ဇော်ဇော်ထွေး
အထူးစုံစမ်းစစ်ဆေးရေး (စသုံးလုံး) က စစ်ဆေးစဉ် တိုက်ပေါ်မှ ပြုတ်ကျသေဆုံးခဲ့သည့် မနန်းဝိုးဖန်၏ အမျိုးသား ဂျပန်နိုင်ငံသား နာမားစေး (Mr.Namasa) ကို လှိုင်သာယာမြို့နယ် တရားရုံးက ဇန်န၀ါရီ ၉ ရက် နံနက်တွင် လူဝင်မှုကြီးကြပ်ရေး ဥပဒေချိုးဖောက်မှုဖြင့် ထောင်ဒဏ်တစ်နှစ်ကျခံစေရန် အမိန့်ချ မှတ်လိုက်သည်။
ယင်းကဲ့သို့ အမိန့်ချမှတ်လိုက်သော်လည်း တရားသူကြီးက ထောင်ဒဏ်တစ်နှစ်တွင် ချုပ်ရက်များကို ထုတ်နုတ်ခံစားခွင့်ရှိစေဟု အမိန့်ချမှတ်ခဲ့သဖြင့် ၎င်းအား ၂၀၁၂ ခုနှစ် မေလ ၁၆ ရက်ကတည်းက တစ်နှစ်ချုပ်နှောင်ခဲ့ပြီး ချုပ်ရက်တစ်နှစ်ကျော်သွားသည့်အတွက် ချုပ်ရက်ခံစားခွင့်ဖြင့် လွတ်မြောက် တော့မည်ဖြစ်သည်ဟု အမှုသည်၏ ရှေ့နေဒေါ်နန်းထွေးမှုံက ပြောသည်။
၎င်းသည် ၂၀၁၂ ခုနှစ် အစောပိုင်းကာလအတွင်း အိမ်ခြံမြေဈေးကွက်၌ ဈေးကစားမှုများကြောင့် အခြား အိမ်ခြံမြေကုမ္ပဏီများမှ ငါးဦးနှင့်အတူ အထူးစုံစမ်းစစ်ဆေးရေးက နိုင်ငံတော်၏ စီးပွားရေးကို ထိခိုက် စေမှုကြောင့် ပုဒ်မ ၅ (ဇ) ဖြင့်တရားစွဲတင်ခြင်းခံထားရသူ ဖြစ်သည်။
သို့သော် နိုင်ငံတော်သမ္မတရုံး၏ ၂၀၁၃ ခုနှစ် ၃၁ ရက်က ထုတ်ပြန်ခဲ့သည့် လွတ်ငြိမ်းချမ်းသာခွင့်ကြောင့် ပုဒ်မ ၅ (ဇ) နှင့် ကျခံခဲ့ရသူများ လွတ်မြောက်ရာတွင် မစ္စတာနာမားစေး ပါဝင်ခဲ့သည့်အတွက် ၂၀၁၂ ခုနှစ် ဒီဇင်ဘာ ၃၁ ရက်ကတည်းက လွတ်ကြောင်းအမိန့်ချပြီးဖြစ်သည်ဟု လှိုင်သာယာမြို့နယ် တရား သူကြီး ဦးမြတ်ထူးမောင်က ပြောသည်။
ထို့ကြောင့် မစ္စတာနာမာစေးနှင့် ပူးတွဲတရားစွဲခံထားရသူ ငါးဦးမှာ အမှုမှလွတ်မြောက်ခွင့်ရရှိခဲ့ခြင်း ဖြစ်သည်။
“ဒီလွတ်ငြိမ်းခွင့်ပေးဖို့ကို သင်္ကြန်လောက်ကတည်းက သတင်းကြားထားတာပါ။ ခုမှရောက်လာတယ်။ တကယ်ဝမ်းသာတယ်။ ၅ (ဇ) တို့ ၅ (ည) တို့ကို နိုင်ငံတော်က လွှတ်ပေးလိုက်တဲ့အတွက်လည်း ၀မ်း သာပါတယ်” ဟု မစ္စတာ နာမာစေးက စကားပြန်မှတစ်ဆင့် မီဒီယာများကို ပြောပြခဲ့သည်။
