နိုင်ငံတကာမှာ ဘာသာရေးလွတ်လပ်ခွင့် ရှိဖို့ဟာ အမေရိကန် လုံခြုံရေးအတွက်လည်း အရေးကြီးတယ်လို့ ဆိုပါတယ်။
သမိုင်းကို ပြန်ကြည့်လိုက်မယ်ဆိုရင် လူ့အခွင့်အရေးနဲ့ ဘာသာရေးလွတ်လပ်ခွင့်တွေ ပေးထားတဲ့ နိုင်ငံတွေမှာ ပိုမို ငြိမ်းချမ်းပြီး ပိုပြီးတိုးတက်အောင်မြင်တာ တွေ့နေရတယ်လို့ အမေရိကန်နိုင်ငံမှာ တစ်နှစ်တစ်ကြိမ် ကျင်းပတဲ့ နံနက်စာ ဝတ်ပြုဆုတောင်းပွဲမှာ အမေရိကန် သမ္မတ ဘားရက်အိုဘားမားက ပြောခဲ့တာပါ။
ဒီလို လွတ်လပ်ခွင့်တွေ မပေးထားတဲ့ နိုင်ငံတွေမှာဆိုရင် မတည်ငြိမ်မှုတွေ၊ အကြမ်းဖက်မှုတွေနဲ့ အစွန်းရောက်မှုတွေ ပိုဖြစ်စေတယ်လို့လည်း ဆိုပါတယ်။
တချို့နိုင်ငံတွေရဲ့ လုပ်ဆောင်မှုတွေ အမေရိကန်နိုင်ငံရဲ့ အဆင့်အတန်းမမှီပေမယ့် တခါတလေတော့ ဒီသတ်မှတ်ချက်တွေကို ဘေးချိတ်ပြီး ဆက်ဆံမှုမျိုးတွေ လုပ်ရတယ်လို့လည်း ပြောလိုက်ပါတယ်။
ဥပမာအားဖြင့် တရုတ်နိုင်ငံမှာ ခရစ်ယာန်တွေ၊ တိဘက်ဗုဒ္ဓဘာသာဝင်တွေနဲ့ ဝိဂါမွတ်စလင်တွေကို လွတ်လပ်ခွင့်မပေးထားတာကို သိနေတဲ့ကြားက အမေရိကန်က တရုတ်နိုင်ငံနဲ့ စီးပွားရေးတွေ လုပ်နေတာမျိုး ရှိတယ်လို့ ပြောပါတယ်။
ပြီးတော့ မြန်မာနိုင်ငံမှာလည်း ခရစ်ယာန်တွေနဲ့ မွတ်စလင်တွေ လွတ်လပ်မှု အခွင့်အရေးတွေ နည်းပါးကြောင်း သိတဲ့ကြားကပဲ ကမ္ဘာမှာ မြန်မာက အထီးကျန်နေတာကို ရပ်တန့်စေတဲ့အတွက် မြန်မာသမ္မတ ဦးသိန်းစိန်နဲ့ တွေ့ဆုံမှု လုပ်ခဲ့တယ်လို့ သမ္မတ ဘားရက်အိုဘားမားက ပြောပါတယ်။
ဘာသာရေး ယုံကြည်မှုကို အကြောင်းပြုပြီး တခြားလူကို နာကြင်စေတာဟာ ကိုယ်နဲ့ဘုရားကြားရှိနေတဲ့ ဆက်ဆံမှုကို ဖျက်ဆီးရာ ရောက်တဲ့အကြောင်း၊ အပြစ်မဲ့သူတွေကို သတ်ပြီး ဘုရားရဲ့အလို လုပ်ဆောင်လို့ မရနိုင်တဲ့အကြောင်း ဒီလုပ်ရပ်တွေဟာ ဘုရားရဲ့ အလိုတော်ကို ဆန့်ကျင်သစ္စာဖောက်ရာ ရောက်တယ်လို့ ပြောပါတယ်။ အဲဒါအပြင် နိုင်ဂျီးရီးယား၊ တောင်ဆူဒန်နဲ့ ဆူဒန်နိုင်ငံမှာ လွတ်လပ်စွာ ကိုးကွယ်ခွင့်ပေးဖို့နဲ့ အရှေ့အလယ်ပိုင်းဒေသမှာလည်း လွတ်လပ်ခွင့်တွေ ပေးဖို့ တောင်းဆိုလိုက်ပါတယ်။
အမေရိကန်နိုင်ငံမှာ နံနက်စာဆုတောင်းပွဲ အခမ်းအနားကို တစ်နှစ်တစ်ကြိမ် ကျင်းပလေ့ရှိပြီး အဲဒီပွဲအတွင်း ဥပဒေပြုသူတွေ၊ အစိုးရအရာရှိတွေ တက်ရောက်လေ့ရှိပါတယ်။
No comments:
Post a Comment