ရခိုင်ပြည်နယ် စစ်တွေမြို့တွင် ရုံးဝန်ထမ်းများအားကြံဖွံ့ပါတီကိုမဲထည့်ရန် နည်းပေါင်းစုံဖြင့် ခြိမ်းခြောက်စည်းရုံး နေကြောင်းမြို့ခံတချို့ပြောချက်အရသိရသည်။စစ်တွေလမ်းမတော်ရပ်ကွက်မှ ရုံးစာရေးမ တဦးကို မေးမြန်းကြည့်ရာသူမကယခုကဲ့သို့ ပြောသည်။
“ကျွန်မတို့ ရုံးဝန်ထမ်းတွေ ဆိုလို့ရှိရင် အကုန်လုံး ကြံ့ဖွတ်ကို မဲပေးရမယ့် အနေအထား ရှိပါတယ်။ အစိုးရ ၀န်ထမ်းဆိုတာ အထက် အရာရှိက ဘာညွန်ကြားသလဲ။ ညွှန်ကြားတဲ့ အတိုင်း လိုက်နာ ဆောင်ရွက်ဖို့ လိုတယ် ဆိုပီး ရွေးကောက်ပွဲနဲ့ ပတ်သက်ပြီး ကျွန်မတို့ရုံးမှာ ခုလို ညွှန်ကြားထားတာတွေ ရှိပါတယ်။ အထက်အကြီးတွေက အမှုထမ်း တွေကို ပြောထားတာကတော့ ဒီစကားတွေကို အပြင်မထွက်စေနဲ့၊ ပါးစပ်က ပေါက်ကြားတဲ့သူကို အလုပ်ပြုတ်မယ်ဆိုပြီး ပြောထားတယ်လေ” ဟုပြောသည်။
သို့သော်လည်း အများစု ၀န်ထမ်းများမှာ စစ်အစိုးရ လက်အောက် လစာ မလုံလောက်သည့် အပြင် ဆိုးဝါးလှသော စနစ်အောက်တွင် ကြမ်းတမ်းလှစွာ ရုန်းကန် လူပ်ရှားနေကြရသဖြင့် စစ်အစိုးရ တိုင်းပြည်ကို ဆက်လက် အုပ်ချုပ်မည်ကို မလိုလားသူ များနေကြသည်ဟု သိရသည်။
“ ခုလို အထက်က ညွှန်ကြားထားတာတွေ ရှိပေမယ့် ကျွန်မတို့ ၀န်ထမ်းတွေကြားမှာတော့ ကြံ့ဖွံ့ ပါတီကို မဲပေးမယ်ဆိုပီး အားတက်သရော ပြောဆိုသူက တအားနည်းပါတယ်။ ရွေးကောက်ပွဲရရက်ရောက်မှ ဘဲ ဘယ်လို ဖြစ်လာမယ်ဆိုတာ ပြောနိုင်မှာ ဖြစ်ပါတယ်” ဟု သူမက ပြောသည်။
တခြား အစိုးရ၀န်ထမ်းများအား မေးကြည့်ရာတွင်လည်း ယခု ရွေးကောက်ပွဲမှာ “ လုပ်” ရွေးကောက်ပွဲ ဖြစ်မည် ဖြစ်သောကြောင့် အများက အထူးတလည် စိတ်ဝင်စားမူ မရှိကြောင်း ပြောသည်။
မောင်တောမြို့မှ ရခိုင် အမျိုးသား နစက တစ်ဦးက “ ကျွန်တော်တို့ဆီမှာ ဘယ်အဖွဲ့ကို မဲပေးရမယ် ဆိုပီး ခုချိန်ထိ ညွှန်ကြားချက် ထုတ်တာ မရှိဘူး။ ကျွန်တော်တို့ တပ်တွင်းမှာ အောက်ခြေ ရဲဘော်တွေက မကျေနပ်မူတွေ များနေတဲ့ အတွက် အထက်အရာရှိလောက်ဘဲ ကြံ့ဖွံ့ကို မဲပေးကောင်း ပေးနိုင်ပါတယ်။ အောက်ခြေကတော့ ပေးချင်သူကို ပေးသွားကြမယ် ထင်ပါတယ်” ဟု ပြောသည်။
ရွေးကောက်ပွဲနီးလာသည်နှင့်အမျှ ရခိုင်ပြည်၌ ကြံ့ဖွတ်ပါတီမှမြို့နယ်တိုင်းလိုလိုတွင် ဒေသခံလူထုများကို အခွင့်ရေးပေး စည်းရုံးနေသည်ဟု သိရသည်။
“သူတို့ပြောတာက ငါတို့ပါတီကိုမဲထည့်ပါ။ ငါတို့ပါတီဟာအင်အားလည်းကောင်းတယ်။ ပါတီဘဏ္ဍာငွေလည်း ရှိတယ်။ ငါတို့ပါတီသာနိုင်ရင် မင်းတို့ပညာရေး၊ စီးပွားရေး၊ လူမှုရေးနဲ့ ရခိုင်တပြည်လုံး တိုးတက် ဖွံ့ဖြိုးအောင် လုပ်ပေးမယ် ဆိုပြီးတော့ ပြောပါတယ်။ သူတို့ရှေ့ထက်မှာတော့ခေါင်းညိတ်လိုက်ရတယ်ဗျာ။ ဒါပေမယ့် အများအားဖြင့် လူတွေက ကိုယ့်ရခိုင်ပါတီကိုသာ မဲပေးဖို့ လူတွေ များတယ်“ ဟု အိုးတန်း ရပ်ကွက်နေ နိုင်ငံရေးတက်ကြွ သူတဦးကပြောသည်။
လွန်ခဲ့သော တနင်္လာနေ့က စစ်တွေမြို့ လမ်းမတော်ရပ်ကွက်တွင် ကြံ့ဖွတ်ပါတီမှ မဲဆွယ်စည်းရုံးရာတွင် စုစု ပေါင်းလူအင်အား ၂၀ ခန့်သာတက်ရောက်ခဲ့သည်ဟုကိုယ်တိုင်ပါဝင်ခဲ့သူလူငယ်တဦးကပြောသည်။
ကျောက်ဖြူမြို့ခံတဦးကလည်း “ ကြံ့ဖွတ်တွေက ရပ်ကွက်တွေမှာလူတွေကိုပြောနေတာက ငါတို့ ပါတီကို မဲပေးကြပါ။ ခုပြိုင်မယ့် ပါတီတွေ အထဲမှာ ငါတို့ပါတီက အကြီးဆုံးဖြစ်တယ်။ အစိုးရ လုပ်နိုင်တဲ့ ပါတီ ဖြစ်တယ်။ ငါတို့ ပါတီ အနိုင်ရရင် မင်းတို့ ကျောက်ဖြူမှာလိုအပ်တာ ကိုဖြည့်ဆည်းပေးမယ်ပြောတယ်။ ဒါပေမယ့် လူတွေက သိပ်နားမထောင်ကြဘူး။ အများအားဖြင့် ခုရွေးကောက် ပွဲကို စိတ်မ၀င်စားသူ များပါတယ်။” ဟု ပြောသည်။
ရခိုင်ပြည်နယ်တွင် ပါဝင်ယှဉ်ပြိုင်မည့်ပါတီများမှာ ဒီမိုကရက်တစ်ပါတီ( မြန်မာ)၊ မြန်မာနိုင်ငံ ရခိုင်ပြည်နယ် အမျိုးသားအင်အားစုပါတီ၊ အမျိုးသားဖွံ့ဖြိုးတိုးတက်ရေးဒီမိုကရက်တစ်ပါတီ၊ တိုင်းရင်းသားစည်းလုံးညီညွတ် ရေးပါတီ၊ ကမန်အမျိုးသားတိုးတက်ရေးပါတီ၊ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ၊ ခမီအမျိုးသားဖွံ့ဖြိုး တိုးတက်ရေးပါတီ၊၊မြို(ခေါ် )ခမီးအမျိုးသားညီညွတ်ရေးအဖွဲ့နှင့် ရခိုင်တိုင်းရင်းသားတိုးတက်ရေးပါတီတို့ အသီးသီးဝင်ရောက်ယှဉ်ပြိုင်သွားမည်ဟုသတင်းရရှိသည်။
No comments:
Post a Comment