများနှင့် သား၊ သမီးများပြီး အိမ်မရှိသေးသည့် အိမ်ထောင်သည်များကို ဦးစားပေး ရောင်းချနိုင်ရန် ဥပဒေတွင် ထည့်သွင်းရေးဆွဲ မည်ဟုလည်း သူက ဆိုသည်။
ထိုဥပဒေကို နောက်တစ်ကြိမ်ပြုလုပ်မည့် လွှတ်တော်အစည်းအဝေးတွင် တင်ပြမည်ဖြစ်ပြီး “အစိုးရကသဘောတူ မတူတော့ မသိဘူးပေါ့။ ဒါပေမဲ့ မတူလောက်ဘူးဆိုပြီး ဒီအတိုင်းနေလို့လည်း မဖြစ်ဘူးလေ” ဟု ဒေါ်ညိုညိုသင်းကပြောသည်။
ဥပဒေတွင် ပြည်သူများဘက်မှ စိတ်ချယုံကြည်သည့် အိမ်ရာရောင်းချရေးကော်မတီတစ်ရပ်ကို ဖွဲ့စည်းထားမည်ဖြစ်ပြီး ထိုကော်တီက ရောင်းချမည့် ထိုအိမ်ရာများကို ပိုင်ဆိုင်ခွင့်မရှိစေရန် ပြဋ္ဌာန်းသွားမည်ဟုလည်း အမတ်များကို သူက ရှင်းပြသည်။
အစိုးရက ယခင်က “တန်ဖိုးနည်းအိမ်ရာ”ဟုဆိုရာ အိမ်ရာများ ဆောက်လုပ်ရန် စီမံသော်လည်း သတ်မှတ်ထားသည့် အိမ်ဈေးနှုန်းမှာ ကျပ်သိန်း ၁၅၀ မှ ၂၀၀ အထိ ဖြစ်နေသဖြင့် အခြေခံလူတန်းစား လက်လှမ်းမီသည့် ဈေး မဟုတ်ဟုဆို ကာ မီဒီယာများနှင့် လူမှုအဖွဲ့အစည်းများက ဝေဖန်မှုများ ရှိနေသည်။ နောက်ပိုင်းတွင် အစိုးရက အိမ်ရာစီမံကိန်းများကို “တန်းဖိုးသင့်တင့် အိမ်ရာများ”ဟု ပြောင်းလဲသုံးနှုန်းခဲ့ သော်လည်း ဈေးနှုန်းမှာမူ မပြောင်းလဲခဲ့ပေ။
တန်ဖိုးသင့်တင့်အိမ်ရာများ ဆောက်လုပ်ပြီးပါက လစာနည်းသည့် ဆရာ/ ဆရာမများ ၀ယ်ယူနိုင်အောင် စီမံပေးမည် ဟုလည်း ပြည်ထောင်စု ဆောက်လုပ်ရေး ဒု-၀န်ကြီးဦးစိုးတင့်က ဇူလိုင် ၂၉ ရက်က အောက်လွှတ်တော် အစည်းအဝေး တွင် ပြောဆိုထားသည်။
ဒုတိယပတ်က ရန်ကုန်မြို့တွင် နိုင်ငံခြားရင်းနှီးမြှုပ်နှံမှုများ ပြုံတိုးလာပြီးနောက် မြေဈေးများ အဆမတန် တက်လာ သဖြင့် နွမ်းပါးသူများ အိုးမဲ့အိမ်မဲ့ဖြစ်လာကြကြောင်း စက်တင်ဘာ ဒုတိယပတ်က အေအက်ဖ်ပီ သတင်းဌာနတွင်ဖေါ်ပြခဲ့သည်။
No comments:
Post a Comment