ဟိန်းကိုစိုး
ပါတီဥက္ကဋ္ဌ ဒေါ်အောင်ဆန်းစုကြည်အတွက် သမ္မတဖြစ်ရေး အတားအဆီးဖြစ်နေသည်ဆိုသော သမ္မတ အရည်အချင်းသတ်မှတ်ချက် ပုဒ်မ ၅၉ မှ ပုဒ်မခွဲ(စ)တစ်ပိုဒ်လုံးကို ဖြုတ်ရန်အတွက် အမျိုးသားဒီမိုကရေ စီအဖွဲ့ချုပ်က လွှတ်တော်တွင်း ဆွေးနွေးသွားမည်ဟု ပါတီပြောရေးဆိုခွင့်ရှိသူ ဦးဉဏ်ဝင်းက မဇ္ဈိမကို ပြောသည်။
“ဒီပုဒ်မကို အကုန်လုံးပြင်သင့်တယ်။ အခုပါတီကြီးတစ်ခုက ပြင်မယ်လို့ အကြံပြုတာတော့ ကြားတယ်။ သူတို့ ပြောတာက ကောင်းပေမယ့် ပြင်ရင်လည်း လူတစ်ယောက်ရဲ့ ပုဂ်္ဂိုလ်ရေးကို ကန့်သတ်သလို ဖြစ် နေသေးတယ် ဒါကြောင့် လုံးဝဖျက်သင့်တယ်”ဟု ဦးဉဏ်ဝင်းက ဆိုသည်။
အခြေခံဥပဒေ ပုဒ်မ ၅၉(စ)တွင် မိမိကိုယ်တိုင်သော်လည်းကောင်း၊ မိမိ၏မိဘတစ်ပါးပါးသော်လည်း ကောင်း၊ မိမိ၏ဇနီး၊ သို့မဟုတ် ခင်ပွန်းသော်လည်းကောင်း၊ မိမိ၏ တရားဝင်သားသမီးတစ်ဦးဦးသော် လည်းကောင်း၊ ထိုတရားဝင်သားသမီးတစ်ဦးဦး၏ဇနီး သို့မဟုတ် ခင်ပွန်းသော်လည်းကောင်း နိုင်ငံခြား အစိုးရ၏ ကျေးဇူးသစ္စာတော်ကို ခံယူစောင့်ရှောက် ရိုသေသူ သို့မဟုတ် နိုင်ငံခြားအစိုးရ၏လက်အောက် ခံဖြစ်သူ သို့မဟုတ် တိုင်းတစ်ပါး၏ နိုင်ငံသားဖြစ်သူများ မဖြစ်စေရ၊ ထိုသူများသည် နိုင်ငံခြားအစိုးရ၏ လက်အောက်ခံဖြစ်သူသော်လည်းကောင်း၊ တိုင်းတစ်ပါး၏ နိုင်ငံသားသော်လည်းကောင်း ခံစားရသော အခွင့်အရေးများနှင့် ကျေးဇူးခံစားခွင့်များကို ခံစားနိုင်ခွင့်ရှိသူများ မဖြစ်စေရဟု ပြဋ္ဌာန်းထားသည်။
အမျိုးသားဒီမိုကရေစီအဖွဲ့ချုပ်သည် အဆိုကို ဇန်န၀ါရီလ ၁၃ ရက်တွင် စတင်မည့် လွှတ်တော်တွင် တင် သွင်းရန် ကြိုးပမ်းသွားမည်ဖြစ်ပြီး ပူးပေါင်းကော်မတီမှ အခြေခံဥပဒေ ပြင်ဆင်ခြင်းဆိုင်ရာ လေ့လာတွေ့ ရှိချက်များကို အစီရင်ခံတင်ပြလာပါကလည်း ဆွေးနွေးသွားမည်ဖြစ်သည်ဟု ဦးဥာဏ်ဝင်းက ပြောသည်။
ပြည်ခိုင်ဖြိုးပါတီသည် မကြာသေးမီက ဖွဲ့စည်းပုံပြင်ဆင်ရေးနှင့် ပတ်သတ်သည့် ပါတီဗဟိုကော်မတီအ စည်းအဝေးကို ကျင်းပခဲ့ပြီး ဖွဲ့စည်းပုံလေ့လာသုံးသပ်ရေးကော်မတီသို့ ပြင်ဆင်ရန် အကြံပြုချက်တွင် ယင်းပုဒ်မကို ပြင်ဆင်ရန် ဒုတိယဦးစားပေးအဆင့် သတ်မှတ်ထားသော်လည်း ယင်းကို ၂၀၁၅ မတိုင်မီ တွင် ပြင်ဆင်သွားရန်ဖြစ်သည် အဆိုပါပါတီဗဟိုကော်မတီဝင် ဦးလှဆွေက ပြောသည်။
“သမ္မတဖြစ်ချင်တဲ့သူကတော့ ကိုယ့်သားသမီးကို ကိုယ့်နိုင်ငံသားတော့ လျှောက်ရမှာပေါ့။ မလျှောက် ချင်လဲ နေပေါ့။ ဒါမှလည်း တိုင်းတစ်ပါးသားရဲ့ ကျေးဇူးခံတာတွေ မဖြစ်မှာပေါ့”ဟု ၎င်းက ပြောသည်။
အမျိုးသားဒီမိုကရေစီအဖွဲ့ချုပ်ပါတီမှ တိုင်းနှင့် ပြည်နယ်အလိုက် ဖွဲ့စည်းပုံပြင်ဆင်ရေးနှင့် ပက်သတ်ပြီး ပြည်သူသဘောထားများကို ခံယူရာတွင် ယင်း ၅၉(စ) ကို လုံးဝ ဖျက်သိမ်းလိုကြသူ အများဆုံး ပါဝင် သည်ကို သိရှိခဲ့ရသည်ဟု ဦးဉဏ်ဝင်းက ဆိုသည်။
အမျိုးသားဒီမိုကရေစီအဖွဲ့ချုပ်ပါတီသည် အခြေခံဥပဒေ ပြင်ဆင်ရန်အတွက် အကြံပြုချက် ၁၆၈ ချက်ကို ကော်မတီသို့ ဒီဇင်ဘာလ ၂၉ ရက်တွင် တင်ပြခဲ့ပြီးဖြစ်သည်။
No comments:
Post a Comment