ရန်ကုန်မြို့၊ သုဝဏ္ဍ အားကစားခန်းမမှာ မနေ့တုန်းက ပြုလုပ်တဲ့ လူဦးရေနှင့် အိမ်အကြောင်းအရာ သန်းခေါင်စာရင်း ကောက်ယူရေး လုပ်ငန်း သတင်းစာရှင်းလင်းပွဲမှာ ပြောဆိုလိုက်တာဖြစ်ပြီး မတ်လကုန်ကနေ ဧပြီလဆန်းအထိ ၁၂ ရက်တာ ကောက်ခံမှာဖြစ်ပါတယ်။
ဒီလို သန်းခေါင်စာရင်းကို နိုင်ငံတကာ စံချိန်စံနှုန်းတွေအတိုင်း ကောက်ခံမယ်ဆိုတဲ့ အကြောင်းနဲ့ ပတ်သက်ပြီးတော့ လူဝင်မှု ကြီးကြပ်ရေး ဝန်ကြီဌာနက ပြည်ထောင်စုဝန်ကြီး ဦးခင်ရီက အခုလို ပြောပါတယ်။
“သန်းခေါင်စာရင်းဟာ အချက် ၂ ချက် အပေါ် အခြေခံပါတယ်။ International Law and Standard နိုင်ငံတကာ စံချိန်စံနှုန်းကို အခြေခံပါတယ်။ Human Right လူ့အခွင့်အရေးကို အခြေခံပါတယ်။ နိုင်ငံတကာ စံချိန် စံနှုန်းဆိုတာတော့ အခု ကုလသမဂ္ဂ ကိုယ်တိုင် ဒါကျွန်တော်တို့ တူတူတွဲလုပ်တာ။ အဲဒီဟာတွေ အပေါ် မူတည်ပြီးတော့ ကျွန်တော်တို့က အဆင့်တိုင်းအဆင့်တိုင်း အဆင့်တိုင်းမှာ နိုင်ငံတကာက လက်ခံနိုင်မယ့် ပြည်တွင်း အခြေအနေနဲ့ ကိုက်ညီအောင် စီမံဆောင်ရွက်မယ် နောက်တစ်ပိုင်းက လူ့အခွင့်အရေး လူ့အခွင့်အရေးမှာ ကိုယ်ပိုင်ရွေးချယ်ပိုင်ခွင့်ရှိတယ်ဆိုတဲ့ အချက်ပေါ်မှာ ကျွန်တော်တို့ အခြေခံထားတယ်။ ဒီ ၂ ချက် အပေါ်မှာ အခြေခံပြီးတော့ လူဦးရေနဲ့ ဖွဲ့စည်းမှုကို ဖော်ထုတ်တယ်။”
သန်းခေါင်စာရင်းကောက်ခံတဲ့နေရာမှာ ပြည်တွင်း လုံခြုံရေးနဲ့ အမျိုးသား အကျိုးစီးပွား ထိခိုက်မှုတွေကိုလည်း ကာကွယ် လုပ်ဆောင်သွားမယ်လို့ဆိုပါတယ်။ အဲဒီလိုလုပ်ဆောင်တဲ့အခါမှာ အဖွဲ့အစည်းမဟုတ်တဲ့ နိုင်ငံတွင်းနေထိုင်သူ နိုင်ငံသားတွေ၊ နိုင်ငံခြားသားတွေနဲ့ ဘာအထောက်အထားမှ မပြနိုင်တဲ့ နိုင်ငံတွင်းနေထိုင်သူအားလုံးကို မေးခွန်း ၄၁ ခု မေးမြန်းကောက်ခံသွားမှာ ဖြစ်ပြီး စနစ်တကျ ဖွဲ့စည်းထားတဲ့ အဖွဲ့အစည်းတွင်း နေထိုင်သူတွေကိုတော့ မေးခွန်း ၁၀ ခု မေးမြန်း ကောက်ခံသွားမှာ ဖြစ်ပါတယ်။
