Wednesday, January 8, 2014

မန္တလေး၏ ပထမဆုံး အထပ်မြင့်အဆောက်အအုံ မန်းမြန်မာကွန်ဒို လူနေတိုက်ခန်းများ ဇန်န၀ါရီ ၁၆ တွင် ဖွင့်မည်

ဖြိုး

မန္တလေး စည်ပင်သာယာရေးကော်မတီနှင့် မန်းမြန်မာကုမ္ပဏီတို့ အကျိုးတူလုပ်ဆောင်သည့် မန္တလေးမြို့ ၏ပထမဆုံး အထပ်မြင့် ကွန်ဒိုမီနီယံ မန်းမြန်မာကွန်ဒို၏ ခြောက်ထပ်မှ၂၅ထပ်အထိ လူနေတိုက်ခန်းများ ကို ဇန်န၀ါရီ ၁၆ ရက်တွင်ဖွင့်လှစ်မည်ဟု မန္တလေးမြို့ စည်ပင်သာယာရေးကော်မတီ အဆောက်အအုံနှင့် ကုန်ရုံဌာန ဌာနမှူးဦးမျိုးအောင်က ပြောသည်။

အဆိုပါ မန်းမြန်မာကွန်ဒိုမှာ မန္တလေးမြို့ ၈၄ လမ်း၊ ၂၇ နှင့်၂၈ လမ်းကြားတွင် ဆယ်နှစ်တာကာလအချိန် ယူတည်ဆောက်ခဲ့သည့် ၂၅ ထပ် ကွန်ဒိုမီနီယံ အဆောက်အအုံဖြစ်သည်။ မြေညီထပ်မှ ခြောက်လွှာအ ထိ ဆိုင်ခန်းများနှင့် ကားပါကင်အတွက် တည်ဆောက်ထားကာ မန်းမြန်မာပလာဇာအဖြစ် ၂၀၀၈ ခုနှစ်မှ စတင်ဖွင့်လှစ်ခဲ့သည်။ ခြောက်ထပ်မှ ၂၅ ထပ်အထိ လူနေတိုက်ခန်းများကိုမူ ဇန်န၀ါရီ ၁၆ ရက်တွင် ဖွင့် လှစ်မည် ဖြစ်သည်။

မန်းမြန်မာ ၂၅ ထပ် ကွန်ဒိုမီနီယံကို မန္တလေးမြို့တော် စည်ပင်သာယာရေးကော်မတီနှင့် မန်းမြန်မာ ဆောက်လုပ်ရေးတို့ အကျိုးတူ တည်ဆောက်ခြင်းဖြစ်သည်။ မန္တလေးမြို့ စည်ပင်သာယာရေးကော်မတီ သည် လူနေတိုက်ခန်း ၄၃ ခန်း ရရှိမည်ဖြစ်သည်ဟုလည်း အဆောက်အအုံနှင့် ကုန်ရုံဌာနမှ ဌာနစုမှူး ဒေါ်လဲ့လဲ့ခိုင်က ပြောသည်။

အဆောက်အအုံ၏ ကြံ့ခိုင်မှုနှင့် လူနေထိုင်ရန် သင့်လျော်သည့် အနေအထားများကို မန္တလေးမြို့စည်ပင် မှ စစ်ဆေးတွက်ချက်ပြီးမှ ဖွင့်လှစ်ခြင်းဖြစ်သည်။ အဆိုပါအဆောက်အအုံသည် ၈ ဒသမ ၅ ရစ်ခ်ျတာ စကေးအထိ ငလျင်ဒဏ်ခံနိုင်သည်။

ကွန်ဒိုတစ်ခုလျှင် အခန်းအရေအတွက် ၇၂ ခန်းပါဝင်ပြီး ကွန်ဒိုနှစ်ခုအတွက် စုစုပေါင်း ၁၄၄ ခန်း ပါဝင်ဖွဲ့ စည်းထားပြီး အခန်းတစ်ခန်းလျှင် စတုရန်းပေ ၁,၉၈၀ ခန့် အကျယ်အ၀န်းရှိသည်။ ဖွင့်ပွဲနေ့တွင် လူနေ တိုက်ခန်း၂၀ ကိုလည်း မန်းမြန်မာဆောက်လုပ်ရေးက ရောင်းချပေးသွားမည်ဖြစ်သည်။ ၂၀၀၃ ခုနှစ် စက်တင်ဘာတွင် ဌာနတွင်း အတည်ပြု စာချုပ်ချုပ်ဆိုခဲ့ကာ ၂၀၀၄ ခုနှစ်၊ ဇန်န၀ါရီ ၁ ရက်တွင် တည် ဆောက်ရေးလုပ်ငန်းများ စတင်ခဲ့သည်။

No comments: