နိရဉ္စရာ
ရခိုင်ပြည်နယ် မောင်တောမြို့နယ် ခမောင်းဆိပ်ကျေးရွာတွင် ပါတီနှစ်ခု မဲဆွယ် စည်းရုံးစဉ် ရိုက်ပွဲ ဖြစ်ပွား သဖြင့် ယခုအခါ ပုဒ်မ ၁၄၄ ကို ထုတ်ထားပြီး ၅ ယောက်ထက် ပိုမစုရဟု ရွေးကောက်ပွဲ ကော်မရှင်က အမိန့်ထုတ်ထားသည်ဟု သတင်း ရရှိသည်။
ရွေးကောက်ပွဲကော်မရှင်နှင့် နီးစပ်သူ တစ်ဦးက“ လွန်ခဲတဲ့ စနေနေ့ ညနေပိုင်းမှာ အမျိုးသား ဖွံ့ဖြိုး တိုးတက်ရေး ဒီမိုကရက်တစ် ပါတီက ခမောင်းဆိပ် ကျေးရွာမှာ မဲဆွယ် စည်းရုံးနေစဉ် ကြံ့ဖွတ်ပါတီက လာနှောင့်ယှက်တဲ့ အတွက် တဖွဲ့နဲ့ တဖွဲ့ အကြီးအကျယ် ရိုက်ပွဲ ဖြစ်ပွားခဲ့ပါတယ်။ အဲဒီနေ့က စပြီး ခရိုင်ရွေးကောက်ပွဲ ကော်မရှင်က ပုဒ်မ ၁၄၄ ထုတ်ပြီး ၅ ယောက်ထက် ပိုမစုရ ဆိုပီး အမိန့်ထုတ်ထားပါတယ်” ဟု ပြောသည်။
ခမောင်းဆိပ် ကျေးရွာမှာ မောင်တောမြို့မှ မြောက်ဘက် မိုင် ၂၀ အကွာတွင် တည်ရှိပြီး မွတ်ဆလင် ဘာသာဝင် အများစု နေထိုင်သော ကျေးရွာ ဖြစ်ကြောင်း သိရသည်။
“ အခု လက်ရှိ အခြေအနေမှာ မောင်တောမြို့နယ်မှာ ရှိတဲ့ ပြည်သူတွေက အပြင်ပေါ်ဆိုရင် ကြံ့ဖွတ် ပါတီကို အားပေးတယ်လို့ ထင်ရပေမယ့် တကယ်တန်း မွတ်ဆလင် လူထု ထောက်ခံနေတာက အစိုးရနဲ့ မဆိုင်တဲ့ အမျိုးသားဖွံဖြိုးရေး တိုးတက်ရေး ဒီမိုကရက်တစ် ပါတီ ဖြစ်ပါတယ်။ ဒါကို ကြံ့ဖွတ်ပါတီက သိနေတဲ့ အတွက် နေရာတိုင်းမှာ လိုက် အနှောင့်အယှက်ပေးနေတော့ အမျိုးသား ဖွံ့ဖြိုးတိုးတက်ရေး ဒီမိုကရက်တစ် ပါတီက နောက်ဆုံး မခံမရပ်နိုင်ဖြစ်ပြီး ခုလို ရိုက်ပွဲ ဖြစ်ပွားတာ ဖြစ်ပါတယ်” ဟု သူက ပြောသည်။
မောင်တောမြို့နယ်တွင် ပါတီများ စတင်မဲဆွယ် စည်းရုံးချိန်မှ စတင်ပြီး ကြံ့ဖွတ်ပါတီဝင်များနှင့် အမျိုးသား ဖွံ့ဖြိုး တိုးတက်ရေး ဒီမိုကရက်တစ် ပါတီတို့ အကြား အနည်းဆုံးရိုက်ပွဲ ၇ ပွဲခန့် ဖြစ်ပွားခဲ့ပြီ ဖြစ်ကြောင်းနှင့် ထိုအထဲတွင် မောင်တောတောင်ပိုင်းတွင် မြင်းလွှတ်ကျေးရွာနှင့် သပြေတော ကျေးရွာများတွင်လည်း ရိုက်ပွဲ ဖြစ်ပွားခဲ့သည်ဟု သိရသည်။
လွန်ခဲ့သော အပတ်ကလည်း မောင်တောမြို့နယ် အလယ်သံကျော် ကျေးရွာတွင် ကားသုံးစီးဖြင့် မဲဆွယ် စည်းရုံးရန် လာရောက်သည့် အမျိုးသား ဖွံ့ဖြိုးတိုးတက်ရေး ပါတီမှ လွှတ်တော် ကိုယ်စားလှယ်လောင်းများကို ရွာအ၀င်တွင် ကြံ့ဖွတ်ပါတီဝင်များက ကန့်ကွက် ဆန္ဒပြခဲ့ကြသဖြင့် မဲဆွယ်စည်းရုံးရေးကို တခြားကျေးရွာ တစ်ခုတွင် ရွှေ့ပြောင်း လုပ်ဆောင်ခဲ့ရသည်။
ယခု ခမောင်းဆိပ်တွင် ဖြစ်ပွားသော ရိုက်ပွဲမှာ အပြင်းထန်ဆုံး ဖြစ်သဖြင့် ရွေးကောက်ပွဲ ကော်မရှင်က ပုဒ်မ ၁၄၄ ထုတ်ပြန်ခဲ့ရခြင်း ဖြစ်သည်။
ခမောင်းဆိပ်ရွာတွင် အိမ်ခြေပေါင်း ၁၈၀၀ ကျော်ရှိပြီး မဲထည့်နိုင်သူ လူပေါင်း ၆၀၀၀ ကျော်ရှိကြောင်း သိရသည်။ မောင်တော တမြို့နယ်လုံးတွင် မဲရုံပေါင်း ၂၇၄ ရုံရှိပြီး ခမောင်းဆိပ် ကျေးရွာတွင် မဲရုံ (၆) ရုံ ရှိမည်ဟု သိရသည်။
မောင်တောမြို့နယ်တွင် လာမည့် ရွေးကောက်ပွဲတွင် မဲထည့်ခွင့်ရသူ အရေအတွက်မှာ ၂၅၇၃၆၄ ဦး ရှိ်ကြောင်း သတင်း ရရှိသည်။
မောင်တောမြို့နယ်တွင် ယှဉ်ပြိုင်ကြမည့် ပါတီ ၄ ပါတီ ရှိပြီး အဆိုပါ ပါတီများမှာ တစည၊ ကြံ့ဖွတ်၊ အမျိုးသား ဖွံ့ဖြိုး တိုးတက်ရေး ဒီမိုကရက်တစ် ပါတီနှင့် အမျိုးသား ဖွံ့ဖြိုးရေးနှင့် ငြိမ်းချမ်းရေး ပါတီတို့ ဖြစ်ကြသည်။
No comments:
Post a Comment