ABSDF နဲ့ အစိုးရတို့ရဲ့ နှစ်ပေါင်း ၂၅ နှစ်ကျော် ဖြစ်ပွားခဲ့တဲ့ တိုက်ပွဲကြောင့် ကျောင်းသားတပ်မတော်က ၇၀၀ နီးပါး သေဆုံးခဲ့ပြီး ၄၀၀ ကျော် ဒဏ်ရာရရှိခဲ့တယ်လို့ ABSDF က ထုတ်ပြန်ခဲ့ပါတယ်။
အဲဒါ့အပြင် ၁၉၉၁ ခုနှစ်နဲ့ ၁၉၉၂ ခုနှစ် ကာလအကြား ကချင်ပြည်နယ် ဝိုင်းမော်မြို့နယ်၊ ပါဂျောင်ဒေသမှာ ရှိတဲ့ ABSDF မြောက်ပိုင်းစခန်းမှာ အစုလိုက်အပြုံလိုက် သတ်ဖြတ်မှုကြောင့် ကျဆုံးခဲ့တဲ့ ကျောင်းသား ၄၀ နီးပါး အတွက်လည်း ဝမ်းနည်းခြင်း အထိမ်းအမှတ် ပြုလုပ်တာလည်း ဖြစ်ပါတယ်။
အခုလို ကျောင်းသားတပ်မတော်က ရဲဘော်တွေအတွက် ဝမ်းနည်းခြင်း အထိမ်းအမှတ်ပြုလုပ်တာနဲ့ ပက်သက်ပြီး ABSDF ကျောင်းသားတပ်ဦးရဲ့ ဥက္ကဌဟောင်း မိုးသီးဇွန်က အခုလို ပြောပါတယ်။
“အဓိကကတော့ကွယ် သေဆုံးသွားတဲ့ ရဲဘော်တွေကို တို့မမေ့ဘူး။ သူတို့က ကိုယ်တို့ရဲ့ ရဲဘော်တွေပါ။ နောက်တစ်ခုက သူတို့ကို အမှန်တရားအရ ဖြစ်စေချင်ပါတယ်ဆိုတဲ့ ရည်ရွယ်ချက်လေးပါပဲ။ ဒီတော်လှန်ရေးမှာ တို့သူတို့ကို တို့ရဲ့ဘော်တွေ လုပ်ဖော်ကိုင်ဖက်တွေအဖြစ် အသိအမှတ်ပြုပါတယ်ဆိုတဲ့အကြောင်းကို ဖြေသိမ့်ရတာပေါ့နော်။”
ABSDF မြောက်ပိုင်း ပါဂျောင်စခန်းမှာ ဖြစ်ပွားခဲ့တဲ့ အချင်းချင်း သတ်ဖြတ်မှုတွေအတွက်လည်း အမှန်တရား ပေါ်ပေါက်လာဖို့ အတက်နိုင်ဆုံး ဆောင်ရွက်သွားမယ်လို့ ဆိုပါတယ်။
အစုလိုက်အပြုံလိုက် သတ်ဖြတ်ခံရမှုတွေမှာ ကျူးလွန်ခဲ့သူတွေကို အရေးယူပေးဖို့ မြောက်ပိုင်းက ပြန်လည်လွတ်မြောက်လာတဲ့ ကျောင်းသားတွေက ၂၀၁၂ ခုနှစ် သြဂုတ်လမှာ တောင်းဆိုခဲ့သလို လက်ရှိ အစိုးရနဲ့ ညှိနှိုင်းနေတဲ့ ABSDF ကျောင်းသားတပ်ဦးက အဲဒီ ကိစ္စအတွက် စုံစမ်းစစ်ဆေးရေး ကော်မရှင်ဖွဲ့စည်းပြီး ဆောင်ရွက်နေတယ်လို့ သိရပါတယ်။
အဲဒီလို ကိစ္စတွေနဲ့ ပက်သက်ပြီး ပြည်တွင်း ပြည်ပမှာရှိနေတဲ့ ABSDF ကျောင်းသားတပ်ဦးရဲ့ ဥက္ကဌဟောင်းတွေ၊ ရဲဘော်ဟောင်းတွေက သုံးပွင့်ဆိုင် ဖြေရှင်းဖို့ တိုက်တွန်းပြောဆိုထားပါတယ်။
မနေ့က ပြုလုပ်ခဲ့တဲ့ ဝမ်းနည်းခြင်း အထိမ်းအမှတ်ပွဲမှာ မြောက်ပိုင်းဒေသက ကျောင်းသား ရဲဘော်ဟောင်းတွေ အများစုပါဝင်ပြီး အရင် ဥက္ကဌဟောင်းတွေလည်း တက်ရောက်ခဲ့တဲ့အကြောင်း ရေဒီယိုသြစတြေးလျသတင်းထောက် စူးရှက သတင်းပေးပို့ထားတာ ဖြစ်ပါတယ်။
No comments:
Post a Comment