အောင်ကျော်မိုး/ ၂၄ သြဂုတ် ၂၀၀၉
နယ်စပ်သွင်း စားဆီများကို ရန်ကုန် မြို့တော် စည်ပင်သာယာရေး ကော်မတီက စားသုံးရန် မသင့်ဟု ကြေညာ ခဲ့သဖြင့် ဆီဈေးများ ခုန် တက် လာပြီး စားအုန်းဆီ (ကန်ဆီ) တင်သွင်းနေသည့် ဦးတေဇ၏ကုမ္ပဏီ အမြတ်အစွန်း များစွာရနေကြောင်း ပြည်တွင်းဈေးကွက်မှ စုံစမ်းသိရသည်။
ရန်ကုန်မြို့တော်စည်ပင်သာယာရေး ကော်မတီ မြို့တော်ဝန် ဗိုလ်မှူးချုပ်အောင်သိန်းလင်းက နယ်စပ်သွင်းစားဆီများ မသန့်ဟုဆိုကာ ကြေညာခဲ့သဖြင့် ထိုင်းနယ်စပ်မှ တင်သွင်းသည့်ဆီများ ဈေးကွက်အတွင်း ရှားပါးခဲ့သည်ဟု ဘုရင့်နောင် ကုန်စည်ဒိုင်မှ စားဆီတင်သွင်းသူများက ပြောသည်။
အဆိုပါဒိုင်မှ စားဆီသွင်းသူတဦးက “ဗိုလ်မှူးချုပ်အောင်သိန်းလင်းက နယ်စပ်သွင်း ဘယ်ဆီပုံးကိုမဆို စစ်ဆေးမယ်၊ မသန့်တာတွေ့ရင် ထောင် (၃) နှစ်ချမယ်ဆိုတော့ ရန်ကုန် ဈေးကွက်အားလုံးမှာ ထိုင်းကသွင်းတဲ့ ဆီတွေကို ဘယ်သူမှ မရောင်းရဲတော့ဘူး။ မသွင်းရဲတော့ဘူး။ ဒီတော့ ဈေးကွက်ထဲမှာ ထိုင်းနယ်စပ်သွင်း စားဆီတွေ ရှားသွားတယ်။ ဒီအခါ စားအုန်းဆီ (ကန်ဆီ) သွင်းတဲ့ ထူးကုမ္ပဏီက ဆီဈေးကို လိုသလို ကစားတယ်။ ခွဲတမ်းတွေ လျှော့ချတယ်။ အကျိုးဆက်က တော့ ဆီဈေးတွေ ရက်ပိုင်းအတွင်း (၁) ပိဿာ ကျပ် (၃ဝဝ) ကနေ (၄ဝဝ) တက်သွားပြီး ထူးကုမ္ပဏီ အမြတ်အကြီးအကျယ် ရသွားတယ်။ ကျနော်တို့လို ထိုင်းနယ်စပ်ကနေ စားဆီတင်သွင်းတဲ့သူတွေ နစ်နာတယ်။ ပြည်သူတွေကလည်း ဒီမသန့်တဲ့ (ကန်ဆီ) တွေကိုပဲ စားရတော့တယ်” ဟု ပြောသည်။
မြန်မာနိုင်ငံတွင် ပြည်ပမှ စားဆီတင်သွင်းခွင့်ကို ပုဂ္ဂလိက ကုန်သည်များကို ခွင့်ပြုချက် ပေးမထားသော်လည်း ယခင်က ဦးအောင်ကိုဝင်း ခေါ် ဆရာကျောင်းက တဦးတည်း တင်သွင်းခွင့် ရရှိခဲ့ကာ အကျိုးအမြတ်များစွာရခဲ့ပြီး နောက်ပိုင်း မြန်မာ့စီးပွားရေး ဦးပိုင်လီမိတက်က တင်သွင်းနေခြင်းဖြစ်သည်။
ပြီးခဲ့သည့်နှစ်မှစ၍ ဦးတေဇပိုင် ထူးကုမ္ပဏီက မလေးရှားစားအုန်းဆီ တင်သွင်းခွင့်ကို လုပ်ကိုင်ကာ ဦးပိုင်လီမိတက်က ဆီကန် ငှားစားခြင်းသာ လုပ်ကိုင်ပြီး တင်သွင်းလာသည့် ကန်ဆီများကို ရန်ကုန်ဧရိယာ၌ ကိုယ်စားလှယ်များမှတဆင့် ခွဲတမ်းဖြင့် ဈေးနှုန်းသတ်မှတ် ရောင်းချပေးသည့်စနစ်ကို ကျင့်သုံးသည်။
အဆိုပါ ကိုယ်စားလှယ်များက ပြည်သူများကို ဟန်ပြသာ အနည်းငယ် ရောင်းချပြီး ကျန်ဆီများကို မှောင်ခိုပေါက်ဈေးများဖြင့် ရောင်းချကြကြောင်း၊ ထူးကုမ္ပဏီကိုယ်တိုင်ကလည်း ကိုယ်စားလှယ်များအား ဆီအချို့ကိုသာရောင်းပြီး ဆီအချို့ကို ပြင်ပပေါက်ဈေးအတိုင်း တနိုင်ငံလုံးကို ဖြန့်ဖြူးကြောင်း ဆီအရောင်းဆိုင် ပိုင်ရှင်တဦးက ပြောသည်။
နောက်ပိုင်း မလေးရှားဆီ ဈေးနှုန်းကျဆင်းလာပြီး နယ်စပ်သွင်း ထိုင်းစားဆီများ ဝင်ရောက်လာကာ ပြည်သူများကလည်း ကြိုက်နှစ်သက်လာခြင်းတို့ကြောင့် ထူးကုမ္ပဏီ ဈေးကွက်နည်းခဲ့သည့်အတွက် ဗိုလ်မှူးချုပ်အောင်သိန်းလင်းက ထိုင်းနယ်စပ်သွင်း စားဆီများကို ပြဿနာရှာနေခြင်းဖြစ်ကြောင်း ကုန်သည်များက ပြောသည်။
မြန်မာနိုင်ငံဈေးကွက်တွင် တလ ဆီစားသုံးမှု တန် (၅) သောင်းခန့်ရှိပြီး ထူးကုမ္ပဏီက မလေးရှားမှ တန် (၂) သောင်းကျော် တင်သွင်းကာ ပြည်တွင်းမှ မြေပဲဆီ၊ နှမ်းဆီ၊ ယုဇန ဆီအုန်းစက်ရုံမှ စုစုပေါင်း တန် (၁) သောင်းဝန်းကျင် ရောင်းချပြီး ကျန်တန် (၂) သောင်းနီးပါးမှာမူ ထိုင်းနယ်စပ်မှ ဝင်ရောက်ခြင်းဖြစ်သည်။
ယခုအခါ ထိုင်းနယ်စပ် စားဆီများ အဝင်နည်းသွားသည့်အတွက် ဦးတေဇပိုင် ထူးကုမ္ပဏီက စားအုန်းဆီပိုပြီး တင်သွင်းရဖွယ်ရှိကာ စားအုန်းဆီ ဈေးနှုန်းမှာ မူလ လက်လီ (၁) ပိဿာ (၁,၉ဝဝ) ကျပ်မှ ယခုရက်ပိုင်းအတွင်း (၂,၂၃ဝ) အထိ မြင့်တက်လာနေကြောင်း ဆီကုန်သည်များက ပြောသည်။
No comments:
Post a Comment