.jpg)
မြန်မာနိုင်ငံမှာ နေရောင်ခြည်စွမ်းအင်သုံး ဆိုလာနည်းစနစ်နဲ့ လျှပ်စစ်မီး ဖြန့်ဝေခြင်းဟာ ပထမဦးဆုံးအကြိမ်ဖြစ်ပါတယ်။ ဒီနည်းပညာကို အသုံးပြုနိုင်ဖို့ သ၀ါးတောကျေးရွာနဲ့ ထုံးတောင်ကျေးရွာ မှာနေထိုင်တဲ့ အသက် ၄၀ကျော်အရွယ် ပညာအရည်အချင်း အတန်အသင့် သာရှိတဲ့ အမျိုးသမီးကြီး ၆ ဦးကို အိန္ဒိယနိုင်ငံ Barefoot ကောလိပ်မှာ ၆လကြာ သွားရောက်သင်ကြားခိုင်းခဲ့တာဖြစ်တယ်လို့သိရပါတယ်။
ပညာအတန်အသင့်သာရှိပြီး ဘာသာစကားမတတ်ကျွမ်းတဲ့ အတွက် သင်တန်းကာလမှာ အခက်အခဲတွေ၇ှိခဲ့သလို ကိုယ်ဟန်လက်ဟန်ပြဘာသာရပ်နဲ့ သင်ကြားတတ်မြောက်ခဲ့တာဖြစ်တယ်လို့ အသက်၅၇ နှစ် အရွယ် ဒေါ်နော်အေးစိန်က ပြောပါတယ်။
“ပညာသင်တာ အခက်အခဲရှိတာ စကားမှနားမလည်တာ။ စကားနားမလည်တော့သူများကြည့်တယ်။ သူများလုပ်တဲ့ အမူအရာတွေပဲလိုက်လုပ်ရတယ်ပေါ့။ နောက်ပိုင်းကျတော့ အင်္ဂလိပ်လိုရေးထားတဲ့ စာအုပ်ကြီးတစ်အုပ်ရှိတယ်။ ၃ ရက်လောက်ပဲ၇ှိသေးတယ်ပေးထားတာ။ အဲ့စာအုပ်ကြီးကြည့်ပြီးတော့ နည်းနည်းပါးပါး နားလည်တဲ့ သားသမီးတွေ မေးမှာပေါ့။”
ဒီအမျိုးသမီးကြီး ၆ ယောက်ကို နေစွမ်းအင် အင်ဂျင်နီယာအဖြစ်နဲ့ ခန့်အပ်မှာ ဖြစ်ကြောင်း၊ နေရောင်ခြည်စွမ်းအင်သုံး လျှပ်စစ်ဖြန့်ဝေခြင်းအတွက် လျှပ်စစ်မီး အသုံးပြုခကို သတ်မှတ်ကောက်ခံသွားမှာ ဖြစ်ပြီး ရရှိလာတဲ့ ငွေကြေးကနေ ဆိုလာစက်များရဲ့ ပြုပြင်စရိတ်၊ ဘတ္တရီအစားထိုးစရိတ် နဲ့ နေစွမ်းအင် အင်ဂျင်နီယာ အမျိုးသမီးကြီး ၆ ဦး ကို လစာငွေအဖြစ်ပေးအပ်သွားမှာ ဖြစ်တယ်လို့ မွေးမြူရေး၊ရေလုပ်ငန်းနှင့် ကျေးလက်ဒေသဖွံ့ဖြိုးတိုးတက်ရေး ၀န်ကြီးဌာနက သတင်းထုတ်ပြန်ထားပါတယ်။
Barefoot ကောလိပ်မှာ နေစွမ်းအင် အင်ဂျင်နီယာ အမျိုးသမီး ကြီး ၆ ဦးပြုလုပ်ခဲ့တဲ့ နေရောင်ခြည်စွမ်းအင်သုံး စက်နဲ့ အပို ပစ္စည်းတွေကို အိန္ဒိယနိုင်ငံကနေ သဘောင်္နဲ့ ပို့ဆောင်နေပြီဖြစ်ပြီး ၊ နေစွမ်းအင် အင်ဂျင်နီယာ အမျိုးသမီးကြီး ၆ ဦးကတော့ စက်တင်ဘာ ၁၆ရက်နေ့က အိန္ဒိယ နိုင်ငံကနေ မြန်မာနိုင်ငံကို ပြန်လည်ရောက်ရှိလာတဲ့ အကြောင်း ရေဒီယို သြစတြေးလျသတင်းထောက် ဆုဝေက သတင်းပေးပို့ထားပါတယ်။
No comments:
Post a Comment