သို့သော် ဗီဇာစည်းမျဉ်းစည်းကမ်းဖောက်ဖျက်မှုဖြင့် လှိုင်သာယာမြို့နယ် လူဝင်မှုကြီးကြပ်ရေးက လူဝင် မှုကြီးကြပ်ရေး ဥပဒေဖြင့် တရားစွဲထားသည့်အတွက် မစ္စတာနာမာစေးကို တရားသူကြီး ဦးမြတ်ထူး မောင်က ထောင်ဒဏ်တစ်နှစ်ထပ်မံ၍ အမိန့်ချမှတ်လိုက်ခြင်း ဖြစ်သည်။
“တရားသူကြီး အမိန့်ကတော့ ဂျပန်ကြီးဟာ မြန်မာနိုင်ငံရင်းနှီးမြှုပ်နှံမှု ကော်မရှင်ရဲ့ ခွင့်ပြုချက်မရှိဘဲ မြေကွက်တွေ အရောင်းအ၀ယ်လုပ်တယ်လို့ သုံးသပ်တယ်။ ဒါကြောင့် ဗီဇာစည်းမျဉ်းဖောက်ဖျက်မှု အပြစ်ရှိတယ်လို့ သုံးသပ်တဲ့အတွက် လ၀က ပုဒ်မ ၁၃/၁ နဲ့ အမိန့်ချလိုက်တာပါ” ဟု အဆိုပါ ဂျပန် အမျိုးသားဘက်မှ တရားလွှတ်တော်ရှေ့နေ ဒေါ်နန်းထွေးမှုံက မီဒီယာများသို့ ပြောပြခဲ့သည်။
အဆိုပါ အမှုနှင့်ပတ်သက်၍ လ၀က အရာရှိဖြစ်သူ ဦးတင်ထူးကျော်က “သူ့အတွက် ရုံးချုပ်မှာ ပြည်နှင် အမိန့် လှမ်းတောင်းရဦးမှာပါ။ အဲဒီအချိန်ထိ သူ့ကို အင်းစိန်ထောင်မှာထားပြီး ရုံးချုပ်အမိန့်ကို စောင့်ရ မှာပါ။ ရုံးချုပ်က ပြည်နှင်အမိန့်ကျလာရင် လေဆိပ်ကို လိုက်ပို့ပေးရမှာ” ဟု မီဒီယာများသို့ ပြောပြခဲ့ သည်။
အဆိုပါ အမှုမှာ ၂၀၁၂ ခုနှစ်အစောပိုင်းက အိမ်ခြံမြေဈေးကွက်တွင် ဈေးကစားမှုများကြောင့် စသုံးလုံးမှ စုံးစမ်းစစ်ဆေးခဲ့သော အမှုဖြစ်သည်။ အဆိုပါ ဂျပန်နိုင်ငံသား၏ အမျိုးသမီးဖြစ်သူ မနန်းဝိုးဖန်ကို စသုံး လုံးမှ ခေါ်ယူစစ်ဆေးနေစဉ် အထူးစုံစမ်းစစ်ဆေးရေးရုံးချုပ် အဆောက်အအုံပေါ်မှ ပြုတ်ကျသေဆုံးမှု ဖြစ်ပေါ်ခဲ့သည်။
အဆိုပါ ဂျပန်နိုင်ငံသားနှင့် အိမ်ခြံမြေအကျိုးဆောင် လုပ်ငန်းများမှ ပါဝင်ပက်သက်နေသူ ငါးဦးတို့ကို စသုံးလုံးက ခေါ်ယူစစ်ဆေးပြီး မြန်မာနိုင်ငံ၏ အကျိုးစီးပွားပျက်ပြားစေမှုဖြင့် တရားစွဲတင်ပို့ခဲ့ခြင်းလည်း ဖြစ်သည်။
No comments:
Post a Comment