အထက်အမိန့်အရ ဌာနဆိုင်ရာပေါင်းစုံမှ နိုင်ငံတော်အလံအား ချက်ချင်းဖြုတ်ချ မီးရှို့ခိုင်းသည့်အတွက် ဝန်ထမ်းများ မကျေမနပ်ဖြစ်နေကြသည်။ဧရာဝတီတိုင်း၊ ဘိုကလေးမြို့ပေါ်ရှိ ဌာနဆိုင်ရာ ရုံးများတွင် လွှင့်တင်ထားသည့် နိုင်ငံတော်အလံအား ယနေ့ မွန်းလွဲ(၃) နာရီအတွင်း အပြီးမီးရှို့ခိုင်းခြင်းဖြစ်ကြောင်း ဝန်ထမ်းတဦးက ပြောသည်။
“နိုင်ငံတော်အလံတွေကို ဖြုတ်ချပြီး မီးရှို့ဖျက်ဆီးတယ် (၃) နာရီထိုးမှာ အပြီးလုပ်ရမယ်ဆိုပြီး အရေးပေါ်လုပ်တာ၊ အားလုံးက စိတ်မကောင်းကြဘူး၊ အလံတွေကို ဘာကြောင့်ဖြုတ်ချ မီးရှို့ခိုင်းတယ်ဆိုတာ မသိရဘူး” ဟု ပြောသည်။
ယင်းကဲ့သို့ အလံများကို ချက်ချင်းဖြုတ်ချမီးရှို့ပြီးနောက် သက်ဆိုင်ရာအာဏာပိုင်များက ပေးလာမည့် အလံမရမချင်း အခြားမည်သည့်အလံမှ တင်ခြင်းမပြုရန် အမိန့်ထုတ်ပြန်ထားကြောင်း ၎င်းက ဆက်ပြောသည်။
“သူတို့ပေးမဲ့အလံ မရောက်မချင်း ဘယ်အလံမှ မတင်ရဘူး အထက်ကအမိန့်လို့ ပြောတယ်၊ အလံကို ဖြုတ်ချပြီး ခဏသိမ်းဆိုတော်သေးတယ်၊ အခုလို လုပ်ခိုင်းတာ လုံးဝကို နားမလည်ဖူး” ဟု ပြောသည်။
အခု မီးရှို့ဖျက်ဆီးခဲ့သည့် နိုင်ငံတော်အလံသည် အနီရောင်နောက်ခံ ဘက်ဝဲဘက်ထောင် အပြာရောင်လေးထောင့်ကွက်ပါရှိပြီး အဆိုပါ အပြာရောင်လေးထောင်ကွက်အလယ်အတွင် အဖြုရောင် စပါးနှံခွေးသွားစိပ်တို့ကို ကြယ်ဖြူ (၁၄)လုံးက ၀န်းရံထားသည့် အလံတော်ဖြစ်သည်၊ ၎င်းအလံတော်ကို ၁၉၇၄ ခုနှစ် အခြေခံဥပဒေအရ ၁၉၇၄ ခုနှစ် ဖေဖေါ်ဝါရီလ (၃)ရက်နေ့က စတင်ပြီး ယနေ့ မနက်ပိုင်းအထိ အသုံးပြုခဲ့သည့် အလံတော်ဖြစ်သည်။
အခုရက်ပိုင်းအတွင်းမှာ အမှတ် (၁) စက်မှူဝန်ကြီးဌာနက ရန်ကုန်အထည်ချုပ်စက်ရုံတွေကို စစ်အစိုးရရဲ့ ၂၀၀၈ အခြေခံဥပဒေတွင် အတည်ပြုထားသည့် နိုင်ငံတော်အလံသစ်ကို ပြောင်းလဲအသုံးပြုဖို့ အလံတစ်သိန်းခွဲ အချုပ်ခိုင်းခဲ့ပြီး အောက်တိုဘာလ (၂၁) ရက်နေ့ အပ်ဖို့လည်း ညွန်ကြားထားကြောင်း သတင်းတွေထွက်ပေါ်ခဲ့သည်။
No comments:
Post a Comment