ပထမဆုံးအကြိမ်အဖြစ် အလွတ်သဘော တွေ့ဆုံ ဆွေးနွေးကြတာဖြစ်ပြီး ၈၈ မျိုးဆက်တွေအနေနဲ့ လက်ရှိမြန်မာ့ နိုင်ငံရေး အခြေအနေ တွေကို တင်ပြ ဆွေးနွေးကြတဲ့အကြောင်း၊ အမျိုးသား ပြန်လည် သင့်မြတ်ရေးနဲ့ ပြည်တွင်းငြိမ်းချမ်းရေး အကြောင်းအရာတွေကို အဓိက တင်ပြပြောဆိုခဲ့တဲ့ အကြောင်း ၈၈ မျိုးဆက်ကျောင်းသားဟောင်း ကိုမာကီးက ပြောပြပါတယ်။
“အဓိကတော့ အမျိုးသား ပြန်လည် သင့်မြတ်ရေး ပြည်တွင်းငြိမ်းချမ်းရေးနဲ့ အပစ်အခတ်ရပ်စဲရေးတွေပေါ့နော်။ အဲဒါတွေ အဓိက ပြောဖြစ်တယ်။ အဲဒါကတော့ ပထမဆုံး အလေးအနက်ထားပြီးတော့ ပြောရတဲ့ အရေးကြီးဆုံး အရာပေါ့နော်။”
ငြိမ်းချမ်းရေး ဖြစ်စဉ်တွေမှာ အစိုးရအဖွဲ့နဲ့ လွှတ်တော်အပြင် လွှတ်တော်ပြင်ပက တိုင်းရင်းသားအင်အားစုတွေ၊ နိုင်ငံရေး အင်အားစုတွေ၊ အရပ်ဘက်အဖွဲ့အစည်းတွေ အားလုံးပါဝင်နိုင်ဖို့၊ ပဋိပက္ခတွေနဲ့ လယ်ယာမြေပြဿနာ တွေကို ပူးပေါင်းဖြေရှင်းသွားဖို့ နဲ့ လူထုတစ်ရပ်လုံး လူမှုစီးပွားရေး မြှင့်တင်နိုင်ဖို့တွေကို ဆွေးနွေး ခဲ့တယ်လို့ ဆိုပါတယ်။
တစ်ဆက်တည်းမှာပဲ ၈၈ မျိုးဆက်တွေရဲ့ လုပ်ငန်းစဉ်တွေကို သက်ဆိုင်ရာ ဒေသအာဏာပိုင်တွေက ပူးပေါင်းပေးဖို့လည်း သမ္မတက ညွှန်ကြားချက်တွေ ထုတ်ပြန်ပေးမယ်လို့ ပြောခဲ့တဲ့ အကြောင်း ကိုမာကီးက ဆက်ပြောပါတယ်။
“ကျွန်တော်တို့ ဒီ ၈၈ မျိုးဆက် ပွင့်လင်ငြိမ်းချမ်းရေးနဲ့ လူ့အဖွဲ့အစည်းရဲ့ လှုပ်ရှားမှုတွေမှာ ဒီသက်ဆိုင်ရာ အုပ်ချုပ်ရေး အဖွဲ့အစည်းနဲ့ ပူးပေါင်းဆောင်ရွက်ဖို့ ပူးပေါင်းဆောင်ရွက်ဖို့ ပြောတဲ့အခါမှာ သမ္မတကြီးကလည်း ဒါကို သူ့အနေနဲ့ အရင်ကတည်းကလည်း ပူးပေါင်းဆောင်ရွက်ဖို့ ပြောထားတဲ့အကြောင်း၊ ခုလဲ ထပ်ပြီးတော့ ဒီတစ်ခါပေါ့နော် ညွှန်ကြားချက်တွေ ဘာတွေ ထုတ်ပြီးတော့ ပူးပေါင်းဆောင်ရွက်ဖို့ ပြောပေးမယ်ဆိုတဲ့အကြောင်း၊ ကျွန်တော်တို့ရဲ့ လုပ်ကိုင်ဆောင်ရွက်မှုတွေကို သက်ဆိုင်ရာ အုပ်ချုပ်ရေး အဖွဲ့အစည်းကနေပြီးတော့ ပူးပေါင်းပါဝင်သွားဖို့ အသိအမှတ်ပြုသွားဖို့ အဲဒါမျိုးတော့ သဘောတူထားတယ်။”
သမ္မတ ဦးသိန်းစိန်နဲ့ ထပ်မံတွေ့ဆုံ ဖို့အတွက်ကို စီစဉ်ထားပြီး လက်ရှိ မြန်မာနိုင်ငံရေးမှာ ဒီမိုကရေစီ နည်းလမ်းကျကျ မတူတာတွေ ဘေးဖယ်ထားပြီး တူတာတွေကို ပူးပေါင်းလုပ်ဆောင်သွားမယ်လို့လည်း ၈၈ မျိုးဆက်တွေက ပြောဆိုခဲ့ပါတယ်။
သမ္မတဦးသိန်းစိန် အစိုးရတက်လာပြီးနောက် ၂၀၁၁ ခုနှစ်နဲ့ ၂၀၁၂ အစောပိုင်းတွေမှာ ကိုမင်းကိုနိုင်၊ ကိုကိုကြီးနဲ့ ကိုမင်းဇေယျာ အပါအဝင် ၈၈ မျိုးဆက်ကျောင်းသား အများစု အကျဉ်းထောင်တွေထဲက ပြန်လည် လွတ်မြောက်ခဲ့တာဖြစ်တဲ့အကြောင်း အေဘီစီ ရေဒီယိုသြစတြေးလျ သတင်းထောက် စူးရှ က သတင်းပေး ပို့ထားပါတယ်။
No comments:
Post a Comment