မောင်အေး(နိရဉ္စရာ) ရခိုင်ပြည်နယ် ဘူးသီးတောင်မြို့နယ်အတွင်းရှိ စပါးကြိတ်စက် ပိုင်ရှင်များထံမှ အစိုးရ ဌာနဆိုင်ရာ (၅) ခုက အခွန်သုံးဆခန့် တိုးမြှင့်ကောက်ခံသည့်အတွက် စက်ပိုင်ရှင်များမှာ အခက်အခဲဖြစ်နေ ကြသည်ဟု သတင်း ရရှိသည်။လွန်ခဲ့သည့် ၂၀၀၈-၂၀၀၉ ဘဏ္ဍာရေး နှစ်က ဌာနဆိုင်ရာ (၄) ခုက ဆန်စက် တလုံးစီမှ အခွန်ငွေ ၄၇၅၀၀ ကျပ် ကောက်ခံခဲ့သော်လည်း ၂၀၀၉- ၂၀၁၀ ခုနှစ်တွင် ဌာနဆိုင်ရာ (၅) ခုထိ တိုးလာပြီး ကျပ်ငွေ ၁၄၇၀၀၀ အထိ တိုးမြှင့်ကောက်ခံနေသည်ဟု ဘူးသီးတောင်မြို့မှ ဆန်စက်ပိုင်ရှင် တဦးက နိရဉ္စရာသို့ ပြောသည်။
“၂၀၀၈- ၂၀၀၉ မှာ ပြည်အတွင်းအခွန်ကို ၁၅၀၀၀ ကျပ်၊ မယကကို ၂၅၀၀၀ ကျပ်၊ စက်မှု(၁) ၀န်ကြီးဌာနကို ၁၂၀၀၀ ကျပ်၊ ကုန်သွယ် လယ်ယာကို ၅၀၀၀ ကျပ် -- စုစုပေါင်း ၅၇၀၀၀ ကျပ်အထိ ဆန်စက် တလုံးကို ပေးသွင်းခဲ့ရပါတယ်။”
၎င်းပြင်သူက “ ၂၀၀၉- ၂၀၁၀ မှာတော့ သုံးဆထိ တိုးလာပြီး ပြည်တွင်း အခွန်က ၄၀၀၀၀ ကျပ်၊ မယကက ၆၀၀၀၀ ကျပ်၊ စည်ပင် ကို ၁၅၀၀၀ ကျပ်၊ ကုန်သွယ်လယ်ယာက ၂၀၀၀၀ ကျပ်၊ စက်မှု(၁)ကို ၁၂၀၀၀ ကျပ် သွင်းရမယ်လို့ အမ်ိန့်ထုတ် ထားပါတယ်။ စုစုပေါင်း ၁၄၇၀၀၀ ကျပ်အထိ တိုးမြှင့် တောင်းခံထားပါတယ်။”ဟု ပြောသည်။
ယခု ကောက်ခံသည့် အခွန်ငွေကို ဒီဇင်္ဘာလ လ ၁၀ ရက်နေ့ နောက်ဆုံး ပေးသွင်းရန် ပြည်တွင်း အခွန်က ဒီဇင်္ဘာလ ၂ ရက်နေ့က စာထုတ်ခဲ့ပြီး မပေးသွင်းသူများကို ရာဇသတ် ပုဒ်မ ၁၇၄ ဖြင့် ပြည်တွင်းအခွန် ဦးစီးဌာနမှ တရားစွဲဆိုမည်ဟု သူကပြောသည်။
ရခိုင်ပြည်နယ် အနှံ့အပြားတွင် တည်ရှိသော ဆန်စက်များမှာ အသေးစား ဆန်စက်များဖြစ်ပြီး စပါးတင်း ၁၀၀ ကြိတ်ခွဲလျှင် ၁၅၀၀၀ ကျပ်သာ ရရှိပြီး ဆီဈေးမှာလည်း ကြီးမြှင့်နေသဖြင့် ဆန်စက်ပိုင်ရှင်များ အနေဖြင့် တွက်ခြေ မကိုက် ဖြစ်နေသည်ဟု သိရသည်။
ဘူးသီးတောင်မြို့နယ်တွင်ဆန်စက်အလုံးပေါင်း ၂၀၀ ခန့်ရှိပြီး အများစု ဆန်စက် ပိုင်ရှင်များမှာ ဌာနဆိုင်ရာ (၅) ခုက တောင်းသော အခွန်ငွေကို မပေးသွင်းနိုင်သဖြင့် တရားစွဲဆိုမည်ကို စိုးရိမ်သောကြောင့် စပါးရာသီတွင် စပါး မကြိတ်နိုင်ဘဲ တိမ်းရှောင်နေကြသည်ဟု သိရှိရသည်။
No comments:
Post a Comment