Wednesday, January 18, 2012

အာဏာသိမ်းမှု ထပ်မဖြစ်နိုင်ဟု ဦးရွှေမန်း ပြော

ခင်ဦးသာ on January 18, 2012


မြန်မာ နိုင်ငံသည် ဒီမို ကရေစီ စနစ်သို့ အသွင် ကူးပြောင်း နေပြီ ဖြစ်သည့် အတွက် စစ်တပ်မှ အာဏာ သိမ်းယူမှု ထပ်မံ မဖြစ်ပေါ် နိုင် တော့ဟု ပြည်သူ့ လွှတ်တော် ဥက္ကဋ္ဌ သူရ ဦးရွှေမန်း က ပြောဆို လိုက်သည်။

ထို့အပြင် ဒီမိုကရေစီနိုင်ငံ တနိုင်ငံ ဖြစ်ရန်အတွက် အချိန်မည်မျှကြာဦးမည်ကို အတိအကျ ပြောဆိုရန် ခက်ခဲသေးသော်လည်း ဒီမိုကရေစီ နည်းလမ်းမှလွဲ၍ တခြားရွေး ချယ်စရာလမ်းမရှိကြောင်းလည်း ဗိုလ်ချုပ်ကြီးဟောင်း တဦးဖြစ်သူ ဦးရွှေမန်း က AFP သတင်း ဌာန နှင့် နေပြည်တော်၌ တနင်္လာနေ့က တွေ့ဆုံစဉ် ပြောဆိုခဲ့သည်။

မြန်မာ စစ်တပ် သည်၂၀၀၈ ဖွဲ့စည်းပုံ အခြေခံဥပဒေ အရ အာဏာ အပြည့် အ၀ ရရှိ ထားပြီး ဖြစ်သည့် အတွက် အာဏာ သိမ်းယူ ရန် မလိုအပ် တော့ကြောင်း ဒီမို ကရေစီနှင့် ဖွံ့ဖြိုး တိုးတက်ရေး အင်အားစု၊ သုတေသနနှင့် မှတ်တမ်း ဌာန၏ တာဝန်ခံ၊ သုတေသီ ဦးဌေး အောင်က ပြောသည်။

“ဒီဖွဲ့စည်းပုံ ဥပဒေ ရှိသမျှ စစ်တပ်က အာဏာ သိမ်းမှာ မဟုတ်ဘူး၊ ဒီတော့ စစ်ဗိုလ်ချုပ် ဟောင်းတွေ ပြောတာ မှန်တာပေါ့၊ ဒီလို ရထား တဲ့ အာဏာကို လျှော့ချဖို့ ဖွဲ့စည်းပုံ ပြန်ပြောင်းဖို့ ကြိုးစား ကြည့်ပါလား၊ အဲဒီ အခါ စစ်တပ်က ဘယ်လို တုံ့ပြန် မယ်ဆိုတာ ထင်ထင် ရှားရှား တွေ့ရပါ လိမ့်မယ်”ဟုလည်း ဦးဌေးအောင် က ဆိုသည်။

အမျိုးသား ဒီမိုကရေစီ အဖွဲ့ချုပ်(NLD) ခေါင်းဆောင် ဒေါ်အောင်ဆန်း စုကြည်ကမူ ဒီမိုကရေစီ အသွင် ကူးပြောင်း နေစဉ် ကာလ အတွင်း စစ်တပ် ထဲရှိ အပြောင်း အလဲ လုပ်ရန် ဆန္ဒ မရှိသူ တချို့က အာဏာပြန် သိမ်းနိုင် သည်ဟု တချို့က ယူဆ နေကြကြောင်း၊ သို့သော် ထိုသို့ဖြစ် မလာရန် မျှော်လင့် ထားကြောင်း ပြီးခဲ့သည့် ရက်ပိုင်းက ပြင်သစ် နိုင်ငံခြားရေး ၀န်ကြီးနှင့် တွေ့ဆုံစဉ် ပြော ဆို ခဲ့သည်။

