မြန်မာ နိုင်ငံသို့ နိုင်ငံ တကာမှ လက်နက် ရောင်း ချမှုများ ရပ်ဆိုင်း ရေး၊ မတရား ချုပ်နှောင် ခံနေ ရသော ဒေါ်အောင်ဆန်း စုကြည် လွတ်မြောက်ရေး တို့ အတွက် ကြိုးပမ်း ဆောင်ရွက်ရန် နိုဗဲလ် ငြိမ်းချမ်းရေး ဆုရှင် ၉ ဦးက ကုလသမဂ္ဂ အထွေထွေ အတွင်းရေး မှူးချုပ် ဘန်ကီမွန်းကို ယမန်နေ့က တိုက်တွန်း လိုက်သည်။မစ္စတာ ဘန်ကီမွန်းသို့ ပေးပို့သည့် အိတ်ဖွင့် ပေးစာတွင် စစ်အစိုးရက မြန်မာ နိုင်ငံအတွင်း မငြိမ်မသက် မှုများ ဖြစ်ပေါ် စေရန် ဖန်တီး လျက်ရှိသည် ဟုလည်း ဖော်ပြ ထားသည်။ မစ္စတာ ဘန်ကီမွန်းက ဒေါ်အောင်ဆန်း စုကြည် လွတ်မြောက်ရေး အတွက် မကြာခဏ တောင်း ဆိုသော်လည်း စစ်အစိုးရက မကြား ချင်ယောင်ဆောင်နေ သည်ဟု နိုဗဲလ် ငြိမ်းချမ်းရေး ဆုရှင် များက ဝေဖန် လိုက်သည်။
၎င်းတို့ ဖော်ပြသည့် စိုးရိမ်ချက်များကို ကုလသမဂ္ဂ လုံခြုံရေး ကောင်စီ အဖွဲ့ဝင် နိုင်ငံများနှင့် ဆွေးနွေးရန်လည်း တိုက်တွန်းလိုက်သည်။
မြန်မာနိုင်ငံသို့ လက်နက် တင်ပို့ ရောင်းချ နေသော နိုင်ငံများမှာ တရုတ်၊ ဆားဗီးယား၊ ရုရှား၊ ယူကရိန်း၊ အိန္ဒိယ စသည့် နိုင်ငံများ ဖြစ် သည်။
မြန်မာနိုင်ငံ အပါအဝင် လူ့အခွင့်အရေး ချိုးဖောက်နေသည့် နိုင်ငံများကို လက်နက် ရောင်းချခြင်း မပြုရန် အပြည်ပြည် ဆိုင်ရာ လွတ်ငြိမ်း ချမ်းသာခွင့် အဖွဲ့ (AI) ကလည်း လွန်ခဲ့သည့် ၂ နှစ်က တောင်းဆိုထားသည်။
မြန်မာပြည်သို့ လက်နက် အမြောက်အများ ရောင်းချနေကြခြင်းကြောင့် မြန်မာပြည်သူတို့ ဖိနှိပ်ခံနေရခြင်းဖြစ်သည်ဟု AI အဖွဲ့က ဆိုသည်။ အခြား လူ့အခွင့်အရေးလှုပ်ရှားသူများကလည်း အလားတူ တောင်းဆိုထားသည်။
လက်နက် ရောင်းချမှု ရပ်ဆိုင်းရေး လှုံ့ဆော် ကြိုးပမ်းချက်များမှာ လောလောဆယ် အချိန်တွင် အလုပ် မဖြစ်သေးကြောင်း စစ်ဘက် အရပ်ဘက် သုတေတီ ကိုဝင်းမင်းက သုံးသပ်သည်။
“ကုလသမဂ္ဂ လုံခြုံရေး ကောင်စီ တခုလုံးက ဆုံးဖြတ်ချက် ချမယ် ဆိုရင်တောင် တရုတ်နဲ့ ရုရှား နိုင်ငံတို့က ဗီတိုအာဏာ ရှိနေတော့ လုပ်ရတော့ ခက်တာပေါ့။ ဒါပေမဲ့ အနည်းဆုံးတော့ တရုတ်နဲ့ ရုရှားနိုင်ငံတို့အပေါ် ဖိအားတခုတော့ ဖြစ်တာပေါ့” ဟု ကိုဝင်းမင်းက ဧရာဝတီကို ပြောသည်။
မြန်မာအစိုးရ၏ လူ့အခွင့်အရေး ချိုးဖောက်မှုများကြောင့် ဥရောပ သမဂ္ဂ၊ အမေရိကန် ပြည်ထောင်စု တို့က ၁၉၈၈ ခုနှစ်မှ စတင်ပြီး မြန်မာနိုင်ငံသို့ လက်နက် တင်ပို့ ရောင်းချခြင်းများကို ရပ်ဆိုင်းထားသည်။
မြန်မာပြည်သို့ လက်နက်ရောင်းချမှု ပိတ်ပင်ရေး လှုံ့ဆော်လိုက်သော နိုင်ငံတကာမှ နိုဗဲလ် ငြိမ်းချမ်းရေး ဆုရှင်များသည် Peacejam အမည်ရှိ ဖောင်ဒေးရှင်းကို ဖွဲ့စည်းပြီး လှုပ်ရှားနေခြင်း ဖြစ်သည်။ ၁၉၉၆ တွင် ဖွဲ့စည်းထားသည့် အဆိုပါ အဖွဲ့သည် ဒေါ်အောင်ဆန်း စုကြည် အပါအ၀င် နိုဗဲလ် ငြိမ်းချမ်းရေး ဆုရှင် ၁၂ ဦးဖြင့် စုစည်းထားခြင်း ဖြစ်သည်။
No comments:
Post a Comment