Friday, January 31, 2014

မူးယစ်ဆေးသုံးသည့် ရဲတပ်ဖွဲ့ဝင် ၃၆ ဦးကို အရေးယူ ထောင်ချ

ရွှေအောင်

ကချင်ပြည်နယ်အတွင်း မူးယစ်ဆေးသုံးစွဲတဲ့ ရဲတပ်ဖွဲ့ဝင် ၃၆ ဦးကို ရဲတပ်ဖွဲ့က ထုတ်ပယ်ပြီး ထောင်ဒဏ်အသီးသီး ချမှတ်လိုက်တယ်လို့ မြန်မာနိုင်ငံရဲတပ်ဖွဲ့ ပြောခွင့်ရ ရဲမှူးချုပ် ၀င်းခေါင်က ပြောပါတယ်။

ဒုရဲအုပ်တဦး အပါအ၀င် တပ်ကြပ်တပ်သား အဆင့်ဆင့်ကို အရေးယူ အပြစ်ပေး လိုက်တယ်လို့ သူက ပြောပါတယ်။

“အများစုကတော့ အခြားဆင့်တွေပဲ။ တပ်သားတို့၊ ဒုတပ်ကြပ်တို့၊ တပ်ကြပ်တို့ ဒီလိုတွေ ပါတာပေါ့။ အခု ပြစ်ဒဏ်ချတဲ့အထဲမှာတော့ အရာရှိအငယ်၊ ဒုရဲအုပ်အဆင့်ကတော့ ၁ ယောက် ပါတယ်။ သူတို့ကို ပြစ်ဒဏ်ချလိုက်တဲ့အထဲ အားလုံး စုစုပေါင်း ၃၆ ဦး ပြစ်ဒဏ် ချထားတယ်။ ၃ နှစ်တို့ ၅ နှစ်တို့ ထောင်ချတာ။ သုံးစွဲတဲ့ဟာကို ကျနော်တို့ သင်္ကာမကင်းဖြစ်လို့ ဆီးစစ်တယ် ဆီးမှာ အဖြေပေါ်တဲ့အတွက်ကြောင့် ရဲတပ်ဖွဲ့ဆိုင်ရာကလည်း အရေးယူတယ်။ ရဲတပ်ဖွဲ့ကလည်း ထုတ်ပယ်ရတာပေါ့။ သို့သော် သူတို့က မူးယစ်သုံးစွဲတာဖြစ်တဲ့အတွက် မူးယစ်ဥပဒေအရ နယ်ဘက် တရားရုံးမှာ တရားရင်ဆိုင်ရတာ။ နယ်ဘက် တရားရုံးက သုံးစွဲတဲ့သူကို ပြစ်ဒဏ်ချတဲ့ နေရာမှာ ၃ နှစ်ကနေ ၅ နှစ်အထိ ချလို့ရတယ်။ အဲဒီတော့ သူတို့ရဲ့ ပြစ်ဒဏ်အမျိုးအစားအရ ၃ နှစ်ကော ၄ နှစ်ကော ၅ နှစ်ကော အကုန်ပါတယ်။ ပြစ်ဒဏ် အမြင့်ဆုံးကျတဲ့သူတွေလည်း ပါတယ်။ အနိမ့်ဆုံးကတော့ ၃ နှစ်ပေါ့။”

၂၀၁၃ ခုနှစ် နိုဝင်ဘာလကနေ ၂၀၁၄ ခုနှစ် ဇန်န၀ါရီလအတွင်း အခုလို အပြစ်ပေး အရေးယူခဲ့တာလို့လည်း ပြောပါတယ်။

ကချင်ပြည်နယ် အမျိုးသားဒီမိုကရေစီအင်အားစုပါတီ ဥက္ကဋ္ဌ ဒေါ်ဘောက်ဂျာကတော့ ကချင်ပြည်နယ်ထဲ မူးယစ်ဆေး ရောင်းချတဲ့နေရာမှာ ရဲတပ်ဖွဲ့ဝင်တွေ ပါဝင်ပတ်သက်မှု ရှိတယ်လို့ ပြောပါတယ်။

“မူးရစ်ရဲတွေကို အထူး မူးယစ်တွေဆိုပြီးတော့ လုပ်တယ်။ ရောင်းတဲ့သူ ဂိုဏ်းကြီးတွေက သူတို့နဲ့ အဆက်အစပ်ရှိတယ်။ ဖမ်းမယ်လို့လုပ်တဲ့ အခါမှာ သူတို့က အရင်ဦးဆုံး သတင်းပေးထား လိုက်တယ်။ ရောင်းတဲ့သူတွေက ရှောင်နေလိုက်တယ်။ ပြီးရင် ဘာမှမဟုတ်တဲ့ သွားလာတဲ့သူ နည်းနည်းပါးပါးကို လိုက်ဖမ်းပြီး၊ အချုပ်ထဲမှာ ၃၀၀ လောက်ရှိတယ်။ အဲဒီလူတွေက မူးယစ်မှုတွေ မသင်္ကာမှုတွေနဲ့ အဖမ်းခံရတယ်။ တကယ့် ဂိုဏ်းသမားတွေက ဒီနေ့အထိ မိသေးဘူး။ အများကြီးပဲ အပြင်မှာ လွတ်နေတယ်။ ဘာမှ မဟုတ်တဲ့သူတွေလောက်ပဲ ဖမ်းထည့်နေတာ။”


ရဲတပ်ဖွဲ့ဝင်တွေ မူးယစ်ဆေးသုံးလို့ အပြစ်ပေး အရေးယူတာ တဦးစနှစ်ဦးစ ရှိခဲ့ဖူးပြီး အခုလို အများအပြား အရေးယူ အပြစ်ပေးတာတော့ ဒါ ပထမဆုံး ဖြစ်တယ်လို့ မြန်မာနိုင်ငံရဲတပ်ဖွဲ့က ပြောပါတယ်။

No comments: