NEJ /၁ မေ ၂၀၀၉
ကမ္ဘာ့ ကျန်းမာရေး အဖွဲ့ (ဒဗလျူအိပ်ခ်ျအို) က ၀က်တုပ်ကွေး ကူးစက်ရောဂါ ဖြစ်ပွားမှု အခြေအနေ ကို အဆင့် (၄) မှ အဆင့် (၅) သို့ တိုးမြှင့် သတ်မှတ် လိုက်သည်။
ကမ္ဘာ့နိုင်ငံအသီးသီးသို့ အလျင်အမြန် ကူးစက်ပျံ့နှံ့နိုင်သည့်အဆင့်အဖြစ် ကမ္ဘာ့ကျန်းမာရေးအဖွဲ့မှ ညွှန်ကြားရေးမှူးချုပ် ဒေါက်တာမာဂရက်ချမ်းက ဧပြီ (၂၉) ၌ ဂျနီဗာတွင် ကြေညာလိုက်ခြင်းဖြစ်ပြီး ၀က်တုပ်ကွေးကို နိုင်ငံအားလုံး အရေးတကြီးကိစ္စအဖြစ် အလေးထားကြရန်လည်း တိုက်တွန်းလိုက်သည်။
လူလူချင်းကူးစက်နိုင်သည့်အဆင့် (၄) အဖြစ် ဧပြီ (၂၇) တွင် သတ်မှတ်ခဲ့ရာမှ ယခုကဲ့သို့ အဆင့် (၅) သို့ တိုးမြှင့်လိုက်ခြင်းဖြစ်သည်။
တုပ်ကွေးအဖျားရောဂါ ဗိုင်းရပ်ပိုးများသည် မျိုးရိုးဗီဇ အပြောင်းအလဲမြန်ဆန်ပြီး ကြိုတင်ခန့်မှန်းနိုင်သည့် အခြေအနေ မရှိကြောင်း၊ ၀က်တုပ်ကွေး ဖြစ်ပွားရာ နိုင်ငံများမှ ကျန်းမာရေးဆိုင်ရာ အာဏာပိုင်များအား ကမ္ဘာ့ကျန်းမာရေး အဖွဲ့အနေဖြင့် ၀က်တုပ်ကွေးရောဂါ၏ ဇစ်မြစ်နှင့်ပတ်သက်၍ လောလောဆယ် ထုတ်ပြန်ပြောဆို နိုင်ခြင်း မရှိသေးကြောင်းလည်း ကြေညာချက်တွင် ပါရှိသည်။
နိုင်ငံအားလုံးအနေဖြင့် ၀က်တုပ်ကွေး ကူးစက်ရောဂါကို ကြိုတင်ကာကွယ်မှုအစီအစဉ်များ လုပ်ဆောင်ထားရန် လည်း ကမ္ဘာ့ကျန်းမာရေးအဖွဲ့က နှိုးဆော်ထားသည်။
ယခုအခါ ကမ္ဘာ့ကျန်းမာရေးအဖွဲ့၏ ယမန်နေ့ တရားဝင်ထုတ်ပြန်ချက်အရ နိုင်ငံ (၁၁) နိုင်ငံတွင် ၀က်တုပ်ကွေး ရောဂါပိုး A(H1N1) လက္ခဏာဖြစ်ပွားနေသူပေါင်း (၂၅၇) ဦးရှိပြီး အမေရိကန်ပြည်ထောင်စုတွင် သေဆုံးသူ (၁) ဦး အပါအ၀င် (၁၀၉) ဦးရှိကြောင်း၊ မက္ကဆီကိုနိုင်ငံတွင် သေဆုံးသူ (၇) ဦးအပါအ၀င် (၉၇) ဦးရှိသည်ဟု သိရသည်။.
ထို့အပြင် သြစတီးယား၌ (၁) ဦး၊ ကနေဒါ၌ (၁၉) ဦး၊ ဂျာမနီ၌ (၃) ဦး၊ အစ္စရေး၌ (၂) ဦး၊ နယ်သာလန်၌ (၁) ဦး၊ နယူးဇီလန်၌ (၃) ဦး၊ စပိန်၌ (၁၃) ဦး၊ ဆွစ်ဇာလန်၌ (၁) ဦးနှင့် ဗြိတိန်နိုင်ငံ၌ (၈) ဦးတို့တွင် ရောဂါပိုးလက္ခဏာများ တွေ့ရသည်ဟု ကမ္ဘာ့ကျန်းမာရေးအဖွဲ့ ၀က်ဘ်ဆိုက်တွင် ဖော်ပြသည်။
ဝက်တုပ်ကွေးသည် ၀က်များတွင်ဖြစ်သည့် Influenza ဗိုင်းရပ်စ်အမျိုးအစား A(H1N1) ကြောင့် ဖြစ်သည့် အသက်ရှူလမ်း ကြောင်းပိုင်း ဆိုင်ရာ ရောဂါဖြစ်သည်။
ယင်းရောဂါသည် လူများတွင် ဖြစ်လေ့ဖြစ်ထမရှိသော်လည်း ၀က်များနှင့်တိုက်ရိုက် နီးနီးကပ်ကပ် နေထိုင်သူတို့ (ဥပမာ ၀က်မွေးမြူရေးခြံ အစရှိသည့်..) တွင် ဖြစ်ပွားသည်ကို တွေ့ရှိရာမှတဆင့် လူလူချင်းကူးစက်သည့်အဆင့်သို့ ရောက်ရှိကြောင်း ကျန်းမာရေးသတင်းထုတ်ပြန်ချက်များတွင် ဖော်ပြသည်။
No comments:
Post a Comment