ရှမ်းပြည်နယ်အတွင်း အမျိုးသမီးတွေပါမကျန် မူးယစ်ဆေး သုံးစွဲလာပြီး ဒီလို သုံးစွဲမှု များပြားတာကနေ ပတ်ဝန်းကျင်ဆိုးကျိုးတွေ ဖြစ်နေတဲ့အတွက် သံဃာတော်အပါး ၅၀ နဲ့ ဒေသခံ ၅၀၀ တို့ ဖေဖော်ဝါရီလ ၃ ရက်နေ့မှာ ဆန္ဒပြခဲ့ကြတာ ဖြစ်ပါတယ်။
ဆေးသုံးသူများလာတဲ့အခါ အလုပ် ကြိုးစားလုပ်တဲ့သူ နည်းလာပြီး ခိုးယူမှုတွေ၊ လုယက်မှုတွေ ပိုဖြစ်လာမှာကိုစိုးရိမ်တဲ့အတွက် ကြိုတင်ကာကွယ်နိုင်အောင် ပြည်နယ်အစိုးရသာမက နိုင်ငံတော်အစိုးရကပါ ပူးပေါင်းဆောင်ရွက်ဖို့ တောင်းဆိုတဲ့ အနေနဲ့ ဆန္ဒပြတာ ဖြစ်တယ်လို့ ဦးဆောင် သံဃာတော်တစ်ပါးက မိန့်ကြားခဲ့ပါတယ်။
နမ့်ခမ်းမြို့အနီးပတ်ဝန်းကျင်မှာ မူးယစ်ဆေးဝါးထုတ်လုပ်နိုင်တဲ့ အပင်စိုက်ပျိုးမှုတွေ များပြားကြောင်းလည်း ပြောသွားခဲ့ပါတယ်။ ခုလို ဆန္ဒပြမှုတွေကြောင့် မူးယစ်ဆေးဝါး စိုက်ပျိုးမှု၊ ကုန်ကူးမှု လုပ်သူတွေက တိုက်ခိုက်မှာကို စိုးရိမ်တဲ့အတွက်လည်း နမ့်ခမ်းမြို့မှာ ဆန္ဒပြဖို့ စီစဉ်ခဲ့ကြတာလို့လည်း မိန့်ကြားခဲ့ပါတယ်။
နမ့်ခမ်းမြို့နယ်အတွင်း မူးယစ်ဆေးဝါးအသုံးပြုမှုတွေ များလာတဲ့အတွက် ဆန္ဒပြခဲ့ကြချိန်မှာပဲ ရန်ကုန်တိုင်း တောင်ဒဂုံမြို့နယ်အတွင်းရှိ နေအိမ်တစ်လုံးမှာ ရဲတွေက စိတ်ကြွဆေးပြား အလုံးရေ နှစ်သောင်းနီးပါးနဲ့ မူးယစ်ဆေးဝါးသုံးစွဲရာမှာ သုံးတဲ့ ပစ္စည်းတွေကို ဖမ်းဆီးရမိခဲ့တယ်လို့ သိရပါတယ်။
စိတ်ကြွဆေးပြား နှစ်သောင်းနီးပါးရဲ့ တန်ဖိုးဟာ ကျပ်ငွေ သန်း ၉၀ လောက် ရှိတယ်လို့ သိရပြီး ကတ်တမင်း အမှုန့်တွေပါ တွေ့ရှိထားပြီး တန်ဖိုးကျပ်သိန်း ၄၀ လောက်ရှိတယ်လို့လည်း မြစ်မခ သတင်းအရ သိရပါတယ်။
No comments:
Post a Comment