မြန်မာ နိုင်ငံ၌ ဖဆပလ အစိုးရ လက်ထက် ၁၉၅၈ ခုနှစ်တွင် တကြိမ်၊ ၁၉၆၂ တွင် တကြိမ်၊ ၁၉၈၈ တွင် တကြိမ် အာဏာ သိမ်းမှုများ ဖြစ်ပေါ် ခဲ့ပြီး စစ်တပ် အတွင်း၌ ၎င်းတို့ အချင်းချင်း အာဏာ သိမ်းမှုများ အကြိမ်ကြိမ် ရှိခဲ့ကြောင်း သိရသည်။

ထိုသို့ ဖြစ်ပေါ် ခဲ့ခြင်းသည် ဖွဲ့စည်းပုံ ဥပဒေ၌ စစ်တပ်၏ အခန်းကဏ္ဍကို ထည့်သွင်း မထားသည့် အတွက် ကြောင့်ဟု အကြောင်း ပြ၍ ၂၀၀၈ ဖွဲ့စည်း ပုံ၌ စစ်တပ်၏ တရားဝင် အာဏာသိမ်း ယူနိုင်မှုကို ထည့်သွင်း ရေးဆွဲထား သည်ဟု ဦးဌေးအောင်က ပြောဆို သည်။

၂၀၀၈ ဖွဲ့စည်းပုံ အခြေခံ ဥပဒေ အခန်း (၁၁) တွင် နိုင်ငံ တော်၏ အချုပ်အခြာ အာဏာ လက်လွှတ် ဆုံးရှုံး ရမည့် အခြေ အနြေ ဖစ်ပေါ်ပါ က နိုင်ငံ တော် သမ္မတသည် အမျိုးသား ကာကွယ် ရေးနှင့် လုံခြုံရေး ကောင်စီနှင့် ညှိနှိုင်းပြီး အရေးပေါ်ကာလ ကြေညာ၍ ကာကွယ်ရေး ဦးစီး ချုပ်ကို နိုင်ငံတော် အာဏာ လွှဲအပ် နိုင်ကြောင်း ထည့်သွင်း ရေးဆွဲ ထားသည်။

မြန်မာစစ်တပ် ကာကွယ်ရေးဦးစီးချုပ် ဗိုလ်ချုပ်ကြီး မင်းအောင်လှိုင်သည်လည်း မကြာခင်က ထိုင်းနိုင်ငံသို့ ရောက်ရှိစဉ် မြန်မာ နိုင်ငံ၌ အာဏာသိမ်းမှု ဖြစ်မလာနိုင်တော့ကြောင်း ထိုင်း ၀န်ကြီးချုပ် မစ္စ ယင့်လပ် ရှင်နာဝပ်နှင့် တွေ့ဆုံရာ၌ ပြောဆိုခဲ့သည်။

ဗိုလ်ချုပ်ကြီး မင်းအောင်လှိုင် ထိုင်း နိုင်ငံသို့ ရောက်ရှိစဉ် မစ္စ ယင့်လပ် ရှင်နာဝပ်ကို ဇန်န၀ါရီလ ၁၀ ရက်က ထိုင်း နိုင်ငံ အစိုးရ အိမ်တော် ၌ တွေ့ဆုံ နှုတ်ဆက်ကြောင်း အစိုးရ သတင်းစာ များတွင် ဖော်ပြ ထားသည်။

ပြည်ထောင်စု လွှတ်တော် နာယက နှင့် အမျိုးသား လွှတ်တော် ဥက္ကဋ္ဌ ဗိုလ်ချုပ်ဟောင်း ဦးခင်အောင်မြင့် ကလည်း စစ်တပ်က အာဏာ ပြန်လည် သိမ်းယူမှု မပေါ် ပေါက်နိုင် တော့ကြောင်း ပြီးခဲ့သည့် လအနည်း ငယ်က သတင်း မီဒီယာ များကို ပြောဆို ခဲ့ဖူး သည်။

No comments: