(၆၃)
မနက်ဖြန်ခရီးစဉ်အတွက် မော်တော်ယာဉ်များ ရှာ၍ငှားကြရမည်။ မနက်ဖြန်ခရီးက ရေလမ်းခရီးမဟုတ်….။ မော်တော်ကားများနှင့် ကျောင်းကုန်း၊ အိမ်မဲ…. သို့ သွားကြရမည့်ခရီး….။ ပုသိမ်တွင်ရှိသည့်ကားများ အားလုံးအား ဒေါ်အောင်ဆန်းစုကြည်တို့ ငှား၍မရရန် (တ.ဝ.တ)က မော်တော်ယာဉ်များ အားလုံးအား ချောအဖြစ် ဆွဲထား၏။ မည်သည့်ကားမျှမအား….။ (တ.ဝ.တ)ချော၊ (မ.ဝ.တ)ချော၊ စစ်ဌာနချုပ်ချော….။ ပြဿနာမရှိ…. ကားငှားမရလျှင်လည်း ….. ခရီးစဉ်အား ရပ်နားထားရုံပင်၊ ပုသိမ်တွင်ပင်နေပြီး ပုသိမ်၌ စည်းရုံးရေး၊ လေ့လာရေးများ ပြုလုပ်မည်။ ဤသို့ ဒေါ်အောင်ဆန်းစုကြည် ဆုံးဖြတ်ရပြန်၏။
ဇန်နဝါရီလ ၂၁ ရက်….။
ပုသိမ်ရှိ ဝေဋုဝန်ကျောင်းတိုက်သို့ နံနက်စောစောပင် ဒေါ်အောင်ဆန်းစုကြည်တို့အဖွဲ့ ထွက်ခဲ့ကြသည်။ ဒေါ်အောင်ဆန်းစုကြည်နှင့်အတူ ဦးကြည်မောင်၊ ဦးဝင်းထိန်နှင့် လူငယ်များ ပါလာကြ၏။ ပုသိမ်တိုင်းရုံးမှ ထွက်သည်နှင့် လက်နက်ကိုင် စစ်သားများက တား၏။
`ခြေလျင်သော်လည်းကောင်း၊ ယာဉ်တခုခုနှင့်သော်လည်းကောင်း၊ သွားလာခွင့်မပြုကြောင်း…. အမိန့်ပေးထားသည်´ဟု ဆိုသည်။
ဒေါ်အောင်ဆန်းစုကြည်က ….. `ကျမတို့ဟာ အကျဉ်းကျခံနေရတဲ့ အကျဉ်းသားများ မဟုတ်ပါဘူး၊ လွတ်လပ်တဲ့ နိုင်ငံသားတွေပါ။ လွတ်လပ်တဲ့ နိုင်ငံသားများဟာ လွတ်လပ်တဲ့ နိုင်ငံအတွင်းမှာ ….. လွတ်လပ်စွာ သွားလာပိုင်ခွင့် ရှိပါတယ်´
တားမြစ်နေသည့် လှံစွပ်တပ် သေနတ်များ အကြားမှပင် တည်ငြိမ်အေးဆေးစွာနှင့် ဒေါ်အောင်ဆန်းစုကြည်သည် ဆက်၍လျှောက်သည်။ ဒေါ်အောင်ဆန်းစုကြည်အား သေနတ်ပြခြိမ်းခြောက်ပြီး တား၍မရမှန်းသိသည့် အခါတွင်မှ ဗိုလ်မြင့်အောင်သည် လမ်းလျှောက်၍မူ မသွားပါနှင့်…. မော်တော်ကားနှင့် သွားပါဟူ၍ ချောဆွဲထားသော မော်တော်ယာဉ်အား ထုတ်ပေး၏။ မလွယ်….။
(၆၄)
ဧရာဝတီတိုင်း ခရီးစဉ်တစ်လျှောက်လုံး အဖွဲ့ချုပ်ဗဟိုနှင့် ဒေါ်အောင်ဆန်းစုကြည်တို့ အဆက်အသွယ်မပြတ်….။ တယ်လီဖုန်းဆက်သွယ်မှုက နေ့စဉ်လိုလိုရှိကြ၏။ ခရီးစဉ်အခြေအနေအား နေ့စဉ်ပင် ဗဟိုသို့ အစီရင်ခံ၏။ ဗဟိုမှ ဆက်၍လုပ်ဆောင်သင့်သည်တို့အား ဆောင်ရွက်၏။ ယခုလည်း ရန်ကုန်မှ ဒေါ်အောင်ဆန်းစုကြည်ထံသို့ တယ်လီဖုန်း ဝင်လာသည်။ ခရီးစဉ်အခြေအနေနှင့် ပတ်သက်၍ နိုင်ငံခြားသတင်းဌာနတခုမှ သတင်းထောက်က မေးမြန်းလို၍ဟု ဆိုသည်။ ဒေါ်အောင်ဆန်းစုကြည်နှင့် နိုင်ငံခြားသတင်းထောက်တို့ တယ်လီဖုန်းလိုင်းပေါ်မှပင် အင်တာဗျူး၏။
ဒေါ်အောင်ဆန်းစုကြည်…… ``ဧရာဝတီတိုင်းဟာဆိုလို့ရှိရင် အခု ကျမစည်းရုံးရေးခရီး ထွက်လာကတည်းက အဖွဲ့ချုပ်ဝင်များ၊ စည်းရုံးရေးတာဝန်ခံများ၊ တိုင်းတာဝန်ခံများကို ဖမ်းတာဟာ ၁၉ ယောက်ရှိသွားပါပြီ။ တပတ်အတွင်းမှာ ၁၉ ဦး ဖမ်းလိုက်ပါတယ်။ ဒီ ဖမ်းတဲ့ကိစ္စဟာလည်း ဘာမှ ဥပဒေမဲ့လုပ်ခဲ့လို့ မဟုတ်ဘူး။ ပြည်သူလူထုဘက်က ရပ်တည်ခဲ့လို့။ ဒါမှမဟုတ် ပြည်သူလူထုက ကျမတို့ကို လှိုက်လှိုက်လှဲလှဲ ကြိုဆိုခဲ့လို့ဆိုပြီးတော့ ဖမ်းတဲ့ကိစ္စတွေ ဖြစ်ပါတယ်။ ဗိုလ်မှူးချုပ်မြင့်အောင် လုပ်နေတဲ့ပုံနဲ့ ဧရာဝတီတိုင်းမှာ လွတ်လပ်ပြီးတော့ တရားမျှတတဲ့ ရွေးကောက်ပွဲတွေ မဖြစ်နိုင်ဘူး။ အဲ့ဒီတော့ နိုင်ငံတော် ငြိမ်ဝပ်ပိပြားမှု တည်ဆောက်ရေး အစိုးရက တကယ်စစ်မှန်တဲ့ စေတနာနဲ့ လွတ်လပ်ပြီးတော့ တရားမျှတတဲ့ ရွေးကောက်ပွဲတွေ ဖြစ်စေချင်တယ်ဆိုလိုရှိရင် ဗိုလ်မှူးချုပ်မြင့်အောင် လုပ်ပုံလုပ်နည်းတွေကို နှာစေးနေလို့ မဖြစ်ဘူး။ လျစ်လျူရှုနေလို့ မဖြစ်ဘူး။ အရေးယူသင့်ပါတယ်။
ကျမဟာ လူတယောက်ကို နာမည်တပ်ပြီးတော့ ဒီလိုတိုက်ခိုက်ပြီးတော့ မပြောချင်ပါဘူး။ ဒါပေမဲ့ ဧရာဝတီတိုင်းမှာ လုပ်ပုံကိုင်ပုံတွေက တရားလွန်လွန်းလို့ ပြောရတာဖြစ်ပါတယ်။ ဒါကြောင့်မို့လို့ နိုင်ငံတော် ငြိမ်ဝပ်ပိပြားမှု တည်ဆောက်ရေး အစိုးရဟာ စစ်မှန်တဲ့စေတနာ ပြည်သူလူထုအပေါ်မှာ ရှိတယ်ဆိုရင် ဗိုလ်မှူးချုပ်မြင့်အောင်လို တိုင်းမှူးမျိုးကိုတော့ အရေးယူရမှာပဲ။
ခရီးလမ်းတလျှောက်လုံးမှာ လုံခြုံရေး၊ ငြိမ်ဝပ်ပိပြားရေးဆိုတဲ့ ဆင်ခြေတွေပြပြီးတော့ ပြည်သူလူထုကို အမျိုးမျိုး ခြိမ်းခြောက်နေတယ်၊ ဟန့်တားနေတယ်ဆိုတာ ကျမတို့ တွေ့ခဲ့ရပါတယ်။ ဒါတွေကို ကျမတို့ လက်မခံနိုင်ပါဘူး။ ကလေးလူငယ်များက ကျမကို လက်ပြလိုက်လို့၊ လက်ခုပ်တီးလိုက်လို့ ရိုက်တယ်၊ နှက်တယ်ဆိုတာဟာ ငြိမ်ဝပ်ပိပြားရေးနဲ့ ဘာမှမဆိုင်ဘူး။ လုံခြုံရေးနဲ့လည်း ဘာမှမဆိုင်းဘူး´´
(၆၅)
ပုသိမ်တွင် အာဏာပိုင်များ၏ဖိနှိပ်မှုများက တန့်၍မနေ…. တိုး၍ပင်လာ၏။ ၂၂ ရက်နေ့ မွန်းလွဲပိုင်းတွင် ငဝန်မြစ် အနောက်ဘက်ကမ်းရှိ သင်္ဘောကျင်းရပ်ကွက် အဖွဲ့ချုပ်ရုံးသို့ ဒေါ်အောင်ဆန်းစုကြည်တို့ သွားရန်ပြင်ဆင်၏။ စက်လှေအခက်အခဲကြောင့် ကြန့်ကြာမှုများ ရှိခဲ့၏။ သင်္ဘောကျင်းရပ်ကွက်အဖွဲ့ချုပ်မှ စည်းရုံးရေးမှူးများက ဒေါ်အောင်ဆန်းစုကြည်တို့အား ကြိုဆိုရန် ပြင်ဆင်နေကြ၏။ ဤသည်ကို ရေတပ်မှ စစ်ဗိုလ်တယောက်မှ အဖွဲ့ချုပ်စည်းရုံးရေးမှူးများအား ဆဲဆိုရိုက်နှက်၏။ ဒဏ်ရာအနာတရ ရခဲ့ကြ၏။ ပြီးလျှင် …. စည်းရုံးရေးမှူး နှစ်ဦးကိုလည်း ဖမ်းဆီးသွားပြန်သည်။ ဒီနေ့အထိဆိုလျှင် ….. မတရားဖမ်းဆီးခံနေရသည့် အဖွဲ့ချုပ် အဖွဲ့ဝင်ပေါင်းက …. ၃ဝ ကျော်ပြီ။ မည်သို့ လုပ်မည်နည်း….။ ဒေါ်အောင်ဆန်းစုကြည်အနေဖြင့် ရှေ့ဆက်မည့် စည်းရုံးရေးခရီးစဉ်များအား ဖျက်ပြီး ပုသိမ်တွင်ပင် ဆက်၍ဖိနှိပ်မှုများ၊ မတရား ဖမ်းဆီးထိန်းသိမ်းမှုများနှင့် ပတ်သက်၍ သက်ဆိုင်ရာတို့နှင့် တွေ့ဆုံပြီး ရင်ဆိုင်ဖြေရှင်မည်လား…..။
ရန်ကုန်နှင့် တိုင်ပင်ကြရသည်။
ရခိုင်ပြည်နယ် စည်းရုံးရေးခရီးစဉ်မှ ဥက္ကဋ္ဌ ဦးတင်ဦးသည် ၂၂ ရက်နေ့တွင် ရန်ကုန်သို့ အရောက်ပြန်ခဲ့မည်။ ပြီးလျှင် ….. ၂၅-၂၆ ရက်များထက် နောက်မကျစေဘဲ ပုသိမ်သို့ လိုက်လာမည်။ ပုသိမ်တွင် မတရားဖမ်းဆီးမှုများ၊ ဖိနှိပ်မှုများနှင့်ပတ်သက်၍ ဥက္ကဋ္ဌ ဦးတင်ဦးကိုယ်တိုင် ဖြေရှင်းမည်။ ဒေါ်အောင်ဆန်းစုကြည်တို့အဖွဲ့က မူလအစီအစဉ်အတိုင်း ဧရာဝတီတိုင်း မြစ်ဝကျွန်းပေါ် စည်းရုံးရေးခရီးစဉ်အား ဆက်၍လုပ်ဆောင်ရန် ဟူ၍ ဆုံးဖြတ်ကြ၏။
ဤအတွက် …. ၂၃ ရက်နေ့ မနက်စောစောပင် ဒေါ်အောင်ဆန်းစုကြည်တို့အဖွဲ့ ပုသိမ်မှ ထွက်ကြ၏။ ကျောင်းကုန်း၊ ထောက်ရှာ၊ အိမ်မဲ၊တံခွန်တိုင်၊ အသုတ်၊ ရေကြည်….။
ရေကြည်အဖွဲ့ချုပ်ရုံး၌ အဖွဲ့ဝင်များနှင့် ဒေါ်အောင်ဆန်းစုကြည်တို့၏ တွေ့ဆုံဆွေးနွေးပွဲက ညသန်းခေါင်ယံတိုင်သည်အထိ ကြာ၏။ ဆွေးနွေးပွဲသို့ လာရောက်ကြသည့် အဖွဲ့ဝင်များက ငဝန်မြစ် အနောက်ဘက်ကမ်းမှ လာခဲ့ကြရသည့်သူများ …. လှေ၊ သဗ္ဗန်များ အားလုံးအား အာဏာပိုင်များက သိမ်းဆည်းထားသည့်အတွက် ရေအိုးအတွင်း အဝတ်အထည်များထည့်ပြီး ငဝန်မြစ်အား ရေအိုးပိုက်၍ ကူးခတ်ကာ လာခဲ့ကြရသည့် အဖွဲ့ချုပ်အဖွဲ့ဝင်များ ဖြစ်သည်။
``အို
ဧရာဝတီ
ဒို့၏ ဇွဲနှင့်
အောင်စည်ယွန်းချိန် နီးပြီလော….´´
(၆၆)
၁၉၈၉ ခုနှစ်၊ ဇန်နဝါရီလ ၂၅ ရက်….။
ဒီနေ့ခရီးစဉ်က ဒေါ်အောင်ဆန်းစုကြည်၏ ဧရာဝတီတိုင်းမြစ်ဝကျွန်းပေါ် စည်းရုံးရေးခရီးစဉ်၏ နောက်ဆုံးနေ့ ခရီးဖြစ်သည်။ ဇလွန်၊ မဲဇာလီကုန်း၊ ထူးကြီး၊ ကနောင်၊ မြန်အောင်၊ ကြံခင်း….။ ဧရာဝတီတိုင်း ကြံခင်းမြို့တွင်ပင် အဆုံးသတ်ပြီး ပဲခူးတိုင်းမှတဆင့် ရန်ကုန်သို့ ပြန်မည်။
ဇလွန်သို့ နံနက်စောစောပင် ရောက်၏။ ဇလွန်က ဒေါ်အောင်ဆန်းစုကြည်၏ ဖခင်ဗိုလ်ချုပ်အောင်ဆန်း၏ သမိုင်းဆိုင်ရာ အချိုးအကွေ့များ ဖြစ်ပေါ်စေခဲ့သည့်မြို့ ….။
လွန်ခဲ့သည့်နှစ်ပေါင်း ၅ဝ ခန့်က ဒို့ဗမာအစည်းအရုံး၏ အထွေထွေအတွင်းရေးမှူး သခင်အောင်ဆန်းသည်လည်း ပထမ အမျိုးသားလွတ်မြောက်ရေး တိုက်ပွဲအား ဆင်နွှဲရင်း …. လူထုအား စည်းရုံးရန် ဧရာဝတီတိုင်း ဇလွန်မြို့လေးသို့ ရောက်ခဲ့၏။ လူထုအား ဇလွန်တွင် တရားဟော၏။ သခင်အောင်ဆန်း တရားဟောနေစဉ်…. ရာဇဝတ်အုပ်တယောက် ရောက်လာပြီး သခင်အောင်ဆန်းအား စာတစောင်ပေး၏။ လူထုကြီးက အံ့သြစွာနှင့် ကြည့်နေကြ၏။ ဘာစာလဲ…. ။ ဘာလဲ….။
သခင်အောင်ဆန်းက မိန့်ခွန်းပြောနေသည်အားရပ်ပြီး စာကို ဖောက်၍ဖတ်ကြည့်၏။ ပြီးလျှင်…. သခင်အောင်ဆန်းက လူထုကြီးအား….
``ဟောဒီမှာ ဟင်္သာတ ရာဇဝတ်ဝန်က စာတစောင်ပေးလာတယ်။ သူ့စာကတော့ …. ချင်းတောင်ကိစ္စကို မဟောရဘူးလို့ ပိတ်ပင်တားမြစ်တာပါပဲ။ ချင်းတောင်ကိစ္စကို ကြားချင်ကြပါသလား´´ ဟူ၍ သခင်အောင်ဆန်းက ဗြိတိသျှအာဏာပိုင် ရာဇဝတ်ဝန်၏ တားမြစ်သည့် မတရားသည့် အမိန့်အား ဖီဆန်ရင်း … လူထုအားမေး၏။
လူထုက ….
``ကြားချင်ပါတယ်´´
``ကြားချင်ပါတယ်´´
``ကြားချင်ပါတယ်…´´
သခင်အောင်ဆန်းက …. ကြားချင်ရင် ပြောချင်နေတာနဲ့ အတော်ပဲဟုဆိုကာ …. ချင်းတောင်တွင် ဗြိတိသျှ အုပ်စိုးသူတို့၏ ဖိနှိပ်မှုများအား ဟောတော့၏။ သခင်အောင်ဆန်း ဟောပြောပွဲပြီးသည်နှင့် ဟင်္သာတ ရာဇဝတ်ဝန်က သခင်အောင်ဆန်းအား ပုဒ်မ ၁၂၄ (က) နှင့် အလိုရှိကြောင်း ဝရမ်းထုတ်၏။ ဝရမ်းက …..
``ဟင်္သာတစီရင်စု၊ ဇလွန်မြို့တွင် ၁၉၄ဝ ပြည့်နှစ် ဇွန်လ ၁ ရက်နေ့ည၊ အစိုးရ အကြည်ညိုပျက်လောက်အောင် တရားဟောသဖြင့် ရာဇသတ်ပုဒ်မ ၁၂၄ (က) အရ အလိုရှိသော ဗမာနိုင်ငံလုံးဆိုင်ရာ တို့ဗမာအစည်းအရုံး၏ အထွေထွေအတွင်းရေးမှူး မောင်အောင်ဆန်း (ခေါ်) သခင်အောင်ဆန်းအား ဖမ်းဆီးပေးသူကိုဖြစ်စေ၊ ဖမ်းဆီးရမိရန်ကိုဖြစ်စေ၊ ဟသာင်္တမြို့ ရာဇဝတ်ဝန်မင်းက ဆုတော်ငွေ ၅ိ/-(ငါးကျပ်တိတိ) ပေးသနားတော်မူလိမ့်မည်။´´
သခင်အောင်ဆန်းအား အလိုရှိကြောင်း ကြေညာသည့် ရာဇဝတ်ဝန်က မစ္စတာဇေဗီယာ….။ ထိုနေ့မှစပြီး သခင်အောင်ဆန်း၊ မန်းဘခိုင် (အာဇာနည်ခေါင်းဆောင်ကြီး)၊ မန်းဘဆိုင်တို့၏ အကူအညီနှင့် …. မြစ်ဝကျွန်းပေါ်တွင်ပင် မြေအောက်သို့ လျှိုသွားခဲ့၏။ ထိုမှတဆင့် …. ဂျပန်သို့ စွန့်စွန့်စားစား သွားရောက်ရန် အခြေအနေများအထိ ရောက်ခဲ့၏။ ပြီးလျှင် …. ခေတ်မီ မြန်မာ့တပ်မတော်သစ်အား ထူထောင်နိုင်ခဲ့သည်အထိ …. သခင်အောင်ဆန်း၏ သမိုင်းအချိုးအကွေ့များက ဇလွန်မှ စခဲ့သည်ဟု ဆိုရမည်။
ဒေါ်အောင်ဆန်းစုကြည်တို့ သခင်အောင်ဆန်း ၁၉၄ဝ ခုနှစ် ဇွန်လ ၁ ရက်နေ့က တရားဟောခဲ့သည့်နေရာသို့ သွားရောက်၍ ကြည့်ရှုကြ၏။ ပြီးလျှင် …. ဇလွန်မြို့ပေါ်၌ အင်္ဂပူဘုရားသို့ သွားရောက်ဖူးမျှော်ကြ၏။ အင်္ဂပူ ဘုရားတန်ဆောင်း နေရာသည်လည်း ၁၉၄၆ ခုနှစ်က နာမည်ကြီး ဇလွန်ညီလာခံကြီးအား ကျင်းပခဲ့သည့် သမိုင်းဝင် အဆောက်အဦး ….။ ဇလွန်က ရာဇဝင်များနှင့်….။
ဒေါ်အောင်ဆန်းစုကြည်တို့ ဇလွန်မှ မဲဇလီကုန်းသို့ ဆက်ကြပြန်၏။ အာဏာပိုင်တို့၏ အနှောင့်အယှက်များကမူ ကြီးကြီးမားမား ပေါ်မလာသေး….။
မဲဇလီကုန်း….။
မဲဇလီကုန်းက အာဇာနည်ဗိုလ်အောင်ကျော်၏ ဇာတိမြေ…။ ရာဇဝင်ထွန်းပြောင်သည့် သမိုင်း၏ ထွေးပွေ့မှု အငွေ့အသက်များကြောင့် ဒေါ်အောင်ဆန်းစုကြည်၏ စိတ်အစဉ်၌ ပို၍ တက်ကြွထက်သန်နေသည်ဟု ခံစားရ၏။
မဲဇလီကုန်းသို့ ရောက်သည်နှင့် ဒေါ်အောင်ဆန်းစုကြည်တို့ ဗိုလ်အောင်ကျော် ကျောက်တိုင်သို့ သွားရောက်၍ အလေးပြုကြ၏။ ဒေါ်အောင်ဆန်းစုကြည်၏ လက်ဝဲဘက်ဘေးတွင်က ဦးကြည်မောင်….။ ဦးကြည်မောင်သည် ရဲဘော်အောင်ကျော်အား တည်ငြိမ်လေးနက်စွာနှင့် ဦးညွှတ်၏။ အလေးပြု၏။ ဦးကြည်မောင်က အာဇာနည် ဗိုလ်အောင်ကျော်၏ ရဲဘော်….ရဲဘက်တဦး။
လွန်ခဲ့သည့် …. နှစ်ပေါင်း ၅၂ နှစ်….။
သမိုင်း၏ အရိပ်က ဦးကြည်မောင်၏ ခန္ဓာနှင့် ရုပ်နာမ်အစုံအား လွှမ်းခြုံထားသကဲ့သို့ …။ တည်ငြိမ်လေးနက်စွာနှင့်ပင် ဦးကြည်မောင်သည် အာဇာနည်ဗိုလ်အောင်ကျော်၏ ကျောက်တိုင်အရှေ့၌ မတ်တပ်ရပ်၍ နေသည်။ အတွေးက လွန်ခဲ့သည့်နှစ်ပေါင်း ၅ဝ အလွန်ဆီသို့ …..။
ထိုစဉ်က ကိုအောင်ကျော်နှင့် ကိုကြည်မောင်တို့က ဒုတိယကျောင်းသားသပိတ်၏ သပိတ်မှောက်ကျောင်းသား ခေါင်းဆောင်များ….။ အတွင်းဝန်ရုံးကြီးအား ဝိုင်း၍သပိတ်တားကြ၏။ တတ်တတ်ကြွကြွ….၊ ထက်ထက်သန်သန်၊ ရဲရဲဝံ့ဝံ့….။ အောင်မြင်စွာ သပိတ်တားနိုင်ခဲ့ပြီမို့ …. သပိတ်အား ရုတ်ရန် ပြင်ကြ၏။
ထိုစဉ်ခဏမှာပင် …. အာဏာပိုင်တို့က၊ မြင်းနှင့်တိုက်၏။ နံပါတ်တုတ်များနှင့်ဝင်၍ ကျောင်းသားထုအား ရိုက်၏။ အားလုံးက အပြိုပြိုအလဲလဲ….။ ကိုအောင်ကျော် အရိုက်ခံရ၏။ ကိုကြည်မောင်လည်း အရိုက်ခံရ၏။ ကိုကြည်မောင်က ဒဏ်ရာမပြင်းထန်….။ ကိုအောင်ကျော်က ထိုအရိုက်ခံရသည့် ဒဏ်ရာနှင့်ပင် တက္ကသိုလ်များ ဆေးရုံပေါ်၌ ကွယ်လွန်ခဲ့၏။
ဗိုလ်အောင်ကျော်က …. မြန်မာ့လွတ်လပ်ရေး သမိုင်းစဉ်တွင် သူ၏သမိုင်းအား အာဇာနည်ပီသစွာနှင့် ရေးထိုး၍ သွားခဲ့လေပြီ။ ကျန်သူတို့ကား …. သမိုင်းခရီးရှည်ကြီးအတွင်း ချီတက်၍ ရေးထိုးနေကြဆဲ….။
``ရဲဘော်ဟာ
ဒီနေရာမှာ ကျဆုံးသွားခဲ့တယ်
ကတ္တတရာလမ်းကိုခွာ
ရာဇဝင်အရုပ်အရေးအရ
သုတေသနလုပ်ရင်
ရဲဘော်ရဲ့ နီမြန်းတဲ့ ဇာတ်ရုပ်ကို
တွေ့ရတယ်။
ဗိုလ်အောင်ကျော်ရဲဘော်
ဒို့တတွေဟာ ဒီနေရာမှာ
စာရွက်တွေ အတူဝေခဲ့ဖူးတယ်။
ဗိုလ်အောင်ကျော်ရဲဘော်
ဒီနေရာမှာ ဒို့တတွေဟာ
ရဲဘော်ကို အကြိမ်ကြိမ်
ဂုဏ်ပြုခဲ့တယ်။
ပြည်သူချစ်တဲ့ အာဇာနည် အနှစ်ဟာ
ဘယ်ခေတ်မှာမဆို
နုပျိုစိမ်းလန်းနေမှာပဲ
မုချယုံတယ်´´
(မောင်လေးအောင်)
No comments:
Post a Comment