ABC
၈၈ မျိုးဆက်ကျောင်းသား ခေါင်းဆောင်ဟောင်း ဦးမင်းကိုနိုင်၊ ဦးကိုကိုကြီးနဲ့ ၈၈ မျိုးဆက် ကျောင်းသား အဖွဲ့တွေ ဦးဆောင်ပြီး လူမှုအရပ်ဘက်အဖွဲ့အစည်းပေါင်း ၅၀ ကျော်ဟာ နိုင်ငံသား အခွင့်အရေး အပြည့်အဝ ရရှိရေးအတွက် မနေ့တုန်းက ရန်ကုန်မြို့ မြို့တော်ခန်းမရှေ့မှာ ဆန္ဒထုတ်ဖော်ခဲ့ပါတယ်။
အဲဒီ ဆန္ဒပြပွဲမှာ လူအင်အား ထောင်နဲ့ချီဟာ နိုင်ငံသား အခွင့်အရေး အပြည့်အဝ ရရှိဖို့နဲ့ နိုင်ငံသား အခွင့်အရေးကို ပိတ်ပင် တားဆီးနေတဲ့ ငြိမ်းချမ်းစွာ စီတန်းလှည့်လည်ခွင့်ဆိုင်ရာ ဥပဒေ အပါအဝင် တည်ဆဲ ဥပဒေတွေကို ဖြတ်သိမ်းပေးဖို့ ဒါမှမဟုတ်ရင် ပြင်ဆင်ပေးဖို့ တောင်းဆိုခဲ့ကြပါတယ်။
ဒါ့အပြင် နိုင်ငံရေး အရ ဖမ်းဆီးမှု မရှိဖို့နဲ့ နိုင်ငံရေး ပုဒ်မတွေနဲ့ တရားစွဲဆိုခံထားရတာတွေကို ပယ်ဖျတ်ပေးဖို့ တောင်းဆိုခဲ့ကြပါသေးတယ်။
မနေ့တုန်းက ဆန္ဒပြပွဲမှာ နိုင်ငံသား အခွင့်အရေး အပြည့်အဝ ရရှိဖို့ တောင်းဆိုတာနဲ့ ပက်သက်ပြီး ၈၈ မျိုးဆက်ကျောင်းသား ခေါင်းဆောင်ဟောင်း ဦးကိုကိုကြီးက အခုလို ပြောဆိုခဲ့ပါတယ်။
“အပြည်ပြည်ဆိုင်ရာ လူ့အခွင့်အရေး ကြေညာစာတမ်းပါ အခွင့်အရေးတွေကို နိုင်ငံသားတွေကို အပ်နှင်းပါ့မယ်လို့ နိုင်ငံတကာ မိသားစုထံမှာ ကတိကဝတ်ပြုထားတာလည်း ဖြစ်ပါတယ်။ အပြည်ပြည်ဆိုင်ရာ လူ့အခွင့်အရေး ကြေညာစာတမ်း အပိုဒ် ၁၉ အရ လူတိုင်းမှာ လွတ်လပ်စွာ ထင်မြင် ယူဆနိုင်ခွင့်နှင့် လွတ်လပ်စွာ ဖွင့်ဟဖော်ပြနိုင်ခွင့် ရှိသည်လို့ အတိအကျ ပြဌာန်းထားပါတယ်။ ကျွန်တော်တို့ နိုင်ငံကနေပြီးတော့ နိုင်ငံတကာကို ပေးထားတဲ့ ကတိကဝတ်ပါ။ ဒါ့ကြောင့် ကျွန်တော်တို့ လွတ်လပ်စွာ စုဝေးခွင့်ဟာ ကျွန်တော်တို့ရဲ့ မွေးရာပါ အခွင့်အရေး ဖြစ်တယ်ဆိုတာကို အလေးအနက်ထပ်ပြီး ပြောချင်ပါတယ်။”
လက်ရှိ ပြဌာန်းထားတဲ့ ငြိမ်းချမ်းစွာ စီတန်းလှည့်လည်ခွင့်ဆိုင်ရာ ဥပဒေဟာ နိုင်ငံသားတွေရဲ့ အခွင့်အရေးကို ပိတ်ပင်တားဆီး နေတဲ့ ဥပဒေတစ်ခုဖြစ်တယ်လို့လည်း ဆိုပါတယ်။ တစ်ဆက်တည်းမှာပဲ နိုင်ငံသား အခွင့်အရေးတွေကို ဖိနှိပ်ချုပ်ချယ်ထားတဲ့ ဥပဒေတွေကို ဆက်လက်ကန့်ကွက်မှုတွေ ပြုလုပ်သွားမယ်လို့ လက်ပံတောင်းတောင် အရေးဆန္ဒထုတ်ဖော်မှုကြောင့် ပုဒ်မ ၁၈ နဲ့ ပြစ်ဒဏ်ကျခံခဲ့ရတဲ့ နိုင်ငံရေး အကျဉ်းသား ဟောင်းများအဖွဲ့က ကိုစိုးမိုးထွန်းက ပြောပါတယ်။
“ဆန္ဒပြတာက ဆန္ဒထုတ်ဖော်တယ်ဆိုတာက နိုင်ငံသားအခွင့်အရေးတွေနဲ့ အညီ ကျွန်တော်တို့ ဆန္ဒထုတ်ဖော်တာပါ။ ဥပဒေနဲ့ လုပ်ထုံးလုပ်နည်းတွေနဲ့ အညီ ပုဒ်မ ၁၈ မှ မဟုတ်ပါဘူး ဒီအခွင့်အရေးတွေနဲ့ ပတ်သက်လို့ လွတ်လပ်စွာ ထုတ်ဖော် ပြောဆိုခွင့် ရေးသားခွင့် စည်းရုံးလှုံဆော်ခွင့်တွေကို ကျွန်တော်တို့က ဆက်လက်တိုက်ပွဲဝင်သွားမှာပါ။”
ပြုလုပ်ခဲ့တဲ့ ဆန္ဒပြပွဲဟာ တရားဝင်ခွင့်ပြုမိန့်နဲ့ ဆန္ဒထုတ်ဖော်ခဲ့တာဖြစ်ပြီး အဖွဲ့အစည်းပေါင်း ၅၀ ကျော်ရဲ့ သဘောတူညီချက်တွေ အတိုင်း ဆန္ဒထုတ်ဖော်ခဲ့တာလည်း ဖြစ်တယ်လို့ သိရပါတယ်။
အဲဒီ ဆန္ဒပြပွဲဟာ ပထမဦးဆုံးအကြိမ် အဖြစ် ၈၈ မျိုးဆက်ကျောင်းသားဟောင်းတွေ အကုန်လုံး ပါဝင်တဲ့ ဆန္ဒပြပွဲတစ်ခုလည်း ဖြစ်ပြီး လူအင်အား အများဆုံး ပါဝင်တဲ့ ဆန္ဒထုတ်ဖော်ပွဲတစ်ခုလည်း ဖြစ်တယ်လို့ သိရပါတယ်။
No comments:
Post a Comment