၂၀၁၄ ကားဈေးကွက်နှင့် အနာဂတ်လားရာ

ထင်လင်းအောင်

၂၀၁၃ ခုနှစ် တစ်နှစ်တာလုံး အရောင်းအ၀ယ်အေးစက်မှုဖြင့် အဆုံးသတ်ခဲ့သည့် ပြည်တွင်းကားဈေး ကွက်သည် လာမည့် ၂၀၁၄ တွင်လည်း အရောင်းအ၀ယ် ဆက်လက်နှေးကွေးဦးမည်ဖြစ်ကြောင်း ကားအရောင်းစင်တာလုပ်ငန်းရှင်များနှင့် ပြင်ပ၀ယ်ရောင်းဈေးကွက်လုပ်ကိုင်သူများက မဇ္ဈိမသို့ ဒီဇင်ဘာ ၃၀ ရက်က သုံးသပ် ပြောကြားလိုက်သည်။

မော်တော်ယာဉ်တင်သွင်းခွင့်ဆိုင်ရာ ကားမော်ဒယ်သတ်မှတ်ချက်များ ထုတ်ပြန်ပေးလိုက်ပြီးနောက် CIF (တင်သွင်းခွန် ပေးဆောင်ရန် ရာဖြတ်သတ်မှတ်ဈေး) နှုန်းထားကျဆင်းမည်ဆိုသည့်အပေါ် စိုးရိမ်ကာ ၂၀၁၃ နှစ်ကုန်ပိုင်းတွင် ငြိမ်သက်နေသည့်ကားဈေးကွက်သည် အနည်းငယ် ပြန်လည်လှုပ်ခတ်နေ သော်လည်း ပြည်တွင်းဈေးကွက်၏လိုအပ်ချက် (အဓိက ရန်ကုန်မြို့၏) ပြည့်မီပြီးဖြစ်ရာ ၂၀၁၄ ခုနှစ် တွင်လည်း (တစ်နှစ်တာကာလ ရေတိုအနေအထား) အရောင်းအ၀ယ် တိုးတက်ဖွယ်မရှိဟု ကျွမ်းကျင် သူတွေက ဆက်လက်ပြောကြားပါသည်။

သီရိမင်္ဂလာဈေးဟောင်းကားရောင်းဝယ်ရေးစခန်းမှ ၀ါရင့်ဝယ်ရောင်း ဦးကျော်နိုင်က “လာမည့်နှစ်ဈေး ကွက်အခြေအနေကတော့ ပြောင်းလဲမှု အရမ်းကြီးမရှိနိုင်ဘူး။ ခပ်အေးအေးသွားမှာပဲ။ ရန်ကုန် အနေ အထားအရ ကားဝယ်နိုင်တဲ့သူ တော်တော်များများက ၀ယ်ထားပြီးသားဖြစ်နေတော့လေ ဈေးကွက်က သိပ်ပြီး အပြောင်းအလဲမရှိနိုင်ဘူး။ လေလံဈေးကွက်မှာ ထိုးကျတာ ပေါ်လစီပြောင်းတာမျိုးရှိလာရင် တော့ပြောင်းနိုင်တာပေါ့”ဟု ပြောသည်။

ကားဈေးကွက်ရဲ့ လက်ရှိအလှုပ်အရှား

မော်တော်ယာဉ်ကြီးကြပ်မှုကော်မတီ၏ ဒီဇင်ဘာ ၁၉ ရက် အစည်းအဝေးဆုံးဖြတ်ချက်အရ ကားတင် သွင်းခွင့်ဆိုင်ရာ မော်ဒယ်သတ်မှတ်ချက်များကို ပြောင်းလဲအတည်ပြုလိုက်သော်လည်း ကားဈေးကွက် အတွင်း အရောင်းအ၀ယ်အများဆုံးဖြစ်သည့် တစ်ဦးချင်းပါမစ်ဖြင့် တင်သွင်းသော 1300CC ကားများမှာ မူ CIF တန်ဖိုး ကန်ဒေါ်လာ ၅,၀၀၀ ဖြင့်သာ ယခင်အတိုင်းဆက်လက်ရှိနေရာ အရောင်းအ၀ယ်မှာ လည်း အေးစက်သည့် ၀ယ်လိုအားအဖြစ် ဆက်ရှိနေကြောင်း ယင်းတို့ကပြောသည်။

