မြေအသုံးချမှု စီမံခန့်ခွဲရေးကော်မတီရုံးတွေကို အစိုးရ ရုံးစိုက်ရာ နေပြည်တော်မှာ အရင်ဆုံး ဖွင့်လှစ်လိုက်တာဖြစ်ပြီးတော့ စစ်တပ်က ပြန်လည်စွန့်လွတ်ပေးတဲ့ မြေတွေမှာ မိမိတို့ရဲ့ သိမ်းဆည်းခံ လယ်မြေတွေ ပါဝင်ခြင်း ရှိမရှိကို စုံစမ်းနိုင်အောင် စီစဉ်ပေးတာ ဖြစ်တယ်လို့ လည်း ဦးရဲထွဋ်က ပြောပါတယ်။
“အရင်တုန်းက စီမံကိန်းတွေ အတွက် ကျနော်တို့ သိမ်းခဲ့တဲ့ မြေတွေရှိတယ်။ အဲဒီထဲက မှ အချို့ဟာတွေကို လွှတ်တော် ကော်မရှင်ရဲ့ စုံစမ်းတွေ့ရှိချက်နဲ့ စုံစမ်းတယ်။ သက်ဆိုင်ရာ မြေတွေကို အသုံးပြုထားတဲ့ ဌာနတွေ အနေနဲ့ ပိုနေသလား မေးပါတယ်။ ပိုနေတယ်ဆိုတဲ့ မြေတွေကို သူတို့ က ပြန်အပ်ပေးတယ်။ ပိုနေတဲ့ မြေတွေကို ကျနော်တို့ က သူတို့ ပိုင်တယ်လို့ ပြောတဲ့ လူတွေကို အထောက်အထာ ပြန်တောင်းတဲ့ သဘောဖြစ်ပါတယ်။”
နေပြည်တော် မှာလိုပဲ အခြား မြို့နယ် နဲ့ ခရိုင်တွေ အလိုက်နောက်ပိုင်းမှာ အထွေထွေ အုပ်ချုပ်ရေး ဦးစီးဌာန ရုံးတွေကနေ တစ်ဆင့်မြေယာတွေ ပြန်လည် ရရှိရေး အတွက် ဆက်သွယ်နိုင်မှာ ဖြစ်တယ်လို့ သူ ကပြောပါတယ်။
လယ်ယာမြေ သိမ်းဆည်းခံထားရတဲ့ သူတွေကို သူတို့ သိမ်းဆည်းခံထားရတဲ့ မြေတွေ ပါမပါ ပြန်လည် စိစစ်နိုင်ဖို့ အတွက် မြေစာရင်းရုံးတွေရဲ့ တိုက်ရိုက်ဖုန်းနံပတ်တွေ ပေးထားပြီး ဆက်သွယ်နိုင်အောင် အစိုးရ ပိုင်သတင်းစာတွေမှာ ဖေဖော်ဝါရီလ ၂၀ ရက်နေ့ က တရားဝင် ဖော်ပြလာတာကိုလည်း တွေ့ရပါတယ်။
စစ်အစိုးရ လက်ထက်က မြေသိမ်းဆည်းမှုတွေ လုပ်တဲ့ နေရာမှာ ပုံစံ အမျိုးမျိုး နဲ့ သိမ်းယူ ခဲ့ပြီးတော့ လက်ရှိ အချိန်ကျမှ အထောက်အထားနဲ့ ပြန်လည်ပြီး မိမိမြေ ဖြစ်ကြောင်း ပြောရမဲ့ ဆိုတဲ့ အချက်ကိုတော့ အများက ဝေဖန်နေပါတယ်။
သမ္မတရဲ့ ပြေခွင့် ရှိသူ ဦးရဲထွဋ်ကတော့ အဲဒီလို့ ပြောဆိုချက်တွေကို အခုလို ပြန်လည် တုန့်ပြန်ပါတယ်။
“သူတို့က လုပ်ထုံး လုပ်နည်းတွေ ကို နားမလည်လို့ ၊ တပ်မတော် က သိမ်းထားရင် တပ်မတော်က ပြန်ပေးရမယ်၊ စက်မှု က သိမ်းထားရင် စက်မှု ၀န်ကြီးဌာနက တိုက်ရိုက် ပြန်ပေးရမယ်၊ လို့ ထင်တယ်။ အမှန် က မြေယာ သိမ်းမှု က အဲဒီလို မဟုတ်ဘူးဗျ။ နိုင်ငံတော်စီမံကိန်းတို့လို မြေတွေကို စီမံကိန်း အသုံးပြုဖို့ မြေယာ ခန့်ခွဲမှု ကို စလုပ်တာက အထွေထွေ အုပ်ချုပ်ရေး ဦးစီဌာနက စ လုပ်တာ။ အဲဒီလိုမျိုး ကျနော်တို့ က သွားတာ”
ပြည်နယ်နဲ့ တိုင်း ၁၄ ခု အပါအဝင် နေပြည်တော် ကောင်စီနယ်မြေထဲမှာ စစ်တပ်က သိမ်းယူခဲ့တဲ့ လယ်ယာမြေတွေထဲကနေ ဖေဖော်ဝါ၇ီလ ၆ ၇က်နေ့ အထိ ထပ်မံ စိစစ်ပြီး စွန့်လွှတ်ပေးမှုအပြီးမှာတော့ လယ်ယာမြေ ဧက ၁ သိန်းခွဲကျော်ကို စွန့်လွတ်ပြီးဖြစ်တယ်လို့ ကာကွယ်ရေး ၀န်ကြီးဌာန မှ ထုတ်ပြန်ကြေညာခဲ့တဲ့အကြောင်း ရေဒီယိုသြစတြေးလျ သတင်းထောက် မဝေစန္ဒာကျော်က သတင်းပေးပို့ထားပါတယ်။
No comments:
Post a Comment