နယ်စပ်ကုန်သွယ်ရေး စည်းမျဉ်းတင်းကျပ်၊ တံစိုးလက်ဆောင်ပစ္စည်း ပေးနေရ

NEJ / ၄ ဇွန် ၂၀၀၉

နေပြည်တော် နယ်စပ် ကုန်သွယ်ရေး ဦးစီးဌာန (သွင်းကုန်) တွင် ညွှန်မှူး အသစ်များ နှင့် စည်းကမ်း သစ်များကြောင့် သွင်းကုန် လုပ်ငန်း ရှင်များ ကုန်သွယ်မှု အခက်ခဲ များနှင့် တွေ့ကြုံ နေရပြီး သွင်းကုန် လိုင်စင် အမြန် ရရှိရေး အတွက် တံစိုး လက်ဆောင်များ ပေးကမ်း နေ ကြရ သည်။

ဧပြီလကုန်ပိုင်းက စတင်တာဝန်ယူလာသည့် နယ်စပ်ကုန်သွယ်ရေး (သွင်းကုန်) ညွှန်မှူး ဗိုလ်မှူး ဆန်းနွယ်ဝင်းနှင့် ဒု-ညွှန်မှူး ဗိုလ်မှူး ဝင်းလွင်တို့သည် မကြာသေးမီကစ၍ သွင်းကုန်လိုင်စင် (၁) စောင်လျှင် ကုန်ပစ္စည်း အမျိုးအမည် (၂၅) ခုသာ ကန့်သတ်လိုက်သဖြင့် ထော်လာဂျီ၊ ကား၊ ဆိုင်ကယ်နှင့် စက်ဘီး အပိုပစ္စည်း တင်သွင်းလိုသူများ အမျိုးအမည်မျိုးစုံ ပါဝင်နေ၍ လိုင်စင်များ ခွဲလုပ်နေရသည်ဟု တရုတ်နယ်စပ် ကုန်သည်တဦးက ပြောသည်။

သတ်မှတ်ချက်စာရင်းတွင် မပါဝင်သည့် ကုန်အမျိုးအမည်များအား သွင်းလိုလျှင် (၃) လထက်ကျော်လွန်သည့် ပါမစ်များအား လက်မခံတော့ကြောင်း အဆိုပါကုန်သည်က ပြောသည်။

“Price Data base ဆိုတာ ရှိတယ်။ သွင်းကုန်ပစ္စည်းတန်ဖိုးတွေကို သတ်မှတ်ထားတာ။ အဲဒီထဲမှာ မပါတဲ့ ကုန်ဆိုရင် ဈေးနှုန်းတွေကို စိစစ်ဦးမယ်ဆိုပြီး အချိန်တလလောက် စောင့်ရရော။ အဲလို မစောင့်ရဖို့အတွက် အရင်က သွင်းဖူးတဲ့ လိုင်စင်အဟောင်းကို ပြပြီး သွင်းမယ်ဆိုရင် အရင်ညွှန်မှူးတွေဆို တနှစ်လောက်ကဟာကို ပြပြီး သွင်းလို့ရတယ်။ အခုက သုံးလထဲပေးတယ်။ ဈေးနှုန်းကို ကွင်းဆင်းစစ်ဆေးတဲ့အဖွဲ့ စိစစ်ပြီးတဲ့အထိ စောင့်နေရတယ်။ အချိန်နဲ့တပြေးညီ လုပ်လို့မရတော့ဘူး” ဟု ၎င်းက ပြောသည်။

လိုင်စင်လျှောက်လိုပါကလည်း ကုန်ပစ္စည်းဓာတ်ပုံများကို တင်ပြရပြီး ဓာတ်ပုံမကြိုက်လျှင် ပြန်တင်ခိုင်းခြင်း၊ အရောင်းအဝယ်စာချုပ်ပါ ထိုးထားသည့် လက်မှတ်များကို မကြိုက်၍ ပြန်လည်ပြင်ဆင်ခိုင်းခြင်း၊ ထောက်ခံစာများ ယူခိုင်းခြင်းတို့ကြောင့် လုပ်ငန်းကြန့်ကြာမှုများ ဖြစ်ပေါ်နေသည်ဟု ၎င်းက ဆက်လက်ရှင်းပြသည်။

၎င်းက “sale contract မှာ အင်္ဂလိပ်လို လက်မှတ်ထိုးထားလို့ လက်မခံဘူး။ တရုတ်လက်မှတ်နဲ့ တရုတ်ရဲ့ တံဆိပ်တုံးပါရမယ်တို့၊ အမှန် က အဲဒါတွေက အတုတွေပဲ။ လုပ်ငန်းသဘောအရသာ တင်နေကြတာပဲ။ အဲဒါကို ရစ်နေတာ။ ဟောလစ်တို့၊ မိုင်လိုတို့၊ အရက်ပုလင်းတို့၊ မုန့်ပုံးတို့ပါတဲ့ လက်ဆောင်ခြင်းတွေ ပေးကမ်းလိုက်ရင်တော့ အိုကေတယ်။ အဲလို ပေးကမ်းလာအောင်ပဲ ခွင်လုပ်နေသလားလို့ ယူဆရ တယ်။ သူတို့စည်းကမ်းတွေက ကုန်သွယ်ရေးကို မြန်ဆန်ချောမွေ့အောင် လုပ်နေတာမဟုတ်ဘဲ ဆုတ်ယုတ်ကျဆင်းအောင် လုပ်သလိုဖြစ် နေတာ” ဟု ပြောသည်။

ကုန်သွယ်ရေး ကမောက်ကမ ဖြစ်စေသည့် စည်းမျဉ်းများ တင်းကျပ်ရာတွင် ဗိုလ်မှူး ဝင်းလွင်သည် ညွှန်မှူးထက် ကျော်လွန် လုပ်နေ သည် ဟု လည်း မူဆယ်မှ ကုန်သွယ်ရေး အေးဂျင့်တဦးက ပြောသည်။

“ဗိုလ်မှူး ဝင်းလွင်ပဲ အဓိကလုပ်နေတာ။ ကျနော်တို့ အေးဂျင့်တွေလည်း လုပ်ရကိုင်ရတာ အတော်ခက်လာတယ်။ ကုန်သည်တွေကလည်း ကုန်တွေဝယ်ပြီး နယ်စပ်မှာ အောင်းထားရ၊ ငွေကမပေါ်၊ လိုင်စင်စောင့်ရတာလည်း စိတ်မရှည်လာတော့ တောလမ်းကိုပဲ လှည့်လုပ်လာ နေကြတာ” ဟု ပြောသည်။

နယ်စပ်ကုန်သွယ်ရေးမှ ပုံမှန်ကုန်သွယ်ရေး ကူးပြောင်းလုပ်ကိုင်ခဲ့ပြီးနောက်ပိုင်း တရုတ် ဓာတ်မြေသြဇာမှလွဲ၍ ဆောက်လုပ်ရေးပစ္စည်း၊ လယ်ယာသုံးစက်ပစ္စည်း၊ လူသုံးကုန်ပစ္စည်း၊ ဆေးနှင့်ဆေးပစ္စည်း၊ ယာဉ်အပိုပစ္စည်း စသည့် ကုန်ပစ္စည်းများကို ပုံမှန်ကုန်သွယ်ရေး (Normal Trade) အနေဖြင့် သွင်းနေကြရပြီး နေပြည်တော်တွင် သွင်းကုန်လိုင်စင် လျှောက်နေကြရသည်။