၂၀၁၂ ခုနှစ်ကုန်ပိုင်းတွင် အိုဟောင်းယာဉ်ပါမစ်ဖြင့် တင်သွင်းသည့်ကားများကို ၁၉၉၇ ခုနှစ် မော်ဒယ်မှ ၂၀၀၇ ခုနှစ် မော်ဒယ်အထိ တင်သွင်းပေးခဲ့ရာမှ ယခုနှစ်တွင် အိုဟောင်းယာဉ်အပ်နှံမှုဖြင့် တင်သွင်း သည့်ကားများကို ၂၀၀၀ ခုနှစ်မှ ၂၀၀၈ ခုနှစ်အထိနှင့် တစ်ဦးချင်းပါမစ် (Free Permit) ဖြင့် တင်သွင်း သည့်ကားများကို ၂၀၀၉ ခုနှစ်မှ ၂၀၁၄ ခုနှစ်မော်ဒယ်များအထိ တိုးမြှင့်တင်သွင်းခွင့်ပေးခဲ့ခြင်း ဖြစ်သည်။

ဦးကျော်နိုင်က “၀ယ်သူများတဲ့1300CC ကားတွေကCIF တန်ဖိုး မပြောင်းဘူးဆိုတော့ ဈေးတွေကလဲ အရင်အတိုင်းပဲရှိနေတာ။ အခု နည်းနည်းပြန်လှုပ်တယ်ဆိုတာက သို့လော သို့လော သတင်းတွေစောင့် နေကြတဲ့သူတွေက အရောင်းအ၀ယ်လေးပြန်လုပ်တာပါပဲ” ဟု ပြောသည်။

အရောင်းစင်တာများ၏ အနာဂတ်

ကားအရောင်းစင်တာ (Show Room) များအနေဖြင့်လည်း ဈေးကွက်ဝယ်လိုအား အေးစက်မှုအနေ အထားနှင့် CIF နှုန်းထား ကျဆင်းမှုသည်လည်း ၀ယ်လိုအားနည်းသည့်ကားများသာဖြစ်ရာ ကားသစ် တင်သွင်းမှုများကိုရပ်ဆိုင်းကာ ယခင်ဝယ်ယူထားသည့် ကားများကိုသာ ဆက်ရောင်းနေခြင်းဖြစ်သည်။

Farmer Auto ကားအရောင်းစင်တာမှ မန်နေးဂျင်းဒါရိုက်တာ ဒေါက်တာစိုးထွန်းက “ဈေးကွက်ကိုကြည့် လိုက်ရင် ၀ယ်လိုအားက ပြည့်သလောက်ဖြစ်နေပြီ။ အသစ်ထပ်သွင်းပြီးရောင်းဖို့ဆိုတာထက် Show Room မှာတင်ထားတဲ့ကားတွေကိုပဲ ကုန်အောင်ဆက်ရောင်းဖို့လုပ်နေရတယ်။ ပုံမှန်လောက်တော့ ရောင်းနေရပေမယ့် အရောင်းအ၀ယ် အရမ်းကြီးတက်လာဖို့တော့ သိပ်မလွယ်လောက်ဘူး” ဟု ပြော သည်။

နိုင်ငံခြားရင်းနှီးမြှုပ်နှံမှုကလည်း သက်ရောက်မှုရှိနိုင်

ကားဈေးကွက်အရောင်းအ၀ယ် အေးစက်နေခြင်းတွင် စီးပွားရေးနှေးနေခြင်းကလည်း အချက်တစ်ချက် အဖြစ် ပါဝင်နေခြင်းဖြစ်ရာ နိုင်ငံခြားရင်းနှီးမြှုပ်နှံမှုများ ၀င်ရောက်လာ၍ စီးပွားရေးသွက်လာပါက (ရေ ရှည်ကာလတွင်) ဈေးကွက်အလားအလာမှာ ပြန်ကောင်းလာနိုင်ခြေရှိကြောင်း ရောင်နီဦး ကားအရောင်း စင်တာမှ မန်နေဂျင်းဒါရိုက်တာ ဦးအောင်ဝင်းကပြောသည်။

ဦးအောင်ဝင်းက “နိုင်ငံခြားရင်းနှီးမြှုပ်နှံမှုတွေဝင်လာလို့ စီးပွားရေးတိုးတက်လာတယ်ဆိုရင်တော့ အရောင်းအ၀ယ် အားကောင်းလာနိုင်တဲ့အနေအထားတော့ ရှိတာပေါ့” ဟု ပြောသည်။

လမ်းပန်းဆက်သွယ်ရေးပိုင်းက ဖိအားတစ်ရပ်

မြန်မာတစ်နိုင်ငံလုံးတွင်ရှိသော ကားများအနေဖြင့် ရန်ကုန်မြို့တွင်သာ စုပြုံနေခြင်းဖြစ်၍ ရန်ကုန်လိုအပ် ချက်ပြည့်မီပြီဟု ယျေဘုယျအားဖြင့် ဆိုနိုင်သော်လည်း အခြားသောဒေသများတွင် လိုအပ်ချက်များစွာ ရှိနေဆဲဖြစ်ရာ လမ်းတံတား ဆက်သွယ်ရေး ကောင်းမွန်လာပါက နယ်ဒေသများ၏ ၀ယ်လိုအားတိုး လာနိုင်ကြောင်း စီးပွားရေးပညာရှင် ဦးလှမောင်က သုံးသပ်ပြောကြားသည်။

ယင်းက “ရန်ကုန်မှာ ကားပိုင်ဆိုင်မှုက ၀ယ်နိုင်တဲ့သူနဲ့ ပြည့်သလောက်ဆိုပေမယ့် နယ်တွေမှာက အများ ကြီးလိုနေသေးတယ်။ဈေးတွေကလည်း ကျနေတော့ အေးနေတယ်ဆိုပေမယ့် ၀ယ်လိုအားကတော့ ရှိ နေဦးမှာပေါ့” ဟုပြောသည်။

ကားအသစ်ဈေးကွက် နေရာရလာနိုင်

လက်ရှိပြည်တွင်းကားဈေးကွက်အနေအထားသည် တစ်ပတ်ရစ်ကားများ တင်သွင်းရောင်းချသည့် ဈေး ကွက်သည် ၀ယ်လိုအားလေးလံသည့် အခြေအနေဖြင့်ရှိနေပြီး မာစီဒီး၊ ဖို့စ်ကဲ့သို့သော နာမည်ရ အမှတ် တံဆိပ်များ၏ ကားအသစ်များကို တင်သွင်းရောင်းချခြင်းနှင့် ကားပြုပြင်ထိန်းသိမ်းသည့် Work Shop လုပ်ငန်းများကို ရင်းနှီးသူများ ပိုမိုများပြားလာလျက်လည်း ရှိသည်။

Cycle & Carriage Automobile ကုမ္ပဏီမှ အရောင်းဌာနအကြီးအကဲ ဦးအောင်သက်လွင်က “Used Car(အသုံးပြုပြီး တစ်ပတ်ရစ်ကား)ဈေးကွက်က မြန်မာနိုင်ငံအနေနဲ့ကြည့်ရင်တော့ ပိုပြီးအားကြီးတယ် ဆိုပေမယ့် နောက်ပိုင်းမှာတော့ အသစ်တွေကိုဝယ်စီးတဲ့ဈေးကွက်နဲ့ Used Carတွေကိုဝယ်စီးတဲ့ဈေး ကွက်နှစ်ခုဖြစ်လာမှာပါ။ ထိန်းသိမ်းပြုပြင်တဲ့ လုပ်ငန်းတွေကတော့ ပိုအားသာချက်ရှိတာပေါ့” ဟု မာစီဒီး ကား အရောင်းစင်တာဖွင့်ပွဲတွင် မဇ္ဈိမကို ပြောသည်။

လတ်တလော ပြည်တွင်းဈေးကွက်အတွင်း အရောင်းဝယ်ရှိနေသည့် ကားများမှာ အင်ဂျင်ပါဝါ1300CC ကားများဖြစ်သည့် ဈေးနှုန်း ကျပ်သိန်း ၁၀၀ နှင့် ကျပ်သိန်း ၁၄၀ ၀န်းကျင်ကားများဖြစ်သောFit, Vit, Bataနှင့်Pro box ကားများဖြစ်ကြောင်း ယင်းတို့ကဆိုသည်။