ဉာဏ်မောင်
စီးပွားရေးသမားများက တိုင်းအာဏာပိုင်များနှင့်ပေါင်း၍ ဈေးရောင်းပွဲတော်များ ပြုလုပ်ကိုယ်ကျိုးရှာနေခြင်းကြောင့် ရပ်ကွက်အတွင်း နေထိုင်သူများ မကျေမနပ် ဖြစ်နေကြသည်။
ပုသိမ်မြို့၊ ကမ်းနားလမ်းတလျှောက်ကို ပိတ်၍ ယခု ၃ ရက်နေ့မှ စတင်ကာ ဈေးရောင်းပွဲတော် ပြုလုပ်နေသည့်အတွက် လမ်းပိတ်ဆို့မှုများဖြစ်ပြီး သွားလာရေးအခက်ခဲများ ဖြစ်နေကြောင်း ရပ်ကွက်အတွင်း နေထိုင်သူတဦးက ပြောသည်။
“အဲဒါက လုပ်ငန်းရှင်တဦးက ကန်ထရိုက်ယူပြီးတော့ လေလံသဘောမျိုးနဲ့ ပေးလိုက်ပြီးလုပ်တာ၊ (တယက) ဥက္ကဌကို သိန်း ၅၀ ပေးလိုက်တာ၊ စီးပွားရေးသမားတွေနဲ့ အာဏာပိုင်တွေပေါင်းပြီးလုပ်စားတာ၊ လမ်းမကြီးကို တခြမ်းပိတ်ပြီး လုပ်လိုက်တာ၊ ထုံးစံမှမရှိတာ၊ ပုသိမ်မှာ ဒါမျိုးတခါမှ မလုပ်ဖူးဘူး” ပြောသည်။
အဆိုပါ ဈေးရောင်းပွဲတော်ဆိုင်ခန်းများ နေရာချထားမှုကို တိုင်းအေးချမ်းသာယာရေးနှင့်ဖွံ့ဖြိုးရေးကောင်စီရုံးမှ ဝန်ထမ်းများကိုယ်တိုင်လာရောက်၍ မြေနေရာများ တိုင်းပြီးချပေးသွားခြင်းဖြစ်ကြောင်း ၎င်းက ဆက်ပြောသည်။
“တကယ်က ဈေးရောင်းပွဲတော်ဆိုတာ အမြို့မြို့အနယ်နယ်မှာ ကွင်းထဲမှာဘဲလုပ်ကြတာ၊ ဒီနေရာမှာလုပ်တာ စဉ်းစားစရာပေ့ါ၊ ဘာကြောင့် ဒီနေရာကိုမှ ရွေးတယ်ဆိုတာ မသိဘူး၊ စတိတ်ရှိုးတွေလုပ်တော့ လူနေအိမ်တွေ ရှေ့မှာဆိုတော့ ဘယ်သူမှလဲ အိပ်မရဘူး၊ မြို့လယ်ကြီးမှာ ရွက်ဖျင်တွေထိုး အဝတ်စုတ်တွေကာနဲ့ ကွမ်းယာဆိုင်တွေဖွင့် ဆိုက်ကားတွေကလည်း ပိတ်နေတော့ ကိုယ့်အိမ်ကိုယ် ဘယ်လိုပြန်တက်ရမလဲ ဆိုတာတောင် မသိတော့ဘူး” ဟု အဆိုပါ ရပ်ကွက်သားက ဆက်ပြောသည်။
ယင်း ဈေးရောင်းပွဲတော်မှာ ၉ ရက်နေ့ညက ပြီးဆုံးသွားသော်လည်း ညဈေးတန်း ဆက်လက်ဖွင့်မည်ဟု သတင်းများ ထွက်ပေါ်နေသည့်အတွက် ရပ်ကွက်အတွင်း နေထိုင်သူများမှာ မကျေမနပ်ဖြစ်နေကြောင်း ၎င်းက ဆက်ပြောသည်။
No comments:
Post a Comment