တတိယ အကြိမ်မြောက် ကျင်းပတဲ့ ဒီပွဲတော် လာရောက်တဲ့ သူတွေကို ကရင် ရိုးရာ အစားအစာ တစ်မျိုး ဖြစ်တဲ့ ကရင် တာလဘော့ ဟင်းနဲ့ ထမင်း ကျွေးပြီး ဧည့်ဝတ် ပြုပါတယ်။
ကရင် ရိုးရာ ယဉ်ကျေးမှုတွေကို ဒီကနေ့ ဘယ်လို ဖော်ထုတ် ပြသ သလဲ ဆိုတာကို ကရင် အမျိုးသား အစည်းအရုံး UK က မေရီလှက ပြောပြပါတယ်။
“ကျမတို့ ကရင်ရိုးရာ အက တစ်ခုဖြစ်တဲ့ ဒုံးအက တစ်ခုပါမယ်၊ နောက်ပြီး ဂလုန်နာနာ ဆိုတဲ့ အကတို့၊ နောက်ကရင် ရိုးရာ လက်ချည်ပွဲ ဘယ်လို ဆင်နွှဲလဲ ဆိုတာကို တင်ပြမှာ ဖြစ်တယ်၊ နောက်ပြီး ကျမတို့ ကရင်ပြည်နယ်မှာ လက်ရှိ ဖြစ်နေတဲ့ အခြေအနေ၊ နောက်ပြီး ကျမတို့ ဒီမှာ ဘာတွေ လုပ်ဆောင်လဲ ဆိုတာကို ထည့်သွင်း ပြောသွားမှာ ပါရှင့်”
မေရီလှက ဆက်လက်ပြီး သူတို့ ရိုးရာ ယဉ်ကျေးမှုကို ရေရှည် ထိန်းသိမ်းနိုင်အောင် အခုလို ရိုးရာ အဆိုအကတွေ ၊အစားအစာတွေနဲ့ တခြားလူမျိုးတွေကို မိတ်ဆက်ပေးတာမျိုး၊ ကရင် လူမျိုး အများစုရှိတဲ့ ဗြိတိန်နိုင်ငံ ရှဖီလ်းမြို့မှာ ဆိုရင်လည်း ကရင်ရိုးရာ စာပေ သင်ကြား ပို့ချပေးနေတဲ့ သင်တန်းတွေနဲ့ တဖုံ သူတို့ ကရင့်ရိုးရာကို တိုးတက် ပျံ့ပွားအောင် လုပ်ဆောင် နေကြောင်း ပြောပြ ပါတယ်။
“အခု ဆိုလို့ရှိရင် ကရင်စာပေ သင်ကြားခြင်း ပေါ့နော်၊ နှစ်ပတ်လောက် ပေးလိုက်တော့ ကလေးတွေဆို ကရင် စကားစပြောလာပြီ၊ ဒီနိုင်ငံရောက်တော့ သူတို့တတွေ ကလေ ကိုယ့်ရဲ့ အမိဘာသာ စကားထက် ဒီကဘာသာ စကားကို ပိုပြီးတော့ အားသန် သွားတယ်၊ ကိုယ့်အမိ ဘာသာ စကားကို အိမ်မှာပြောနေပေမယ့် မပြောချင်တော့ဘူး ဆိုတော့ ကျမတို့ ဒီလို သင်တန်း လေးတွေ ပြန်လုပ်ပေးတယ် ၊KCA အနေနဲ့ပေါ့နော်၊ သင်တန်းမှာလည်း ကရင် ဝတ်စုံလေးတွေပဲ ဝတ်ခိုင်းတယ်၊ ကလေးတွေက သူတို့ ဝတ်စုံလေးတွေလည်း ဝတ်တတ် သွားတယ်၊ ပြီးတော့ အချင်းချင်း ရင်းနှီးမှု ပိုရှိသွားတယ် ပေါ့နော်။ ဒီလိုနည်းနဲ့ ကိုယ့်အစည်းအရုံးလေးကို ရင်းနှီး ချစ်ခင်အောင် ကိုယ့်ရိုးရာ ဘာသာ စကားကို လုပ်ဆောင်နိုင်အောင် ကျမတို့ ကြိုးစား လုပ်ဆောင် ပါတယ်ရှင့်”
ကရင်ရိုးရာ ယဉ်ကျေးမှု ပွဲတော်ကို ဗြိတိန်နိုင်ငံ အနှံ့အပြားမှာ ရောက်ရှိ နေထိုင်တဲ့ ကရင် လူမျိုးတွေနဲ့ အတူ မြန်မာနိုင်ငံသားတွေ၊ နိုင်ငံခြားသားတွေ အပါအဝင် ပရိသတ် ၇၀ နီးပါး တက်ရောက် ခဲ့ပါတယ်။
No comments:
Post a Comment