NEJ / ၁၉ မေ ၂၀၀၉
မတရား ဖမ်းဆီး အမှုဆင် တရားစွဲ ဆိုခြင်း ခံနေ ရသည့် ကမ္ဘာ့ငြိမ်းချမ်းရေး နိုဘယ်လ်ဆုရှင် မြန်မာ့ ဒီမိုကရေစီ ခေါင်းဆောင် ဒေါ် အောင် ဆန်းစုကြည်နှင့် နိုင်ငံရေး အကျဉ်း သားများ လွတ်မြောက်ရေး အတွက် ဒေသ တွင်းရောက် မြန်မာ နိုင်ငံ သားများ ယနေ့ နံနက် က ထိုင်း - မြန်မာ နယ်စပ် မဲဆောက်မြို့တွင် ဘာသာ ပေါင်းစုံ ၀တ်ပြု ဆုတောင်းပွဲ တရပ် ကျင်းပသည်။
ဆုတောင်းပွဲတွင် မယ်တော်ဆေးခန်းတာဝန်ခံ ဒေါက်တာစင်သီယာမောင်က “အမျိုးသားပြန်လည်သင့်မြတ်ရေး၊ မြန်မာပြည်ငြိမ်းချမ်းရေး၊ ဒီမိုကရေစီရရှိရေးအတွက် ဆောင်ရွက်နေတဲ့ မြန်မာပြည်သူတွေနဲ့ နိုင်ငံတကာက လေးစားအားထားဂုဏ်ယူတဲ့ ဒေါ်အောင်ဆန်းစုကြည်နဲ့ နိုင်ငံရေးအကျဉ်းသားတွေရဲ့ လွတ်မြောက်ရေးကို အမြဲတမ်းပဲ မျှော်လင့်နေပါတယ်။ ဒါကြောင့် ဒီဆုတောင်းပွဲကို ကျင်းပရတာဖြစ်တယ်” ဟု ပြောသည်။
နအဖစစ်အစိုးရ၏ နေအိမ်အကျယ်ချုပ်ချခံထားရစဉ် ဒေါ်အောင်ဆန်းစုကြည်နေအိမ်အတွင်း အမေရိကန် နိုင်ငံသားတဦး ရေကူးဝင်ရောက်ခဲ့ပြီးနောက် နအဖစစ်အစိုးရက ဒေါ်အောင်ဆန်းစုကြည်ကို နေအိမ်အကျယ်ချုပ် စည်းမျဉ်းစည်းကမ်းချိုးဖောက်သည်ဟုဆိုကာ နိုင်ငံတော်ကို နှောက်ယှက်ဖျက်စီးလိုသော ဘေးအန္တရာယ် ပုဒ်မ (၂၂) ဖြင့် တရားစွဲဆိုထားသည်။
ဒေါ်အောင်ဆန်းစုကြည်နှင့် အတူနေသည့် နိုင်ငံရေးလုပ်ဖော်ကိုင်ဖက် ဒေါ်ခင်ခင်ဝင်းနှင့် သမီးတို့သည်လည်း ယခုလ (၁၄) ရက်က ဒေါ်အောင်ဆန်းစုကြည်၏နေအိမ်မှ အင်းစိန်ထောင်ရှိ အထူးတရားရုံးသို့ ခေါ်ဆောင်သွား ခံရပြီးနောက် အဆိုပါပုဒ်မဖြင့် တရားစွဲဆိုပြီး နေအိမ်ပြန်ခွင့်မပြုပဲ အင်းစိန်ထောင်တွင် တရားရင်ဆိုင်နေရသည်။
ဒေါ်အောင်ဆန်းစုကြည်ကို ၁၉၈၉ ခုနှစ် ဇူလိုင်လမှ ၁၉၉၅ ထိတကြိမ်၊ ၂၀၀၀ ပြည့်နှစ် စက်တင်ဘာမှ ၂၀၀၂ ခုနှစ် မေလအထိတကြိမ်၊ ၂၀၀၃ ခုနှစ် မေလမှ ယခုအချိန်ထိ နအဖစစ်အစိုးရက ဖမ်းဆီးထိန်းသိမ်းထားသည်။ ဒေါ်အောင်ဆန်းစုကြည်ကို အကျယ်ချုပ်ချထားခွင့် ကုန်ဆုံးရန် (၂၁) ရက် အလိုတွင် ယခုကဲ့သို့ ဖမ်းဆီးတရားစွဲဆို ခြင်းဖြစ်သည်။
ဆုတောင်းပွဲတက်ရောက်လာသည့် CDC အလယ်တန်းကျောင်းမှကျောင်းသားမောင်အောင်က “ကျနော်တို့နိုင်ငံမှာ ဒီလိုအာဏာရှင်တွေရှိနေသရွေ့ အများပြည်သူ တိုးတက်ကောင်းမွန်မယ့် အခြေအနေကို ဘယ်လိုမှ မရောက်နိုင်ဘူး။ တိုင်းပြည်ကောင်းအောင်လုပ်တဲ့လူကို နှိပ်ကွပ်၊ အကြောင်းအမျိုးမျိုးပြပြီး ထောင်ထဲထည့်ထားတယ်” ဟု ပြောသည်။
ဆာသူးလေအထက်တန်းကျောင်းမှ မမော်မော်ကလည်း “မြန်မာ့ရုပ်မြင်သံကြားမှာ ဘုရားတည် ကျောင်းဆောက် နေ့တိုင်းလုပ်နေတဲ့ မြန်မာစစ်ဗိုလ်ချုပ်တွေ ဘုရားကိုလိမ်ညာပြီး ဘာလို့ခုတုံးလုပ်နေရတာလဲ။ဒေါ်အောင်ဆန်းစုကြည် ကိစ္စကို ကြည့်တာနဲ့ သူတို့မရိုးသားဘူးဆိုတာ သိသာတယ်။ မြန်မာပြည် ဒီမိုကရေစီရစေချင်တယ်။ ဒါမှ သမီးတို့နိုင်ငံ မှာ မတရားမှုတွေပပျောက်ပြီး နိုင်ငံတိုးတက်ကြီးပွားမှ လူအများကောင်းစားမယ်” ဟု ပြောသည်။
ဆုတောင်းပွဲတက်ရောက်လာသူများက နအဖသည်နိုင်ငံရေးပြဿနာများကိုမဖြေရှင်းဘဲ ယခုကဲ့သို့ ဒေါ်အောင်ဆန်းစုကြည်အား ဖမ်းဆီးတရားစွဲဆိုခြင်းမှာ လုံးဝမလုပ်သင့်သည့်ကိစ္စဖြစ်သောကြောင့် ပြင်းထန်စွာ ကန့်ကွက်ပြောဆိုခဲ့ကြပြီး ဒေါ်အောင်ဆန်းစုကြည်နှင့် နိုင်ငံရေးအကျဉ်းသားများ လွတ်မြောက်ရေးအတွက် ဆက်လက်လုပ်ဆောင်သွားမည်ဟု သိရသည်။
ရာနှင့်ချီ၍ တက်ရောက်လာကြသူများသည် ဒေါ်အောင်ဆန်းစုကြည်နှင့် မြန်မာ့နိုင်ငံရေး အကျဉ်းသားများ လွတ်မြောက်ရေးအတွက် မိမိတို့ကိုးကွယ်ယုံကြည်ရာ ဘာသာအလိုက် ဖရောင်းတိုင်မီးထွန်းကာ ၀တ်ပြု ဆုတောင်းခဲ့ကြသည်။
No comments:
Post a Comment