ကွန်းအိန်
“အောင်ပြီ၊ အောင်ပြီ” “ဒါထရွိုင်းမြို့သားတွေရဲ့ အောင်ပွဲကွ”
အရမ်း ပတာ ဆုတ်ခွာ ထွက်ပြေး သွားသော ရန်သူ၏ တပ်များကို ကြည့်ယင်း ထရွိုင်းမြို့ သားများ အားပါး တရ ကြွေးကျော် လိုက်သော အသံမှာ မိုးမြေ သိမ့်သိမ့် ဆူညံ သွားသည်။ ရန်သူတပ်မှ ကျန်ရစ်ခဲ့သည့် သစ်သား မြင်းရုပ် တစ်ခုကို မြို့တွင်းသို့ ဆွဲယူ ယင်း အကြီး အ ကျယ် ပျော်ရွှင် နေခဲ့ကြ သည်။
ထိုနေ့တစ်နေ့လုံး ထရွိုင်းမြို့သူမြို့သားများ အရက်သေရည်
များ ချောင်းစီးမတတ် အောင်ပွဲခံအပျော်ကြူးခဲ့ကြသည်။ ထိုဥာဥ့်နက်၌ ထရွိုင်းမြို့သားများ အပျော်လွန်၍ အိပ်မော ကျနေချိန်၊ သစ်သားမြင်းရုပ် အံဝှက်အတွင်းမှ ရန်သူများလှို့ဝှက်ဆင်းလာခဲ့သည်။ အပမ်းလွန်နေသော အစောင့်များကို ရှင်းလင်း၍ မြို့ဝင်တံခါးကို ဖွင့်လိုက်သောအခါ ရန်သူများ ထုထည်အလုံးအရင်းနှင့် မြို့တွင်းသို့ လှိမ့်ဝင်လာခဲ့သည်။
“ရန်သူ ရန်သူ” “ရန်သူ ရန်သူ”
အိပ်ပျော်နေရာမှနိုးထလာသော အစောင့်ဝင်များ အလုံးရင်းနှင့် ဝင်လာသောရန်သူကို တွေ့ရ၍ အော်ဟစ်လိုက်သည်။ သို့သော်နောက်ကျသွားချေပြီး၊ ထိုးခုတ်သံ၊ အော်ဟစ်သံတို့ ကမ္ဘာပျက်သည့်အလား အလောင်းချင်းထပ်၍ သွေးစီး ကြောင်းများမှာ စွေးစွေးနီလျှက် မီးတောက် မီးလျှံများကြား၌ ထရွိုင်းမြို့ကြီး ပြာကျသွားခဲ့သည်။ ကဗျာဆရာဟိုးမား၏ အိလိယက် လင်္ကာထဲမှ ထရွိုင်းမြို့၏ ပျက်စီးခန်းဖြစ်သည်။ ရန်သူကိုအထင်သေးမိသော ထရွိုင်းမြို့သားများ၏ သံဝေဂ ရဘွယ်အဖြစ်အပျက်ဖြစ်သည်။ သစ်သားမြင်းရုပ်ကို မရှာဖွေ မစစ်ဆေးမိသော အသေးအဖွဲ အမှားတစ်ခုကြောင့် ထရွိုင်းမြို့ကြီးတခုလုံး ပြာကျသွားခဲ့သော ဖြစ်စဉ်မှာ သမိုင်းတွင် အထင်ကရ အဖြစ်အပျက်တစ်ခု ဖြစ်သည်။
စစ်အာဏာရှင်များအနေနှင့် လက်နက်ကိုင် တော်လှန်ရေးအဖွဲ့အစည်းများကို တွေ့ဆုံဆွေးနွေးအပြီး စီးပွားရေးလုပ်ခွင့် များ၊ နယ်စပ်ဒေသဖွံ့ဖြိုးရေးအစီအစဉ်များ ချမှတ်ပေးခဲ့သည်။ စီပွားရေးလုပ်ခွင့်လုပ်ငန်းများတွင် ယစ်မူးနေအောင် ပြုလုပ်ခဲ့သည်။ မြို့ကြီးပြကြီးတွင် နေထိုင်လာကြသောအခါ ယခင်လုပ်ငန်း တာဝန်ကျရာဒေသသို့ အလာကျဲသွားသည်။ အုပ်ချုပ်ကွပ်ကဲမှုများ လျော့ရဲလာသည်။ ဤကား စစ်အစိုးရမှ ချပေးသော ထရိုဂျန်မြင်းရုပ်ကို ဆွဲယူလာသည်နှင့် မခြား ပေ။ လုံးဝလက်နက်ချရေးတည်းဟူသော စစ်အစိုးရပေါ်လစီနှင့် နိုင်ငံရေးနည်းလမ်းဖြင့် တွေ့ဆုံဆွေးနွေးလိုသော ငြိမ်းအဖွဲ့တို့၏ ဆန္ဒမှာဖြောင့်ဖြောင့်ကြီး ဆန့်ကျင်နေသည်။ တွေ့ဆုံဆွေးနွေးရေးဟူသော မျှော်လင့်ချက်မှာ ရွှေပင်လယ် ကာဆီး၍ နီးနိုင်မည်မထင်တော့ပါ။
တချို့ငြိမ်းအဖွဲ့များအနေနှင့်လည်း ယူတိုးပီးယားအတွေးအမြင်များနှင့် လုံချာလပတ်လည် လိုက်နေသည်ကိုလည်း တွေ့ရသည်။ ဆာသောမတ်မိုး ရေးထားသော ယူတိုးပီးယားဝတ္တုတွင် ဤသို့တွေ့ရသည်။ ယူတိုးပီးယားနိုင်ငံမှ စုပေါင်း အလုပ်လုပ်ပြီး လိုအပ်သလောက်သာ ယူသည်။ ချမ်းသာကြွယ်ဝသည်။ ကျန်းမာရေး ပညာရေးကိစ္စအာလုံး အခမဲ့ပင်။ ပြီးပြည့်စုံသော နိုင်ငံတစ်ခုဖြစ်သည်ဟု ဝတ္တုတွင် ဖော်ပြထားသည်။ ထိုဝတ္တုကိုအကြောင်းပြု၍ ယူတိုးပီးယား လစ်ဇင်ကို စိတ်ကူးယဉ်ဝါဒဟု နိုင်ငံရေးဘန်းစကားတခု ပေါ်ပေါက်ခဲ့သည်။ နိုင်ငံတော်၏ အာဏာအရပ်ရပ်ကို သိမ်းယူထားသော စစ်တပ်ကို မိမိတို့အမျိုးသားရ ပိုင်ခွင့် အခွင့်အရေးတောင်းဆိုခြင်းသည် စိတ်ကူးယဉ်မှုတစ်ခုဟု မဆိုချင်သော်လည်း ဖြစ်နိုင်ချေနည်းပါးသည်ဟု မြင်ပါသည်။
ယ္ခုပစ္စပ္ပုန်အခြေအနေတွင် တချို့လက်နက်ကိုင်အဖွဲ့အစည်းများကို ရွေးကောက်ပွဲဝင်ရန်၊ တချို့အဖွဲ့အစည်းများကို နယ်စပ်စောင့်တပ်အသွင် ပြောင်းရန် စည်းရုံးနေသည်ကို တွေ့ရသည်။ နိုင်ငံရေးအသိနဲပါး၍ စီးပွားရေးအတွက်သာ မြင်သောတချို့ကား မဇ္ဇျိမပဋိပဋာလမ်းစဉ်ကို လိုက်နေကြသည်။ တချို့ကာ မိမိအဖွဲ့၏ ရည်မှန်းချက်ကို အတိမ်းအစောင်း မခံ မားမားမတ်မတ် ရပ်တည်နေကြသည်ကိုလည်း တွေ့ရသည်။ စစ်အစိုးရအနေနှင့်လည်း မုန့်အိုးကင်းကပ်စားသည့် ဗျူဟာအတိုင်း အနားသားများကို တဖြည်းဖြည်းစားပြီးမှ အလယ်သားများကို မုချစားမည်မှာ အသေအချာပင်။ တဖွဲ့ကျဆုံးချင်းသည် မိမိတို့အတိုက်အခံအဖွဲ့များ ခြေ၊ လက်ချောင်းများ ဖဲ့ထုတ်လိုက်သည့်ပမာ ဖြစ်သည်ကို တွေးသင့်သည်။ မိမိတို့တွင် ဆက်စပ်မှုရှိသည်။ အဖွဲ့အစည်း၏အခြေအနေနှင့် အဖွဲ့ကြီးအခြေအနေတို့သည်လည်း အကျိုးအကြောင်းဖြစ်စဉ်အရတခုနှင့် တခုအမှီသဟဲပြုနေရပြီး ဆက်စပ်မှုလည်းရှိနေကြသည်။
မြန်မာ့ဒီမိုကရေစီရေးခေါင်းဆောင် ဒေါ်အောင်ဆန်းစုကြည်အပါအဝင် ဒီမိုကရေစီခေါင်းဆောင်များ ၈၈ မျိုးဆက် ကျောင်းသားခေါင်းဆောင်များ၊ အနုပညာရှင်များကို ဖမ်းဆီးအရေးယူ ထောင်ဒဏ်ချမှတ်နေခြင်း၊ လက်နက်ကိုင် အဖွဲ့အစည်ျးားကို လက်နက်ကိုင်ချရန်ဖိအားပေးခြင်း စသည့်လုပ်ရပ်များသည် ဒီမိုကရေစီနိုင်ငံသို့ ဦးတည်မည့်လုပ်ရပ် နှင့် ဖြောင့်ဖြောင့်ကြီး ဆန့်ကျင်နေပေသည်။ ကြားထဲမှ မရှိတာနဲ့ စာယင် ရှိတာပိုကောင်းတယ် ဟူသော လက်ဟောင်း နိုင်ငံရေးသမားများ၏ ပွဲလန့်တုံးဖျာခင်းအယူအဆသည်လည်း စစ်အစိုးရ အကြိုက်တွေ့နေသည်။ လက်ရှိစစ်အစိုးရ၏ လုပ်ရပ်များသည် ဒီမိုကရေစီသို့ ဦးတည်နေသည်ဟု မည်သည့်ပြောင်းလဲမှုကိုတွေ့၍ ပြောဆိုနိုင်သနည်း။
စစ်အစိုးရအနေနှင့် လာမည့် ၂၀၁၀ ရွေးကောက်ပွဲတည်းဟူသော ထရိုဂျန်မြင်းကို ထားရစ်ခဲ့ပေပြီး။ မြို့အတွင်းဆွဲယူ၍ ယူတိုးပီးယားအတွေးဖြင့် နှစ်သိမ့်နေတော့မည်လော။ အနာဂတ်နိုင်ငံတော်၏ ကောင်းကျိုးဆိုးကျိုးအားလုံးသည် ယင်းအပေါ်၌သာ တည်မှီနေသည်။ စစ်ကျွန်ဘဝ သက်ဆိုးရှည်စေရန် စစ်အစိုးရအနေနှင့် နည်းလမ်းပေါင်းစုံနှင့် ထိုးနှက်တိုက်စစ်ဆင်နေသည်။ စစ်အာဏာရှင်တို့၏ ရေရှည်ပရိယယ်ကို မမြင်ပါက၊ ကြိုတင်ပြင်ဆင်မှုမရှိပါက--
“ရန်သူ၊ ရန်သူ - ရန်သူ”
အဆက်မပြတ်ဝင်ရောက်လာသော ရန်သူကိုတွေ့၍ အော်ဟစ်ခဲ့သော်လည်း နောက်ကျသွားခဲ့ချေပြီး။ သွေးသံရဲရဲ၊ မီးလျှံတဟုန်းဟုန်းနှင့် ထရွိုင်းမြို့၏ ပျက်စီးမှုမြင်ကွင်းကို မြင်ယောင်နေသေးသည်။ အတိတ်၏ ဖြစ်ရပ်များလည်း ပစ္စုပ္ပန်သို့လည်း လာနိုင်သည်ကို သတိချပ်ရန်လိုသည်။ ယ္ခုလည်းရန်သူကတဖြည်းဖြည်းနီးကပ်လာပေပြီး။ ကျွန်ပ်တို့ ဘာလုပ်မည်နည်း။ ဘာလုပ်နိုင်မည်နည်း။ ဘာလုပ်သင့်သနည်း။
No comments:
Post a Comment