သျှမ်းသံတော်ဆင့် သောကြာနေ့၊ 04 ဒီဇင်ဘာလ 2009
သျှမ်းပြည် တပ်မတော် မြောက်ပိုင်း အပစ်ရပ် SSA တပ်ဖွဲ့အား ဒေသ ကာကွယ်ရေး တပ်အဖြစ် အသွင် ပြောင်းရန် တပ်ရင်း သုံးရင်း အတွက် စုစုပေါင်း အင်အား ၁၀၀၀ ၀န်းကျင် ပေးပို့ရမည်ဟု ရာဇသံ ပေးထားကြောင်း သျှမ်းပြည် မြောက်ပိုင်း သတင်း ရပ်ကွက်က ပြောပါသည်။
နိုဝင်ဘာ ၁၄ ရက်နေ့တွေ့ဆုံပွဲက အသွင်ကူးပြောင်းဖို့ SSA က လူစာရင်းပေးလိုက်တယ်။ ဗမာစစ်ခေါင်းဆောင်တွေ ပရိယာယ်လဲများ ကတိလဲမတည်ဘူး။ SSA ဘက်က ဘယ်လိုဆက်လုပ်မလဲဆိုတာ လူထုအရမ်း စိတ်ဝင်စားတယ်၊ ကချင် တို့ ၀ တို့လိုဘဲလား နိုင်ငံရေးကစားကွက်က မတူကြဘူးမဟုတ်လား။ ခိုင်မာပြတ်သားရင်တော့ တမျိုး” - ဟု သျှမ်းပြည် မြောက်ပိုင်းနေ နိုင်ငံရေးအကဲခတ်တဦးက ပြောပါသည်။
ဒီဇင်ဘာ ၂၀၀၉ အကုန် နောက်ဆုံးထား နယ်ခြားစောင့်တပ် ဒေသကာကွယ်ရေးတပ်အပြီးပြောင်းရန် စစ်အစိုးရရာဇသံ အတိုင်း ယခုလ ၁ ရက်နေ့က စာရင်းပေးသွင်းပြီးသည့်တပ်ဖွဲ့များအား SSA စိန်ဂျော့ ဌာနချုပ်သို့ ဒီဇင်ဘာ ၁၅ ရက်နေ့ နောက်ဆုံးထားရောက်ရန် ဗဟိုကော်မတီက ဆင့်ခေါ်ထားကြောင်း အမည်မဖေါ်လိုသည့် မူဆယ်မြို့ခံတဦးက သျှမ်းသံတော် ဆင့်အား ဤကဲ့သို့ပြော၏။
“ဒေသကာကွယ်ရေးတပ်ပြောင်းဖို့ တပ်ရင်း ၃ ရင်းအတွက် SSA က လူအင်အား ၂၀၀ ကျော်လောက်ဘဲပေးထား တယ်လေ။ ဒါကို ဗမာတပ်က အနည်းဆုံး တပ်ရင်းတစ်ရင်း အင်အား ၃၀၀ စာရင်းပို့ခိုင်းနေတယ်။ အဲကြောင့် စာရင်းထဲမှာ ပါတဲ့ တပ်မှူးတပ်ဖွဲ့ တွေကို ဌာနချုပ် စိန်ဂျော့ကို အရေးပေါ်ခေါ်ထားတာ”
နယ်ခြားကာကွယ်ရေးတပ်/ ဒေသကာကွယ်ရေးတပ်/ ပြည်သူ့စစ် အဖြစ်ပြောင်းပြီး စစ်အစိုးရ ကာကွယ်ရေးဝန်ကြီးဌာန၏ တိုက်ရိုက် လက်အောက်ခံဖြစ်ရန်အတွက် သျှမ်းပြည်တပ်မတော် မြောက်ပိုင်းအပစ်ရပ်တပ်ဖွဲ့တွင် အလွန်ဆုံး ၂၀% ခန့်သာ လက်ခံသဘောတူကြောင်း၊ စာရင်းသွင်းထားသည့်အတိုင်း တပ်ရင်း ၃ ရင်းတွင် တစ်ရင်း လျှင် ၆၀-၇၀ ခန့်သာရှိသဖြင့် တပ်ရင်းတရင်း ၂၉၆ ယောက် ဗမာတပ် မတော် အရာရှိ ၃၀ ဖြစ်ဖို့ အင်အားရာချီထပ်မံဖြည့်ရမည်ဖြစ် သည်ဟု ပြောပါသည်။
ထို့ကြောင့် စစ်အစိုးရအလိုအတိုင်း အင်အားဖြည့်ရေးပြဿနာ၊ လက်မခံသည့် တပ်ဖွဲ့ဝင်များအတွက် ဖြေရှင်းရမည့် ပြဿနာများ မြောက်ပိုင်းသျှမ်းပြည်တပ်တော်ကအနည်းနှင့်အမြန် ဖြေရှင်းရမည်ဖြစ်ကြောင်း - ရွှေလီမြစ်ဝှမ်းမှ ပုဂ္ဂိုလ်က ဆက်ပြောပြ၏။
“ကျုပ်တို့လက်နက်မရှိတဲ့သူတောင် မကြောက်ဘူး၊ ခင်ဗျားတို့က သေနတ်ကိုင်ပြီး ဘာကြောင့် ကြောက်နေရသလဲ” - ဟု တိုင်းရင်းသား နိုင်ငံရေးပါတီတခုကလည်း အပစ်ရပ်များအပေါ် မကြာမီကဝေဖန်ခဲ့ဖူး၏။
နယ်ခြားစောင့်တပ် BGF နှင့် ဒေသကာကွယ်ရေးတပ် (ပြည်သူ့စစ်) HGF အဖြစ်အသွင်ပြောင်းရန် နအဖက ဒက်လိုင်းဖြင့် အကြိမ်ကြိမ်ခေါ်ယူဖိအားပေးသော်လည်း အမျိုးသားဒီမိုကရက်တစ်မဟာမိတ်တပ်မတော် NDAA-ESS မိုင်းလားတပ်ဖွဲ့၊ ၀ ပြည် သွေးစည်းရေးတပ်ဖွဲ့ UWSA၊ ကချင်လွတ်လပ်ရေးတပ်မတော် KIA နှင့် သျှမ်းပြည်တပ်မတော်မြောက်ပိုင်း SSA တပ်ဖွဲ့ တို့က လက်မခံဘဲ အကြောင်းပြချက်အမျိုးမျိုးဖြင့် အချိန်ဆွဲ ငြင်းဆန်ခေါင်းခါထားခဲ့သည်။
No comments:
Post a Comment