၁၂ ရက်တာ ကောက်မှုကို လူအင်အား တစ်သိန်း ၂ သောင်းနဲ့ ဆောင်ရွက်သွားမှာ ဖြစ်ပြီး သန်းခေါင်စာရင်း ကောက်ခံမှုအရ လူဦးရေစာရင်းကို ၂၀၁၅ ခုနှစ် အစောပိုင်းမှာ တရားဝင်ကြေညာနိုင်မှာ ဖြစ်တယ်လို့ သိရပါတယ်။
အခုလို သန်းခေါင်စာရင်း ကောက်ခံမှုဟာ နှစ်ပေါင်း ၃၀ ကျော် ကာလအတွင်း ပထမဦးဆုံး ပြန်လည် ကောက်ခံတာ ဖြစ်ပြီး မြန်မာနိုင်ငံရဲ့ ပညာရေးကဏ္ဍ၊ ကျန်းမာရေးကဏ္ဍ၊ စီးပွားရေးကဏ္ဍ၊ လူဦးရေ အလိုက် ဖွံဖြိုးတိုးတက်ရေးလုပ်ငန်းတွေ၊ ဒေသဖွံဖြိုးရေး လုပ်ငန်းတွေကို ပိုမို ဆောင်ရွက်နိုင်မှာ ဖြစ်တယ်လို့ ကုလသမဂ္ဂ လူဦးရေ ရံပုံငွေ အဖွဲ့ရဲ့ မြန်မာပြည် ဌာနေ ကိုယ်စားလှယ်က ပြောပါတယ်။
တဆက်တည်းမှာပဲ အရင် ဗြိတိသျှ ခေတ်ကတည်းက ကောက်ခံထားတဲ့ တိုင်းရင်းသားလူမျိုးစာရင်းအရ တိုင်းရင်းသား ၁၃၅ မျိုးရှိခဲ့တဲ့အပေါ်မှာလည်း မှန်ကန်လာဖို့အတွက် အခုလို ကောက်ခံတာလည်း ဖြစ်တယ်လို့ ပြည်ထောင်စုဝန်ကြီးက ပြောဆိုခဲ့ပါတယ်။
“လူမျိုးနဲ့ ပက်သက်ပြီးတော့ ဘာတွေ ဖြစ်လာလဲဆိုတော့ ၁၃၅ မျိုးရှိပါတယ်။ ခင်ဗျားတို့က ဒီ ၁၃၅ မျိုးကို အသက်ဆက်သွင်းဖို့ အတွက် ဘာဖြစ်လို့ ဒီလို ကောက်နေတာတုန်း ၁၃၅ မျိုးက မမှန်ဘူး။ သက်ပုံတွေက မှားနေတယ်။ လီဆုကနေ လီဆူးဖြစ်နေတယ်။ မှားနေတယ်။ တစ်ချို့လူမျိုးတွေက မရှိဘူး။ အသစ်တွေ ပေါ်နေတယ်။ ဒီလို ပြောတယ်။ အဲဒီဟာတွေကို မှားတာတွေ မှန်တာတွေကို ပြင်ဖို့ ဒီလိုကောက်တာ ဖြစ်ပါတယ်။”
ရရှိလာတဲ့ စာရင်းတွေအပေါ်မှာ တိုင်းရင်းသားခေါင်းဆောင်တွေနဲ့ သက်ဆိုင်ရာ ဌာနဆိုင်ရာတွေက ညှိနှိုင်းပြီး ပြင်ဆင်ဆောင်ရွက် သွားမှာ ဖြစ်တယ်လို့လည်း ဆိုပါတယ်။
မြန်မာနိုင်ငံမှာ အိမ်ထောင်စုပေါင်း ၁၁ သန်းနဲ့ ကျေးရွာပေါင်း ၆ သောင်းကျော်ရှိပြီး လက်ရှိ လူဝင်မှု ကြီးကြပ်ရေးဝန်ကြီးဌာနရဲ့ ခန့်မှန်း တွက်ချက်မှုအရ လူဦးရေ ၆၁.၅၇ သန်းရှိပါတယ်။ ဒီသတင်းကို ရေဒီယို သြစတြေးလျ သတင်းထောက် စူးရှက သတင်းပေးပို့ထားတာဖြစ်ပါတယ်။
No comments:
Post a Comment